اهم حكاية
كتير افكـّـر وكتير ادوّر ... على كل بداية .
وفي النهاية ارجع متحيـّر ... والاقي كل نهاية بداية .
وابص للسما ومجراتها ... وكل مادة ومكوناتها
نجومها زي الكتروناتها ... كلها دوّارة وجرّاية
والكل فضاء جوا فضاء ... جمادات كانت أو احياء
وزمان كان فيه زمان ومكان ... والأشياء كانت اشياء
دلوقت كله بقى زمكان ... وكتير اشياء لا اشياء
تتشاف اصغر تتشاف اكبر ... كلها من احساس انسان
بيشوف كل كبير وصغيـّـر ... رايح وجاي للّانهاية .
والإنسان بين الكون اصغر ... لكنه كبير لما يفكـّر-
ويحس ويغير ويطوّر ... مايعترفش باي نهاية -
علشان كل نهاية بداية ... والدنيا دوارة وجراية
والاشياء زي الأحداث ... كلها عند الناس احساس
واللي مايتحس باحساس ... مالهوش وجود ولا اي اساس
والعقل سيد كل الحواس ... واهم ميزة واختصاص
وهدية علشان الإنسان ... من خالق الكون والاكوان
الخالق الاعظم والأقدر ... هو اللي اكبر من اللانهاية
هو الحقيقة اللي ما تتغير ... ومفيش غيرها اهم حكاية
ليست هناك تعليقات:
إرسال تعليق