كلمات تم تأليفها بمناسبة انتهاء مدة خدمتي بالتربية والتعليم

كلمة بمناسبة انتهاء الخدمة بالتربية والتعليم في 2/12/2017  
ـــــــــــــــــــــــــــــــ

الحمد والشكر لله على توفيقه لي في رحلة العمل بالتربية والتعليم التي كانت سنين طويلة مليئة بالاحداث السارة والغير سارة ، ولكن في الذاكرة تصبح جميع الأعمال سواء - من حيث الأثر- حيث تتحول الذكريات بحلوها ومرها وكأنها حكايات يسعد بها من يرويها ومن يسمعها ويستفيد بما تحمله من خبرات صنعتها السنين

وأول الحكاية كانت العمل في العراق مدرس علوم لمدة عامين دراسيين من 1981 الى 1983وقد كانت هذه الفترة في الواقع تعادل العديد من السنوات بما كان بها من أحداث وخبرات كثيرة يمكن الاطلاع عليها لاحقا

وبعد العودة من العراق قضيت عاما في دراسة الدبلومة العامة بكلية التربية جامعة الاسكندرية ثم استلمت العمل عام 1984 مدرس تربية زراعية بمدرسة القباري بادارة غرب ، وبدأت أطبق دراساتي التربوية في العمل بكل دقة وقد ساعدني على ذلك أن مادة التربية الزراعية ليست بها القيود التي تمنع الابتكارات ، وأن بها مجال متسع لتطبيق العلوم التربوية

وفي عام 1992 تم ترقيتي الى مدرس اول في نفس الادارة

** وفي عام 1994انتقلت الى ادارة المنتزة للعمل بمدرسة عمرو شعير ع مدرس أول لمدة سنتين ، وفي عام 1995 بناء على تميزي في العمل تم انتدابي للعمل بتوجيه التربية الزراعية وكنت أصغر موجه سنا وقضيت ثمانية سنوات بالتوجيه وحرصت على الاهتمام بالشئون الفنية وكنت ادير المكتب الفني في كثير من المرات بمفردي واقوم بتدريب المدرسين على كل ما هو جديد في عالم الزراعة وكثيرا ما كنت استعين بالنماذج الحية والبروجيكتور  بالتعاون مع قسم الارشاد الزراعي بالكلية .

** ثم كانت ترقيتي الرسمية (بدون ندب) وكيل بمدرسة ابيس ع عام 2003 بادارة شرق ، ورغم أن هذا العمل اداري الا انني ابديت استعدادي لكي أكون مسئولا عن التعليم الالكتروني بالمدرسة والحكومة الالكترونية وقبلت ان أكون مسئولا عن حجرة الاوساط بما فيها من عهدة .

** واستمر عملي في مدرسة (ابيس2 الاعدادية ) اربعة سنوات حتى2007 قضيتها بحجرة الاوساط - (الشبكات) ، و تم ترشيحي للتدريب في مدينة6 اكتوبر مع مدرسي الحاسب الآلي ، وكان موضوع التدريب عن استقبال وارسال الدروس التخيلية، وكنت أخشى رفض ادارة التدريب لأن وظيفتي الأصلية وكيل ولست مدرسا لمادة الحاسب الآلي ، وكان من نتيجة حسن ادارتي للمعمل ان أصبحت المدرسة مركزا لتدريب المدرسين على تطبيقات الحاسب الآلي في احدى السنين.

** ومنذ عملي في مدرسة ابيس بدات بتحرير مجلة شهرية ورقية يتم توزيعها على بعض المدرسين والقادة والطالبات المتميزات ، وبها أخبار المدرسة وبعض من طرائف المعلومات .

**وفي عام2007 انتقلت وكيلا الى مدرسة عبد الرحمن الفارسي الاعدادية ، وهناك قمت بأعمال الحكومة الالكترونية بالمدرسة والادارة أيضا ، كما تم أيضا استمرار المجلة الشهرية ولكن باسم المدرسة الجديدة وكنت أعتبرها توثيقا للأعمال التي تتم بالمدرسة ، هذا بالاضافة الى أنني قمت بعمل مدونة الكترونية للمدرسة تدون عليها كل نشاطات المدرسة بما فيها المجلة الشهرية ، و المسابقات الثقافية والنتائج، كما قمت بتدريب أكثر من عشر طالبات على عزف الموسيقى بالطابور والحفلات المدرسية 

** وعندما وجدت فرصة للنقل الى أقسام الادارة طلبت العمل بقسم المتابعة الفنية وتم تكليفي في عام 2012  للعمل كوكيل قسم، واعتبرت ان هذا العمل فضل كبير من الله لأنه يوافق كل اهتماماتي وامكانياتي ، واتخذت لنفسي مبدأ (أن تعزيز الايجابيات أفضل الطرق نحو معالجة السلبيات ) وكانت وسيلتي في ذلك تشجيع المدرسين والمديرين المتميزين باخبار انشرها لهم على مدونة المتابعة الفنية التي أنشاتها لهذا الغرض ، كما أستمرت أيضا المجلة الشهرية تحت اسم مجلة ( عيوون ) ، كنت اشعر بالاستمتاع بهذا العمل ، و الجديد في هذه المجلة عن غيرها من المجلات السابقة هو أنني كنت اقوم بنشر اعدادها الشهرية عبر الماسنجر الى صفحات المديرين والموجهين والمدرسين في الادارة ، وكنت أبذل كثيرا من الجهد والوقت في جمع اخبار الادارة من خلال المواقع والصفحات الالكترونية للمدارس والمدرسين والأقسام

** وكثيرا ما كنت ابدي اعتراضي على كثرة المكاتبات والاستمارات الروتينية التي يملأها المتابعين ، وعندما أصبحت مسئولا عن ادارة القسم بعد انتهاء مدة عمل الرئيس السابق حرصت على أن تكون التقارير شديدة الاختصار ومكتوبة بالكومبيوتر لكي تكون مرجعا لكل متابع

** ورغم الجهد الكبير في العمل بالتدوين الالكتروني لأخبار المتابعة والادارة إلا أنني كنت أسعد كثيرا بردود فعل طيبة من كثير من الزملاء والقادة من الادارة وادارات مختلفة ومحافظات مختلفة ايضا.

** وأعتبرت المجلة والمدونة وسيلة للتعرف على آراء الآخرين ومدى تفاعلهم وكنت أعتبر أيضا التجاهل من بعض الزملاء والقادة نوعا من الرد السلبي ولابد وأن يؤخذ في الاعتبار .

** وفي أواخر عام 2016 وعندما صدر القرار بضم المتابعتين الفنية والميدانية وانشاء قسم جديد (المتابعة وتقويم الاداء) بحيث يضم 75% اداريين وال25% معلمين شعرت بانتكاسة سوف تؤثر على عملي الغير تقليدي و تأكدت أنني في ظل هذا النظام الجديد لن أستطيع القيام بعملي بالحب والاقتناع الذي اعتدت عليه .

