فوازير عن الاشخاص

* فزورة عن الشاعر " السيد الخشاب " *
فزورتي شخص من الأشخاص .. في قلبي له حب و إخلاص .
اسمر وقلبه زي الفل ... مليان محبه لكل الناس .
ملامحه مابتعرفش الغل .. والبسمه على وشه بتتباس .
أشعاره مفهومه للكل .. فيها الجمال فيها الإحساس .
*************
تسألني دا غني ولا فقير ... أقول رصيده قلوب الناس .
وعنده أجمل رباعيات ... كلامها مترتب بمقاس .
وتسمعه يقولها بتأني ... تقول أكيد أنه بيغني .
****************
عزيز ف طبعه وكريم وجيد .. واسمه جوا ف قلوبنا سيد .
سيد بذوقه سيد بأدبه ... وحقيقي سيدنا وتاج الراس .

**********
* فزورة عن الشاعر " عادل سند " *
فزورتي عن انسان انسان .... اسكندراني من الجدعان .
نحيل قوامه وطويل كمان ..... وفي الزجل فنان فنان .
*************
أصيل واصله عليه يبان .. دخل قلوبنا اخد مكان .
وصوته بين الألوف يبان .... كأنه من ثروة بركان .
************
في الحق عنده أطول لسان .. وفي المحبة يفيض حنان .
عمري ماشفته ف يوم هيمان ... من ضحكة أو هزة فستان .
************
وشال همومه قبل الأوان ... عشان يقدمها ف ديوان .
والناس تحبه وده عشان ... في طبعه دايما الاتزان .
والعدل عنده هو الميزان .. وفي الشدايد سند أمان .

************

* فزورة عن الشاعر د محمد شكري *
دكتور بأخلاقه وبعلمه .. وباحترامه لكل الناس .
وسيم بشكله .. حكيم بعقله .. مظهر وجوهر زي الماس .
في الشعر فارس .. موهوب ودارس .. ممتاز واكتر من ممتاز .
كلامه دافي .. بلسم وشافي .. من قلب صافي .. زي الازاز .
في كل ندوة .. أستاذ وقدوة .. وشوية لما نقول أستاذ .
*************
مش بس شاعر .. دا بحر واعر ... عايز له ولا مليون غواص .
بحر الثقافة .. بحر الفنون .. بحر المحبة والاخلاص .
فصيح لسانه ... مظبوط ميزانه .. يوزن معاني قبل الحروف .
طبيب يداوي . كل البلاوي .. بكلمة حلوة تسوى الألوف .
ياريت الاقي كلمة تعبر .. عن احترامي وشكري ليه .
لكن شكري . دا مش كفاية ... دي بس كلمة تدل عليه .
***********

* فزورة عن الفنان صلاح جاهين *
بسم الله حنقول الفزورة .. انسان وفي قلوبنا له صورة .
بفنه ساكن أعلى المساكن ... فنان وشامل حقيقي نادر .
رسام وشاعر مليان مشاعر ... الثورة طبعه وكلامه ساخر .
*************
وفي الصحافة يترك علامة . مع ان قوله ما كانش ياما .
وهي رسمة ويا ابتسامة ... مفعولها كان زي البرشامة .
اسلوبه دايما بسيط وساهل ... وشغله باقي زي الجواهر .
************
ومين ماشافشي أجمل ليلة ... وغنوة للريس حنتيرة .
تسمعها منه... تقول كأنه ... مولود ف مولد ... وعاش ف حارة .
قدر يخلي للصورة غنوة قدر ...قدر يخلي للغنوة صورة .
عرفتوا بقى مين صاحب الصورة ... اللي حكيتهالنا الفزورة .
***********

* فزوره عن الشاعر سمير إدريس *
فزورتي ولا كل الفوازير ..انسان حقيقي مقامه كبير
**********
في الشعر كل كلامه جميل .. إن قال كتير أو حتى قليل
ومهما قلت كتير وكتير .. ماقدرش أبدا عالتعبير
*********
وكفاية انه ف قصر ابوقير.. أمير حقيقي وطبعه أمير
والكل بيقول له يا أمير .. ويحلوا فزورة الفوازير
**********
فزوره سهله قوي ومحلوله .. وحلها أستاذنا سمير
هو اللي حنقدمله الليلة .أطيب تحية مع التقدير
**********