* انقذوا بغداد *
لما سألت قلبي ..... إيـــه احلى البلاد .
رد عليّه قلبي .... أنا حبيت بغداد .
فيها ماعرفت غربة ..... ولا حتى البعاد .
********
في شارع الرشيد ... لقيت شارع فؤاد .
والنيل شفته ف دجلة ..... وشربت من الفرات .
وزقايق المنشية ..... مشيتهم أنا ف بغداد .
********
حسيت بالناس قرايبي .. بملامح الاجداد .
ودمهم ف قلبي .... والاصل له امتداد .
وعزة نفس عالية .... بتخليهم شداد .
شداد والقلب أبيض .... مابيعرفش السواد .
وصار منهم صحابي ... ودام بيننا الوداد .
********
والآثار القديمة ... تحكي تاريخ بلاد .
تاريخ دولة عظيمة ... والعاصمة بغداد .
وحضارة لسه حية .. جوا طبع الولاد .
طبع النخيل العالية .. في الصبر و في العناد .
الصبرعالشدايد ...... والظلم مهما زاد .
بغداد شايفك حزينة .. انوارك ما بتتقاد .
كام أم تبكي وتبكي .... مش لاقية لابنها زاد .
واللي بيحكي ويحكي ..... وكل الحكايات تنعاد .
*********
بغداد كام صوت بيشكي .. لقلوب زي الجماد .
وكام جريح بيصيح .... يالا انقذوا بغداد .
********
إيه ذنب طفل صغيـّــر.... بيورث الامراض .
أيه ذنب شعب نعاقبه ... لغلطة من أفراد .
********
عشر سنين وزادوا ... وف كل يوم ضحايا .
لو كان ضمير حسبها .. كان قال حرام كفاية .
دي بلاد عشان ضحية ..... تعمل مليون حكاية .
لكن صياح بغداد .. خلاص بقى معتاد .
********
بغداد خلاص لا تشكي ... إلا لرب العباد .
ابنك بكرة حيكبر .... وقوته تزداد .
وكمان شعبك حيكتر ... وعمره ماحيتباد .
وحترجعي منصورة .. وأنوارك تتقاد .
وحترجع العروبة .. دولة ومش بلاد .
بكرة التاريخ يتدور ... واسمك يرجع ينور
وترجعي بغداد .
************
ليست هناك تعليقات:
إرسال تعليق