** ورغم ان اسمي كان مدرجا في التشكيل الجديد في الـ 25% معلمين ورغم شدة اقتناعي بعملي بالمتابعة وثقتي بقدرتي على العطاء فيه إلا أنني قررت التمسك بطلبي للنقل من القسم الى قسم آخر لقضاء سنة آمنة من الاصطدامات التي لم اعد اتحملها

** وقبلت العمل بقسم التغذية باعتباره عمل خيري من أجل اسعاد طالب فقير بوجبة تقدم له ، وجدت العمل في هذا القسم في البداية غريبا عن كل أعمالي السابقة، وحتى أشعر بالاقتناع التام حرصت على اهتمامي بالتوعية الغذائية من خلال التوصيات والندوات التي كنت أقوم بها

** وبعد قضاء عام كامل في هذا القسم انتهت مدة خدمتي باحتفالية سعيدة يوم 21/11/2017بين زملاء أعزاء سعدت بالعمل معهم خلال هذه الفترة. وأصبحت هذه الفترة متممة لرحلتي الطويلة بالتربية والتعليم بدأت منذ عام 1981، ويمكن تتبع رحلتي في التربية والتعليم بمطالعة

(مدونة المتابعة الفنية بادارة شرق الاسكندرية التعليمية ) 

وعلى هذا الرابط :

http://alaa32013.blogspot.com.eg/p/blog-page_8.html

العودة الى صفحة المحتويات 

مقالة عن المسطحات الخضراء في الحدائق العامة

تعتبر المسطحات الخضراء من أهم مميزات الحدائق وخاصة الحدائق العامة حيث تغطي أكثر المساحات في الحديقة بلون أخضرله تأثير نفسي كبير كما تساهم في ترطيب الجو عن طريق عمليات النتح المستمرة وامداد الجو بالاكسجين الناتج عن عملية البناء الضوئي  ، كما أن المسطحات الخضراء تعتبر الخلفية المحايدة التي تظهر كل ما امامها من نباتات أو منشآت بالحديقة . 

ولكن...

ولكن المسطحات في الاماكن المزدحمة تفقد مميزاتها نتيجة تعرضها للتلف نتيجة (دهسها)  بالاقدام وتراكم القمامة بها ، وصعوبة تنظيفها مثل الأسطح الملساء ، وفي هذه الحالة سوف يتحول تأثيرها النفسي الايجابي الى تأثير سلبي ، نتيجة التشوه الذي يصيب الحديقة بكل محتوياتها 

وبناء على ذلك فإنني أعرض رأيا أرجو أن يكون مسموعا لدى الجهات المسئولة عن انشاء الحدائق ، وهو الغاء المسطحات الخضراء في حدائق الميادين والشوارع المزدحمة واستبدالها بمسطحات من البلاط أو الاسمنت يسهل تنظيفها ، مع مزيد من الاهتمام بالأحواض المخصصة للأشجار أو الشجيرات تعويضا عن نقص المسطحات الخضراء ، وزراعة مزيد من الاحواض المرتفعة عن الارض حيث تكون بعيدة عن أيدي وأقدام العابرين في الحديقة أو الجالسين فيها .

ويجب أن نضع في اعتبارنا الظروف الزمانية والسكانية عند انشاء الحدائق أو تطويرها ، فقديما كانت المسطحات الخضراء ركنا هاما في حدائق الشوارع والميادين ، كما أن المجتمعات الجديدة يناسبها المسطحات الخضراء الواسعة لانخفاض الكثافة السكانية بها ، وذلك الى حين أن تتغير ظروفها .

لذلك فإن انشاء الحدائق من الامور التي تحتاج الى مزيد من بعد النظر واعمال الفكر لتحديد ما هو المناسب  من عدمه بدلا من التمسك بأنماط ثابتة من القواعد تؤدي بنا الى عواقب غير مرغوبة مثل تراكم القمامة فوق المسطحات وانتشار الحشرات .

من كتاب ولاطفالنا الأحباء

ولأطفالنا الأحباء

تأليف : علاء عبد العليم .

********** 

إهداء

إلى القلوب النابضة بالحب والوفاء .

إلى الأطفال والكبار في كل الأنحاء .

إلى كل من يحب الطبيعة والنقاء .

المؤلف

*****************

* مقدمة *

* خلق الله الإنسان كائنا ناطقا ، وأن احتياج الإنسان إلى التحدث إلى الآخرين لا يقل أهمية عن احتياجاته المادية المعروفة مثل الغذاء والهواء ..............  وغير ذلك .

* والطفل كإنسان في مرحلة التكوين لابد وان ينل احتياجاته الخاصة من كل شيء قدرا و نوعا .

* وأرجو أن يعرف القارئ ... أولا ... أن سبب اهتمامي بالكتابة للطفل هو حبي للطبيعة التي خلقها الله ، وخوفي الدائم على كل شيء طبيعي من عوامل التغير والتلوث ، ورأيت الطفل أمامي قطعة ثمينة من الطبيعة النظيفة ، فحاولت بكتاباتي أن أفعل شيئا ... ولو قليلا ... من أجل المحافظة على براءة الطفولة ونقاوة المشاعر الطبيعية.

* وقد يرجع اهتمامي بالطفل أيضا إلى اقتناعي الكامل بأن جميع المشكلات التي يمر بها المجتمع ترجع أساسا إلى أخطاء في التربية ، وان تكريس الجهد للتربية الصحيحة للنشء هو أكثر جدوى من كل الحلول المؤقتة .

* والكتاب الذي حرصت على تقديمه في هذه المرة هو تجميع لمؤلفات نشرت في إصدارات سابقة ، مع قليل من الإضافة ، وذلك من اجل تقديمها للمربي لتوصيلها إلى الطفل بعد اختيار المناسب منها لطبيعته وثقافته ومرحلته العمرية ، حيث أن الأعمال المقدمة متنوعة تبعا لموضوعاتها الثقافية المختلفة ، وتبعا للفئات العمرية التي تمتد من سن الحضانة إلى سن المرحلة الثانوية .

* وأرجو أن يعرف القارئ أن الأعمال المقدمة ليست أعمالا نهائية ، وإنما هي بدايات لترجمتها إلى أغنيات أو حكايات مسموعة ..........

وما غير ذلك من وسائل التقديم .

* ولا يبقى إلا أن نتمنى من الله التوفيق لكل من يسعى من أجل تحقيق الخير للجميع .

**********

* أهلا بيكم *

أغنية للترحيب .. لحن  Jingle bells ))

أهلا بيكم أهلا بيكم ............. يا ضيوفنا يا حلوين

ندعي يارب تكونوا دايما...... دايما فرحانين

رشوا الورد رشوا الورد............ على كل الحاضرين

رشوا الورد رشوا الورد......... و معاه الياسمين

أهلا بيكم أهلا بيكم ............. يا ضيوفنا يا حلوين

ندعي يارب تكونوا دايما...... دايما فرحانين

**********

* رفرف يا عصفور *

لحن Twinkle Twinkle little stare

رفرف رفرف ياعصفـــــــــور مالك كدا لســـــــــــه صغيور .

عايزينك تكبر وتطيــــــــــــــر وتلقـّط غلــــــــــــــــه وشعير .

عايزينك تاكـــــــــــــل هم هم ماتسيبشي حاجة من المــــــم .

عايزين نسمــــــــــــع زقزقتك أول ماتجيلك مامتــــــــــــك .

ياعصفور لمـــــــا ترفـــــرف كلنا وياك حنـــصقــــــــــــف .

رفرف رفرف ياعصفـــــــــور مالك كدا لســـــــــــه صغيور .

**********

* يا خروف  *

" تعريب لأغنية Black cheeb "

- ماء ماء .

- ياخروف .... عندك حبة صوف .

- أيوه أيوه ....عندي أجمل صوف .... علشان صاحبي اللي رباني .....

يعمل منه بطانية صوف .

.......................

- كاك كاك .

- يابطة .... عندك حبة ريش .

- أيوه أيوه .... عندي أجمل ريش .... علشان صاحبي اللي رباني .....

يعمل منه مروحة بالريش .

...........................

- كك كك ... كك كك .

- يا فرخة .... عندك حبة بيض .

- أيوه أيوه .... عندي أجمل بيض .... علشان صاحبي اللي رباني .....

ياكل منه ويملا البيت .

...............................

**********

* أنا عصفور *

أنا عصفور ... دايما مسرور ... اسافر و اعود ...

ماعرفش حدود .

والأرض عندي ... كلها بلدي ... أما القفص ...

عدوي اللدود .

إن كان جميل ... أو حتى كبير ... طبعا أكيد ...

طبعا مرفوض .

**********

* صوت الموسيقى*

" تعريب لأغنية : السلم الموسيقى "

دو : .................... رى مي دو مي دو مي .

رى : ........... مي فا فا مي رى فا .

مي : فا صول مي صول مي صول .

فا : ..................... صول لا لا صول فا لا .

صول : .................. دو رى مي فا صول لا .

لا :.............. رى مي فا صول لا سي .

سي : مي فا صول لا سي دو .

دو: سي لا فا سي صول دو .

***********

دو رى مي فا صول لا سي دو.

دو سي لا صول فا مي رى دو.

**********

صول دو لا فا مي دو رى .

صول دو لا سي دو رى دو .

**********

دو : دنيتنا تبقى أحلى بالغنا .

رى : ربيـــع طـــــــول السنــــة .

مي : محبـة تملا قلوبنا كلنــــا .

فا : فرح وسعد وهنـــا .

صول : صبح ينور لنـــــا .

لا : ليالي حلمنــــــــا .

سي : سلام يضمنـــــا .

نرجع تاني لســــلم دو .

**********

دو رى مي فا صول لا سي دو .

دو سي لا صول فا مي رى دو .

**********

يا صحابي من كل مكان ......... يالا اسمعوا سحر الألحان .

الحان توصل للإنسان ............ وتعدي حدود الأوطان .

*********

يا صحابي من كل مكان ....... يالا نغني كمان وكمان .

ونقول باي باي للأحزان .......... يالا نغني كمان وكمان .

**********

* يــــــالا نغني يــــــالا نلعب *

يــــــــالا نغني يــــــالا نلعب يـــــــــالا نقرا يــــــــالا نكتب .

توتـــــــــة حتحكيلنا الحدوتــة حدوتة حلوة مش ملتوتــة .

لما تقول لنا توتـــــــة توتــــه حنقول لها عيدي الحدوتـة .

نورة حترسم عالسبــــــورة قطة جميلة بتلعب كـــــورة .

والشجرة عليها العصفــورة قرحانة بتضحك للصــــورة .

دينا تقول لنــــــــــــا يالا بينا جنينيتنا دي أحلى جنينــــة .

فيها الورد يبص علينــــــــــا وشجرها بيصقف لينـــــا .

يــــــــــالا نغني يــــالا نلعب يـــــــــــالا نقرا يالا نكتب .

**********

* هدية كتاب*

و جاتني مرة هدية كتاب .......... أنا وكتابي بقينا صحاب .

صحاب واكتر من أحباب ......... لا بينا لوم ولا أي عتاب .

في الضلمة ألقى كتابي نور ... في الزحمة ألقاه أوسع باب .

**********

* عيد الطفولة *

يا برتقـــــان أحمــــــر وجديــد عيد الطفولة دا أجمــــــل عيــــد .

يا برتقـــــان أحمــــر وجديــد يا فرحة في قلوبنــا بتزيد .

يا برتقـــــان أحمــــــــر وجديــد يا رب نلقى الكــــــــــــل سعـــيد .

يا برتقـــــان أحمــــــــر وجديــد يا بسمة نورها شمـس تقيـــــــد .

يا برتقـــــان أحمــــــــر وجديــد يا ضحكة هزت قلـب حديـــــــــد .

يا برتقـــــان أحمـــر وجديــد عيد الطفولة دا أجمـــــل عيــد .

**********

* حـــــــــــالو يا حـــــــــالو*

حـــــالو يا حــــــالو ... رمضان كريم يا حـــــــالو .

إدينا جنيه أو ربـــــع جنيه ... ندعيلك بيه يا حـــــــــــالو .

بندق أو لوز أو حبة جــــــوز... أو صوبع موز يا حـــــــــالو .

هات حبة فول عمرك حيطول ... وتعيش على طول يا حـــــالو .

حبة قراقيش أو لقمة عـــــــيش ... ما تقولش مفيش يا حــــــالو .

هات فرخة بريش تكـــبر وتعيش ... ما تزعلنيش يا حـــــــالو .

كحكــة صغيـرة حلــــوة مدورة ... حتة سكرة يا حـــــــــالو .

حــالو يا حــــــــالو ... رمضان كريم يا حــــــــالو .

**********

شعارات

* حضانة الهلال الأحمر *

لو سألوني مين بتحبه أكتر حنجاوب من غير ما نفكــــــر .

حنقول طبعـــــــــا ماما وبابا وحضانتي الهلال الأحمــــــــر .

فيها نعيش أحلــــى الأوقات ونغني ونقــــــول حكايـات .

حكايات بتعلمنا حاجــــــــات دلوقتي ولمـــــــا حنكبــــر .

لو سألوني مين بتحبه أكتر حنجاوب من غير ما نفكــــر .

حنقول طبعـــــا ماما وبابا وحضانتي الهلال الأحمــــر .

**********

* حضانة المجد *

لما العصافير يــوم سألتنــا عن أجمــــــل ورد .

قلنالها تعالي لحضــــــانتنا حضانــــــــة المجد .

ردت قالت عصفــــــورتنا حقيقــــــــــي بجد ؟

حضانة المجد دي حبيبتنا حضانــــــــــــة المجد .

**********

* مدرسة الأحرار*

بين الخضرة والأزهــــار فراشة طايرة ليل و نهـــــار .

قلنا لها إيه الأخبـــــــــار قالت خلاص أنا عقلي احتـار .

أطفال حلوة كبار وصغار في عنيــّـــه زي الأزهــــــار .

سألتهم على فين رايحين قالوا لمدرســــــــــة الأحرار .

***********

أهلا بابا محجوب

أهـــــــلا أهــــــلا بـابـــا محجوب حبك في قلوبنــــــا مكتـــوب .

حققت أحلامنـــــا الجميلـــــــــــة اللـــــــــــي كانت مستحيــــلة .

و إسكندرية في سنين قليلـــــــــة بقت عروسة في أحلــى توب .

من غير كلام من غير كتابــــــــة خليت قلوبنا تقول يا بــــابــــا .

ودا عشان كلك طيابــــــــــــــــة ودخلت يامــــــا كتيــــر قلوب .

أهـــــــلا أهــــــلا بابا محجوب حبك في قلوبنــــــا مكتـــوب .

**********

* الساحر العجيب *

بيقولوا عني ساحر...... والسحر دا شيء عجيب

مع إني بس شاطر ........... وبحب شغلتي

وعندي شنطة فيها......... كل شيء غريب

هي اللي طلعت بيها....... من كل دنيتي

**********

شنطة وفيها كتير حاجات ....... مترتبة احسن ترتيب

دي علبة مثلا ، جواها علبة ...... جواها علبة جواها فيل

وعندي أجمل عروسه لعبة ...... أسحرها تتحول مناديل

*********

ودي كوتشينة مفنطها........ بنفخة واحدة أرتبها

وف ثانية اقدر أخفيها ......... ومن جيوبكم حنجيبها

**********

ودي بالونة جميلة تفرقع .... شوفوا ايه من جواها بيطلع

أرنوب صاحي وعينه بتلمع ..... بيمشي و بيجري ويتدلع

بس ياريت تصقيفة كبيرة ........علشان انا لازم اتشجع

*********

ودي كمان أحلى عصاية ...... في كل حتة ويايا

بلمسة منها على البذرة ...... قوام حتتحول وردة

وبلمسة منها على البيضة ..... تفقس وتطلع لنا بطة

والبطة ترجع للبيضة...... واحطها جوا الشنطة

**********

دي عصايتي أحلى عصاية ....... دايما تحقق لي منايا

أفرح كمان وارقص بيها .......على الأغاني الشعبية

وأقول يا رب يخليها...... دايما عصاية سحرية

**********

وفي النهاية يا أحباب...........ماتبصوليش كدا باستغراب

السحر دا علم وتدريب............ولكل شيء أصل وأسباب

وكل شاطر في شغله ساحر..... واللي يقول غير كدا كداب

**********

* إحنا العصافير الفرحانة *

إحنا العصافير الفرحانة .. طايرين بنرفرف في سمانا .

بنغني لبلدنا الحلــــــــــــــوة ... والأرض الخضــــــــــرا المليانــــة .

إحنا العصافير الفرحانة

من خيرها بناكل ونلقـّط .... وف مايتها نهيص ونبلبط . د

وبوردها نفرح و نزقطط .... ونغنـــــــــي أجمــــــــــــــــل أغانينـــــا .

إحنا العصافير الفرحانة

يا سلام لما الصبح يشقشق ... كلنا نصحى قوام ونزقزق .

ونقـــــــــول للكسلان لأ لأ لأ ... قـــــــوم يالا وزقـــــــــزق ويانـــــا .

إحنا العصافير الفرحانة

ودي شجرة كبيرة تدفينا... وتتضمنا ويا بعضينا .

وبقشاية مع القشايـــة ...عش جميل من صنـع ايدينــــا .

إحنا العصافير الفرحانة

احنا العصافير لازم نفرح ... لما نشوف الأرض بتطرح .

والتلميذ الشـــاطر ينجـــح ... ودا كل أملنـــــــا ومنانـــــا .

إحنا العصافير الفرحانة

يا رب تزود فرحتنا ... وتعلي دايما ضحكتنا .

ونشوف كل الناس حوالينا ... دايمـــــــــا مبسوطــة و فرحانـــــــــة .

إحنا العصافير الفرحانة

**********

* إحنا الأطفال الحلوين *

إحنا الأطفال الحلويــــن إحنا الورد مع الياسميـــن .

عايزين مصر بلدنا جنينـة فيها الهوا من غير دخـــان .

عايزين كل مدينة جميلـة من غير لخبطة في الألـوان .

مش عايزين دوشة تزعلنــا عايزين أحلى غنا والحـــان .

عايزين احسن أكل ومايـة عايزين كل حياتنا أمـــان .

إحنا الأطفال الحلويـــن إحنا الورد مع الياسمـــين .

**********

* يا ورد على فل وياسمين *

يا ورد على فل وياسميــــــن الله عليك يا تمـــــــر حنــــة .

ادي وردة حلوة على عودها خدها عشان ماما في عيدها .

اوراقها دي ولا خدودهــــــا ما حلاها لو مـــــاما باستها .

والفل عقد جميل ما حـــــلاه الله علـــــــــى ريحتـــه الله .

تشوفه ماما تقــــــــــول الله الله عليــــــــــــــــه الله الله .

وادي كمان صحبة ياسميــن رقة وجمال ترتاح له العين .

ودا عشان ست الحلويــــــن تفرح وحتبوسك بوستيـــن .

والتمر حنة دا من الجنــــــة علشان مامتنا تدعيلنـــــــــا .

واحنا برضــــــاها نتهنـــــى والفرحة تكبر في عيوننـــــا .

يا ورد على فل وياسميـــــــن الله عليك يا تمـــــــر حنــــة .

**********

* أحلى هدية *

أحلى هدية شافتها عنيــــــــه زرعة صغيـــرة جوا الشاليــة .

يوم ورا يوم والاقيها بتكبــــــــر وافرح بيها اكتر واكتـــــــــــر .

قلت يا رب اشوف لهــــــا زهرة وبذور ازرع منـــــها واكتـّــر .

في كل يوم لازم اسقيـــــــــــــها واقف معاها الصبــــح شويـة .

و اقول لها يا صباح الـــخضرة واحس بيها ترد عليــــــــــــه .

و اسيبها و اروح على مدرستي و اقول لها باي باي يا حبيبتي .

توحشني وارسمها ف كراستــي واكتب عليها أحلى هديــــــــة .

أحلى هدية شافتها عنيـــــــــــــه زرعة صغيــــرة جوا الشاليـة .

**********

* حكاية الفيل المغرور*

- كان و ياما كان ... في الغابة مكان ... مليان بالأرانب .

- عايشين في أمان ... لا بيعرفوا الأحزان ... ولا حتى المتاعب .

- ياكلوا ويشربوا ... و يجروا ويلعبوا ... على ارض جميلة خضرا ... وكأنها الملاعب .

- وف لعبهم يتشاركوا.. من غيرما يتعاركوا .. والمغلوب زي الغالب .

- وف أكلهم يتقاسموا ... من غير ما يتخاصموا ... علشان أخوات و قرايب .

- ويباتوا في الجحور .. فى هنا وسرور ... زي كل الأرانب .

**********

- ولكنها كالعادة ... ما بتدومش السعادة ... في غابة العجايب .

- كان في الغابة فيل ... طبعا وزنه تقيل.. وف أول كل يوم ... لما يقوم م النوم ... يزعق و يتتاوب .

- ويمشي فرحان يتمختر .. من غير أبدا ما يفكر .. انه تحته أرانب .

- ويدوس على الجحور . ويكشفها للنور .. و تبتدي المصايب .

- أرانب متعورة .. وجحور متكسرة .. تحوم عليها صقور .. و ديابة كتير .. وتعالب .

- وأرانب قاعدة تعيط ... وفيل فرحان بيزقطط ... ويغني بقى ويقول ... كلام كدا مش معقول :

" أنا الفيل أبو زلومة ... اكبر واحد في الغابة ... ماحدش يقدر يضربني ... ماحدش يقدر يغلبني " .

**********

- راح أرنب للفيل ... قال له : ليه يا فيل ... تعمل كدا فينا ... كسرت ليه بيوتنا ... ضيعت ليه ضحكتنا ... وخليت حياتنا حزينة ... مع اننا احباب ... وجيران ومش أغراب ... وأكلنا من الأعشاب ... كلنا مع بعضينا ... ياريتك بس يافيل ... ما تعديش فوقينا ... علشان وزنك تقيل ... وكمان رجليك تخينة ... ولما تدوس على حد ... بتلزقه ف الأرض ... وتخليه عجينة .

- رد الفيل وقال : أنا فيل الأفيال ... ما سمعشي كلام عيال ... ابعدوا يالا في الحال ... وبقى يزعق ويقول ... كلامه اللي مش معقول :

" أنا الفيل أبو زلومة ... اكبر واحد في الغابة ... ماحدش يقدر يضربني ... ماحدش يقدر يغلبني " ..." روح اجري يالا يارنب .. مش عايز اشوفك تاني .. شكلك بينرفزني .. وصوتك وجعلي وداني" .

**********

- رجع الأرنب زعلان ... واشتكى للحصان .

- راح الحصان للفيل ... وقال للفيل سلام ... ما ردش السلام ... قال له : إيه يا حصان ... عايز إيه كمان .. قال له : يا فيل حرام ... تزعـّل الأرانب .

- رد الفيل وقال : يا خيبة الآمال ... إزاي يا حصان يا كبير ... تسمع كلام أرانب ... دول حاجة زي الترابة ... ويمكن قد الهبابة ... ما يستاهلوش كلامنا ... ولا نشغل بيهم بالنا .

- رد الحصان عالفيل ... وكان رده جميل ... قال له :

" إن الضمير ... هو اللي خلاني ... أسعى ف طريق الخير ... ومن غير الضمير ... يروح الصغير ... في بطن الكبير.. و ماتنساش يا فيل ... يا بو الفهم القليل ... إن كل كبير ... لازم يبقاله كبير " .

- غضب الفيل المغرور ... و اتنطط زي التور ... وبقى يزعق ويقول ... كلامه اللى مش معقول :

" أنا الفيل أبو زلومة ... اكبر واحد في الغابة ... ما حدش يقدر يضربني ... ما حدش يقدر يغلبني " .

**********

- رجع الحصان زعلان ... وحكى بالتفصيل ... كل كلامه مع الفيل ... وقال حل جديد :

" نبعت أسد شديد ... و أيديه زي الحديد ... ولما يشوفه الفيل ... حيخاف بالتأكيد " .

**********

- راح الأسد الشديد ..اللي ايديه حديد ... وقال للفيل " سلام " ... ماردش السلام .

- قال له : " يا بو الأنياب و المخالب ... ياللي دايما ... طول عمرك غالب ... جاي عشان أرانب ؟ ... دول حاجة زي الترابة ... ويمكن قد الهبابة ... مايستاهلوش كلامنا ... ولا انشغال بالنا " .

- قال له : " لا يا فيل ... يا بو الفهم القليل ... دول مخلوقات زينا ... ياكلوا ويشربوا ... ويجروا ويلعبوا ... ولما بناكل منهم ... يبقى عشان بطننا ... لكن عشان نإذيهم ... مش حنلاقيهم ... و حيهربوا مننا " .

" وآخر كلامنا يا فيل ... يا أبو الفهم القليل ... نصيحة مننا : الغابة ليها نظام ... وعشان تعيش دايما في سلام ... لازم تسمع الكلام ... ولو زعلتنا .. حتزعل مننا " .

- غضب الفيل وثار ... وعينيه بقت شرار ... وعاد نفس الكلام : " أنا الفيل أبو زلومة.. اكبر واحد في الغابة.. ما حدش يقدر يضربني ... ما حدش يقدر يغلبني " .

**********

- رجع الأسد الشديد ... وقال الفيل دا عنيد ... ما قبلش النصيحة ... و ما خافش من التهديد .

- وتمر الأيام ... و مفيش إلا الكلام ... وعناد الفيل بيزيد .

- ويدوس على الجحور.. ويغني بكل غرور :

" أنا الفيل أبو زلومة ... اكبر واحد في الغابة ... ما حدش يقدر يضربني ... ما حدش يقدر يغلبني " .

**********

- وف مرة أرنب ... صغير كان بيلعب ... وهو بيحفر حفرة ... قال : " أنا جاتلي فكرة ... نعمل كلنا حفرة ... بينا وبين الفيل ... ونغطيها ... بالقش وبالنجيل ... وان عدى الفيل عليها ... لازم يقع فيها ... ونرتاح بقى ... من هم الفيل " .

**********

- عجبت الأرانب الفكرة ... و بدأوا ف تنفيذ الحفرة ... والحفر كان بالليل ... ساعة نوم الفيل ... وبدون دوشة.. وبدون كلام ... بقى كل شيء تمام تمام .

***********

- والصبح قام الفيل ... وبفهمه القليل ... وقف قدام الحفرة ... و بص وقال :" يا سلام ... الأرض حلوة وخضرا ... و طلع النجيل قوام ... " .

- وقال كالعادة.. وبكل سعادة :

" أنا الفيل أبو زلومة ... اكبر واحد في الغابة ... ما حدش يقدر يضربني ... ما حدش يقدر .." ... و ما كملش الكلام .

- وقع الفيل في الحفرة ... وكأنه حتة حجرة ... ورجله كمان انكسرت ... و دموعه ف عينه ظهرت ... وبأعلى صوت يعيط ... ويقول الحقوني يالا طلعوني .

**********

- و بص لقى الأرانب ... حواليه من كل جانب ... فرحانة قوي بتزقطط .

- قال لهم : " يا أرانب ارحموني ... ليه بس توقعوني ... لو بس تطلعوني ... اشيلكوا جوا عيوني " .

- رد أرنب وقال : " ازاي نطلعك ... دا شيء محال ... دا انت أبو الأفيال ... و احنا يادوب عيال " .

- و أرنب تاني قال : " احنا نسيبك كام يوم ... علشان تعيش محروم ... من الآكل والنوم : .

- وغيره قال وعاد .. والفيل صياحه زاد ... يوصل لبلاد وبلاد .

**********

- و بص الحصان عليه ... ما صدقش عينيه ... إزاي أكبر حيوان ... يقع كدا و يتهان ... سمع الحصان الفيل ... بصوت ضعيف ندمان : " طلعني يا حصان ... يا أبو الشجعان ... أنا صحيح غلطان الغرور عماني ... وقعني و أذاني ... لكن الألم صحاني ... ودا وعد مني ليكو ... مش حاعمل كدا تاني " .

- رد الحصان عالفيل : " انت يا فيل غلبان ... وصحيح صعبان عليـــه ... لكن واجب عليــه ... اسمع رأي الأرانب ".

**********

- عدى الأسد كمان ... لما مشى الحصان ... سمع الفيل بيقول ... وكلامه بقى معقول :

" الحقني يا ملك الغابة ... انا صحيح غلطان ... لخبطت نظام الغابة ... اللي بقاله زمان ... وهرّبت مني الأرانب ... وحتى كمان الفيران ... ودي غلطة كبيرة مني ... داالغرور عماني ... وقعني وأزاني ... لكن الألم صحاني ... ودا وعد مني ليكو ... مش حاعمل كدا تاني " .

- رد الاسد كمان : " انت يا فيل غلبان ... وصحيح صعبان عليـه ... لكن واجب كبير عليه ... اسمع رأي الأرانب " .

**********

- عمل الأسد اجتماع ... حضروه كل الأنواع ... والكل بالإجماع ... قال : " الفيل غلطان ... لكن فيه رحمه كمان " .

- رد زعيم الأرانب : " الرحمة دي شيء واجب ... وربنا اسمه الرحمن ... لكن برضه واجب ... إننا الأرانب ... نعيش في أمان ... والفيل لو طلعناه ... وسيبناه على هواه ... ايه اللي يضمن لنا ... انه ما يرجعشي تاني.. زي ماكان " .

- رد الأسد وقال : " طلــّعوا الفيل في الحال ... و حنسمع منه وعد ... انه مايإذيش حد ... وان رجع في وعده ... كلنا حنكون ضده " .

**********

- راحت الأرانب ... للفيل تطلعه ... وربطوا رجليه ... اللي بتوجعه .. وجابوه للاجتماع ... عشان الكل يشوفه ... ويسمعه .

- وبدأ الفيل الكلام ... وبصوت ضعيف و حزين ... قال الفيل : " أنا آسف ... لكل الحاضرين ... وكنت في الحفرة خايف ... تسيبوني يوم و اتنين ... بين العقارب و التعابين ... ولكن رغم ألمي ... وندمي الشديد ... أنا حاسس اني سعيد ... وكأني اتولدت من جديد .. و اوعدكوا يا أرانب ... ويا غير الأرانب ... نعيش على طول حبايب ... ودا وعد مني أكيد .

- واشكركو كتير كتير ... على الحفرة الكبيرة ... اللي علمتني ... حاجات كتيرة ... وان ايد على ايد ... .. أقوى من الحديد ... والعدد لما يزيد ... قوته تبقى خطيرة ...

- وان كل كبير ... أكبر منه كبير ... وقوة ربنا ... هي القوة الكبيرة .

**********

* موضوعات من أجل الثقافة الزراعية *

* حواديت نباتية *

" مقدمة مقترحة لبرنامج عن الطرائف الزراعية "

اسمعوا يا ولاد يا بناويت ... يا كبار يا صغار يا كتاكيت .

حواديت ولا كل الحداويت ... طيط طيط طيط طيط .

**********

حواديت كلها شخصيات ... نباتات من كل العائلات .

من بستان وجنينة وغيط ... طيط طيط طيط طيط .

**********

يا سلام لما الزرعة الحلوة ... تنطق بالكلمة وبالغنوة .

وتقول للحلوين أنا جيت ... طيط طيط طيط طيط .

**********

جيت لكو بأخف الوجبات ... حواديت كلها معلومات .

بنوصلها لحد البيت ... طيط طيط طيط طيط .

**********

وتعيشنا ف أحلى خيال ... وتسمعنا حكم تتقال .

ماتقولشي ابدا لخابيط ... طيط طيط طيط طيط .

**********

حواديت فيها كمان البسمة ... حلوه خفيفة زي النسمة .

من غير دوشة ولا تخبيط ... طيط طيط طيط طيط .

**********

اسمعوا ياولاد يابناويت ... ياكبار يا صغار يا كتاكيت .

حواديت ولا كل الحواديت ... طيط طيط طيط طيط .

**********

* ياما اتعلمت *

ياما اتعلمت حاجـات وحاجات ........... من الزراعــــة والنباتـــــات .

**********

اتعلمت ان اللي بيزرع ... لازم يوم يجني الثمرات .

والثمرة الحلوة عشـــــان تطلع .. يلزم لهــــــــــا جهد وأوقـــــــات .

**********

في الريف سمعت كلام يتقال ... مليان حكم و كتير أمثال .

ماتقولش أبدا دا شيئ محال ... دا الزهر يطلع م الأبصال .

بعد المطر ما تلقى رياح ... بعد التعب يرتاح البال .

وكل شيئ في الكــــــــون دوار ... وكل ليـل من بعده نهــــــار .

**********

وسمعت ياما ف جو الريف ... كلام جميل وبدم خفيف .

مثل يقول ان الحداية ... مابترميش أبدا كتاكيت .

والغربــــــان ما تجيبش هدايــــا .... والفار عمره ما يزرع غيــــــط .

**********

وسمعت ياما كتير من شجرة ... حكاية طويلة بمليون فكرة .

حكاية بذرة في الهوا طايرة .............. تكبر وتصبح أكبرشجرة .

**********

شفت كمان في النخلة العالية ... طباع جميلة وأخلاق عالية .

عزة وصلابة مع الطيابــة ......... مــــاتتوصفش بأي كتابــــــــــــة .

**********

واتعلمت كتير وكتير ... من البلابل والعصافير .

إني مــــــــــــــاحبش أبقى أسير ... حتى ولــــــــــــو في قصر كبيـــر .

***********

وعلمني حمام البنية ... حب الأوطان والوطنية .

من غير مدرسة من غير كليــة ... ولا من نشيد ولا من أغنيــــــــــة .

**********

واتعلمت كتير م النحلة ... نظام لكل مدينة ودولة .

فيــــــــها الايدين كلها شغالـة .... من غير كلام وعتــــاب وقوالــــة .

**********

واتعجبت كتير من نملة ... ماشية وشايلة قدها رملة .

قلت قوام سبحان الله ... ولقيت قلبي سمى وصلى .

شفت النمل يساعد بعضة ... ما جابش خنفسا مرة تساعده .

عــــــــارف أن مفيش غيـــــر إيده .. هي اللي حتساعده وحتفيــــده .

**********

شفت كمان بالميكروسكوب ... مخاليق تانية أمم وشعوب .

خلايا حية رايحة وجاية ... والمترصصة زي الطوب .

كلها بتقول للإنسان ... بص كمان دا الكون مليان .

وما يبقاش نظــــــرك محــــدود ... دا العقــل ما بيعرفش حــــــدود .

**********

علمني زهر البستان ... التنسيق بين الألوان . والألوان مهما بتتخـــاصم ... تتصـــــــــــــالح بادين فنــان .

**********

واتعلمت من الصبار ... إن الجمال دا له أسرار .

وشفت في زرع الصبار ... معاني أجمل م الأشعار .

الصـــــــــــبر حـــــــلو مع الإصـرار ... لكنه ويا الضــــــــعف مرار .

**********

ولســــــــه باتعلم ف حاجات ........... من الزراعـة والنباتـــــــات .

**********

* الزراعة معنى كبير *

هي زراعة أمل ..... نرويها بالعمل ... وثمارها كل الخير .

**********

هي حصن البلاد … ضد الاستعباد … والخضوع للغير .

بتحمي الاقتصاد … من كتر الاستيراد … وقلة التصدير .

هي طريقة إصلاح .. وبدونها أي سلاح .. مالهوش أبدا تأثير .

**********

فيها الجمال ماحلاه ..عشان من صنع الله .. وطبيعي بدون تزوير.

**********

بتعلم الإنسان… إزاي يكون فنان … وروعة التعبير .

بمنظر في البستان .. أو بسلوك حيوان .. وزهور وعصافير .

وتنشط الوجدان … وتزود الإيمان … وتصحي كل ضمير .

**********

وتخلي الفكر يقوم … من الثبات والنوم … للبحث والتطوير .

وتوظف العلوم … في كل لحظة ويوم …في حاجات كتير وكتير ..

خضر وكمان محاصيل … والزينة والتجميل … والطب والتعطير .

وماشية وغنم ودواجن. وأخشاب للمساكن.وقطن وصوف وحرير .

**********

وهي كمان ثقافات .. بتبني الشخصيات .. بعلم وفن غزير .

ونقلت البشرية … من الحياة البرية ... لبداية التعمير .

وبداية الانتماء … والحب والوفاء ... للوطن الكبير .

**********

راسمالها ماية وأرض . وعزيمة مالهاش حد . مش أموال بس تطير .

و مافيش أبدا حد … يمنع كرم الأرض … وخيرها الوفير .

**********

هي الحياة كلهــــــــا … ولازم نقدم لهــــا …الحب والتقديـــر .

**********

* ملكة النحل *

صباح الخير عليكو ... صباح العسل

أنا ملكة الملكات ... في عالم الحشرات ...

من طبعنا النشاط ... وبنكره الكسل .

وعندي الشغالات ... ياما كتير ألوفات ... بيقســــــموا العمل .

اللي يسافروا المسافات .. للبساتين والغابات ..

ويجمعوا في الرحيق وحبوب زي الدقيق ... و مايعرفوش ملل .

واللي بيبنوا العيون ... بهندسة وفنون ... لتخزين العسل .

واللي بيحموا الخلية.. ويموت منهم ضحية..

من أجل حياه كريمة ... وتحقيق الأمل .

وبيطعموا الصغار ..علشان يبقوا كبار .. والاجيال تتوصل .

والخير يكتر ويكتر .. والكون يعمر ويعمر .. والفرح يكتمل .

وف آخر الكلام ... لازم نقول سلام ...

ويارب تكونوا دايما .. دايما زي العسل .

**********

* محادثة عن زهرة المرجريت *

* بائعة الورد : ياورد على فل وياسمين .. الله عليك يا تمرحنة .

- المشتري : انتي يا حلوة الحلوين ... يابتاعة الورد والياسمين ... زهرتنا النهارده إيه ؟ ... وحنهديها لمين ؟

* بائعة الورد : زهرتنا النهارده المرجريت ... وبنهديها ... لست البيت ... اللي بتحب بيتها ... زي حياتها ... وبتديه أغلب اوقاتها .

- المشتري : بتقولي زهرة المرجريت؟ ياريت تحكيلنا عنها ياريت .

* هي نورة ... بنورها الاصفر ... نجمة في الصبح تنور .

- بالتأكيد دي زهرة عظيمة .

* أيوه صحيح هي عظيمة ... واسمها اللاتيني ... مريم العظيمة .

- " ماري جريت " ... اسم جميل سهل على لساننا ... يالا احكيلنا ...عنها احكيلنا .

* عيلتها كبيرة أنواعها كتيرة ... فيها الزهرة نورة ... زي القرص .

- الزهرة نورة زي القرص ؟ ... تبقى عيلة عباد الشمس .

* ايوه عيلة عباد الشمس ... انواعها عشبية وبس .

- سمعنا كتير كلمة عشبية ... ياريت تقوليلنا ... يعني ايه عشبية ؟

* يعني سيقانها طرية ... زي قرون الفاصوليا .

- قصدك المرجريت عشبية ...عشان سيقانها طرية ؟ ... لكن قوليلنا ياترى ... هي زرعة معمرة ؟

* ابدا ابدا ... دي حياتها قصيـّرة ... في الشتا مخضـّرة ... وفي الربيع مزهرة .

- في الشتا مخضـّرة ؟ ... وفي الربيع مزهـّرة ؟ تبقى أكيد حولية شتوية .

* ايوة ايوة ... بالظبط هي ... زرعة حولية شتوية ... نوراتها رخيصة و شعبية ... وبنملا بيها الزهرية ... وبذورها ياماكترها ... الهوا يطيرها ... وينشرها ويبدرها .

- معنى كدا انها برية ؟

* أيوه زرعة برية ... طورها الانسان ... وزرعها ف كل مكان ... في جنينة أو بستان .

- شكرا شكرا ... يابتاعة الورد ... كلامك خلاني حبيت زهرة :

* المرجريت .

**********

* محادثة عن الخطمية *

* بائعة الورد: يا ورد على فل وياسمين .. الله عليك يا تمر حنة .

- المشتري : انتي يا حلوة الحلوين ... يا بتاعة الورد والياسمين ... زهرتنا النهارده إيه ؟ ... وحنهديها لمين ؟

* بائعة الورد : زهرتنا الخطمية ... وبنهديها ... للطالبة المثالية ... الشاطرة ف دراستها ... وغنية بثقافتها .

- المشتري : بتقولي إيـــــــــــــه ؟ ... زهرة الخطمية ؟

* بائعة الورد : أيوه بالظبط هـــــــــــي .

- المشتري : طب احكيلنا شوية ... عن زهرة الخطميـــــــــــــــة .

* زهرة كبيرة مدورة ... ومش معنقة .

- مش معنقة ؟ ... طب ازاي نقطفها بقـــــــــــــى ؟

* وليه نقطفها ؟ ... كفاية نشوفها ... ونمتع عينينا ... بشكلها في الجنينة .

- قصدك تقولي إنها ... زهرة ممنوع قطفها ؟

* أيوة عشان قيمتها ... وهي على زرعتها .

- طب احكيلنا شوية ... عن زرعتها .

* هي زرعة طويلة ... معروفة برشاقتها ... وتدويرة ورقتها ...

الشتا بينبتها ... والصيف بيموتها .

- قصدك تقولي ... إنها حولية ؟

* أيوه حولية شتوية ... وزهورها دايما ربيعية ... ما تبصش فوقها أبدا ... وتبص جنبها ... وعشان كده ... الناس تحبها ... عشان جمالها ... وجمال طبعها .

- حلوة قوي الخطمية ... ويا ترى زراعتها ... دايما بسهولة ؟.

* أيوه زراعتها بسهولة ... بالظبط تمـــــــــــــام ... زي الفولـــة .

- شكرا شكرا يا أمورة على ...

* زهرة الخطميــــــــــــــــــــــة .

**********

* محادثة عن عصفور الجنة *

*بائعة الورد: يا ورد على فل وياسمين .. الله عليك يا تمر حنة .

- المشتري : إنتي يا حلوة الحلوين ... يا بتاعة الورد والياسمين ...

زهرتنا يا حلوة إيــــــــه ؟ ... و حنهديها لمين ؟

* بائعة الورد : زهرتنا عصفور الجنة.. وبنهديها لأهل الجنة..

اللي وهبوا حياتهم.. لفعل الخير.. وشافوا سعادتهم.. في سعادة الغير .

- المشتري : أكيد دي زهرة عظيمة ... وليها أكبر قيمة ...

بتقولي زهرة إيـــــه ؟

* زهرة عصفور الجنة .

- زهرة عصفور الجنة ؟ ... طب احكيلنا ... عنها احكيانا .

* هي نورة كبيرة فيها كل الألوان.. وكأنها عصفورة بتزين الأغصان.

جناحاتها كتير كتير .. لكن مش بتطير .

- على كده نورة العصفور.. من أجمل الزهور .

* أيوة طبعا جميلة .. بالشكل وبالألوان .. وبمعناها كمان .

- عصفور الجنة ؟.. جمال في المعنى ؟.. احكيلنا عنها احكيلنا .. وياريت توضحيلنا .

* فيها أجمل تعبير.. عن قوة وعن ثبات.. وكأنها ملك كبير.. في عالم النبات.. وكفاية لما نشوفها.. بتقول سبحان الله.. خالق كل شيء.. في الكون وفي الحياة .. وكأنها زهرة جميلة .. من زهور الجنة .

- شكرا شكرا شكرا ...على ...

* نورة عصفور الجنة .

***********

* محادثة عن الكريزانتيم *

* بائعة الورد: يا ورد على فل وياسمين .. الله عليك يا تمر حنة .

- المشتري : انتي يا حلوة الحلوين ... يا بتاعة الورد والياسمين ...

زهرتنا النهارده إيه ؟ ... و حنهديها لمين ؟

* بائعة الورد : زهرتنا كريزانتيم ... وبنهديها... للتاجر الأمين ...

اللي كلمته ووعده أهم من الملايين .

- المشتري : بتقولي كريزانتيم ؟

* أيوه كريزانثيمـــــــــم ... واختصارها كريزانتيم .

- طب احكيلنا عنها ... ياحلوة الحلوين .

* هي نورة شفناها ... في رحلة طلعناها ... لمعرض الخريف .

- هو فيه معرض ... زهور في الخريف ؟

* أيوه حقيقة ... مش تخاريف ... زهرتنا نورة ... تنور الخريف ...

بالندى مندية ... وعلى كل شكل ولون ...

وكأنها جاية هدية ... من الــه الكون ...

صغيرة وكبيرة ... ومنها كمان بنبون .

- و ياترى الكريزانتيم ... زراعتها سهلة ؟

* أيوه زراعتها سهلة .... بالخلفة أو بالعقلة .

- شكرا يا حلوة الحلوين ... على زهرة ...

* الكريزاتنيم .

**********

* محادثة بين الوردة و الياسمينة *

- الوردة : صباح الخير يايا سمينة .

* الياسمينة : صباح النور يا وردة ... ازيك النهاردة ؟

- الوردة : الحمد لله انا فرحانة ... بخدودي الحمرا المليانة ...

أما انتي يايا سمينة ... مالك بيضا و ضعفانة ... باين عليكي تعبانة .

* الياسمينة : ليه بقى يا ترى ... علشان يعني صغيرة ؟ ... أكيد يا وردة ...

أكيد انتي غلطانة .

- يعني أنا زنبي ... إنى عايزاكي جنبي ...

تباني في الجنينة ... وتشوفك عينينا .

* أنا ياسمينه ... رقيقة ومش تخينة ...

وثابتة وجودي ... بجمال عودي ...

ولوني الهادي ... زي حمام السلام ...

اما انتي يا وردة ... حقيقي جميلة لكن عنك أشواك ...

وباين عليكي ... بتحبي العراك .

- صحيح يايا سمينة... أنا عندي كتير أشواك ... لكن مش للعراك ...

لكنها أشواك تحميني ... من كل اللي يعاديني ...

أما انتي يايا سمينة... زهرة يا عيني مسكينة ...

وبيعملوكي عجينة ... لإنتاج العطور .

* في الحقيقة يا وردة ... مهما اختلفنا... أو حتى اتخقانقنا ...

إحنا اتخلقنا ... كلنا زهور ...

وحكمة ربنا ... نعيش إحنا كلنا ... في خدمة الإنسان ...

بإرادة الرحمن ... خالق الكون ... والأكوان .

***********

* حكايتي مع الزمان *

" يرويها السمان "

- أنا السمان ... من عيلة الفزان ... وجدودي عاشوا زمان ...

في الصين وفي اليابان .

- وتمر السنين ... آلاف وملايين ... ويزيد انتشارنا ... في كل مكان .

- وتكتر شهرتي ... والسر ف هجرتي ... اللي حيرت الإنسان .

- إزاي أنا السمان ... نقدر على الطيران ...

ونعدي البحار ... طاير ليل ونهار ،

مع إن نظري ضعيف ... ووزني مش خفيف ... و ما ليش ديل كمان .

- ورغم شباك الصيد ... والمليون شهيد ...

أكمل رحلتي ... بمشيئة الرحمن .

- أصيف في الشمال ... واشتي في الجنوب ...

وعمري أبدا أبدا ... ما اقول أنا تعبان .

- وزمان ويا ماحلى زمان ... ما كانش حد منا ... يقبل يعيش أسير..

في قفص صغيـــــّــــر ... أو حتى كبير .

**********

- وتمر السنين ... آلاف وملايين ...

وفي القرن العشرين ... عصر العلم والآلات ...

ظهرت سلالتنا ... وغيرها كتير سلالات .

- قلنا ليه هجرتنا ... اللي غربتنا ... في كل البلدان .

- اشمعنى الدواجن ... ليها مساكن ... و عايشين في أمان .

- لا يشوفوا صقور ... ولا غربان .

**********

- ونسينا طبيعتنا.. وإننا سمان ... ورضينا بالمزارع ...

وأعلاف المصانع .

- ناكل كتير ونشرب .. من غير ما نطير ونتعب ..

ونزيد في الأوزان .

- ويزيد بيضنا ... لكن مراتتنا ... بطلت رقاد .

- و إيه بس يعوضنا عن فرحتنا ... بخلفة الأولاد .

- ويضيع عمرنا ... في أول شهرنا ... ويملا لحمنا.. أحلى الوجبات .

- وشوية مننا.. يستنوا سنة.. ويعيشوا ف هنا ... أزواج مع زوجات .

- وبيضهم الجميل ... تاكل منه وتشيل ...

وتقزقز منه كتير ... في كل الوجبات .

- وكمان ممكن يتملح ... زي المخللات .

**********

- ونرجع تاني نقول ... إحنا السمان ... برضه مهما كان ... في حياتنا أحزان ... نرجع للإيمان ... وندعي ربنا ... يرحمنا كلنا.. إحنا والإنسان .

إمضاء :

طائر السمان

**************

فوازير عن النباتات **

 ( 1 )

الأرض كتاب ... بيعلم الفلاح ... إن الحياة ... عايزالها كفاح .

وان الدروع ... يلزمها سلاح .

والصبر مسيره يطرح ... وثماره هي النجاح .

والقشرة مهما حتجرح ... لازم في يـــوم تنــزاح .

**********

الحل هو :التين الشوكي

وهو نبات شوكي صحراوي المنشأ ، تحورت فروعه إلى أعضاء لتخزين الماء ، واتخذت أشكالا درعيه تخرج منها الأشواك ، كما تخرج منها أزهار صفراء كبيرة ثم ثمار حلوة الطعم تحتوي على كمية كبيرة من البذور .

ويزرع التين الشوكي في بعض الحدائق والبساتين كأسوار مانعة ، ولعمل منظر خلفي جميل في جبلايات الصبارات .

**********

( 2 )

رسالة با قولها ... لكل البني آدمين . من شجرة عتيقة ... وجزعها متين :

فاكرين لما كنتوا ... لسه صغيرين ... واضمكم بضللي ... وتبقوا فرحانين .

وتاكلو من ثماري ... وتقولوا عليها تين .

ياريت تكــــــونوا فاكـريــــــــن .

**********

الحل هو: نبات الجميز

وهو نبات يصل إلى أحجام كبيرة ، وتتميز شجرة الجميز بالمجموع الخضري الغزير واستدامة الخضرة ، والجزع السميك ، الذي يعتبر مضربا للأمثال عن البدانة ، وثماره تشبه ثمار التين .

ومن الامثال الشعبية عن الجميز ( جمز بالجميز لحد ماييجي التين ) ويوضح هذا المثل أن الجميز يثمر قبل التين .

*********

( 3 )

من جوا البستان ... من حبة سمرا طيبة ... على غصن الأغصان .

بابعت رسالة ... لبني الإنسان ... في كل عصر وكل مكان :

ليه نسود قلبنا ... بالكره وبالخصام ... ليه نحارب بعضنا ...على ارض السلام ...

لو يرجع حبنا ... ويحكمنا عقلنا ...

يتبدد الظلام ... و يرفرف الحمـام ... على غصن الأغصـان .

*********

الحل هو : نبات الزيتون

من نباتات الفاكهة ، ولثماره قيمة غذائية عالية ، واللون الداكن في الثمار يعني تمام النضج ، وتجود زراعته في الأرض الصفراء .

ولزيت الزيتون قيمته الغذائية ، ويستعمل أيضا لدهان الشعر ، ولصناعة الصابون الفاخر .

ولنبات الزيتون مكانته الكبيرة عند الإنسان ، لذكر اسمه في القرآن الكريم ، وأغصانه التي اتخذها الإنسان رمزا للسلام .

**********

* كلمة ختام *

مما لا شك فيه أن النصوص الغنائية .. كأي منتج في الحياة الإنسانية .... ترتفع قيمته كلما ازداد الإقبال عليه ، وازداد التعامل معه ، وتقل قيمته كلما ظل مركونا على الرفوف وحبيسا بين الصفحات .

و أتمنى أن تجد هذه النصوص طريقها إلى المتلقي عبر الوسائل العديدة .... إلقاء .. غناء .. تمثيل .. أو غير ذلك .

وأنني ارحب بأي تعديل يناسب الوسائل المختلفة للتقديم .. وبحيث لا يؤثر سلبا في المضمون الأساسي للنص .

و أتمنى أن تترك النصوص المقدمة أثرا طيبا في ذاكرة المتلقي ، وان تتحقق منها الأهداف التعليمية والتربوية التي دفعتني وتدفعني دائما إلى الكتابة .

و أدعو الله أن يوفقنا جميعا ويهدينا إلى كل ما فيه الخير لكبارنا ، ولصغارنا ، ولأطفالنا الأحباء .

**********

* المؤلف في سطور *

تقديم : الشاعر الأستاذ / السيد الخشاب

رئيس رابطة الزجالين وكتاب الأغاني .فرع الإسكندرية

* علاء الدين محمد عبد العليم من مواليد الإسكندرية ومقيم بها .

* حاصل على بكالوريوس زراعة ، ودبلوم الدراسات العليا في التربية.

* يعمل حاليا وكيل بمدرسة أبيس الإعدادية بإدارة شرق التعليمية بمحافظة الإسكندرية

* عضو باللجنة الثقافية بالنادي المصري السكندري .

* عضو في رابطة الزجالين وكتاب الأغاني .

* يشارك في الأعمال الاجتماعية والفنية بتدريب الأطفال على الموسيقى والغناء في جمعية الهلال الأحمر، وجمعية الشبان المسيحيين ، وجمعية الكشافة البحرية ، والعديد من الحضانات الأهلية .

* تم اعتماده باتحاد الإذاعة والتليفزيون مؤلفا للنصوص الغنائية .

* شارك في إعداد وتقديم برنامج " العصافير كبرت " بتليفزيون الإسكندرية .

* نشرت له الكثير من الأعمال الأدبية في العديد من الصحف والمجلات .

* حصل على الكثير من شهادات التقدير في ندوات ومهرجانات الشعر .

* صدرت له : فوازير نباتية ... حواديت نباتية ... الوقت من دهب ... أمثال و أقوال زراعية ... وقريبا : " العم صابر "

السيد الخشاب

**********

* المحتويات *

..............................

حقوق الطبع محفوظة للمؤلف

بدار الكتب والوثائق القومية

رقم الإيداع 18743 / 2004

" ولأطفالنا الأحباء "

*************

للمراسلة والاتصال

علاء الدين محمد عبد العليم

1ش محمد نجيب . سيدي بشر . الإسكندرية

16ش مصطفى محمد حافظ . محطة الرمل . الإسكندرية

ت : ( 5567689 - 0122745210 )

alaamohamed844@hotmail.com

alaa488@yahoo.com

alaa4488@gmail.com

*****

(( اصدارات سابقة ))

فوازير نباتية

حواديت نباتية

الوقت من ذهب

أمثال وأقوال زراعية

غرابيـــــــــل

(( وقريبا بإذن الله ))

العــــم صـــابر