* سواق التاكسي*
كلمة باقولها للسواق .. اللي ما يعرفش الأخلاق .
********
سواق تاكسي ينقي الناس.. بدون ضمير وبدون إحساس .
(( دي واحدة حلوة مفيش مانع ... ودي وحشة لازم تتداس .
ودا طلب آخر الشارع ... أشيله أنا عالعين والراس .
خواجة دا وياريت ناخده ... فلوسه حلوة أكيد تتباس .
أما ابو عكاز ربنا ياخده .. مافيش وراه غير وجع الراس )) .
********
(( عجوزة دي حتعطلنا ... ومش بعيد ونش يشيلنا ...
يفيدنا ايه لو تدعيلنا ... وفي الحساب حتزعلنا .
دي واحدة شكلها غلبانة... قال ايه ورايحة زعربانة .
روحي الشئون لجتماعية ... جايز ينوبك عربية .
ناخد بدالها سعادة البيه ... العز باين جوا عنيه )) .
********
(( ودا خطيب ويّـــا خطيبته... يدفعلي طبعا من غير ليه .
أما التخينة ما تنفعشي ... واكلالها كام حلة محشي ...
دي لو حتقعد عالكرسي ... التاكسي يحلف ما حيمشي )) .
********
(( عيان ياعيني بيتسند .. يمكن يموت في العربية .
لو مات بقى مين يحاسببني .. يوم القيامة الضهرية ؟ ))
********
(( واللي يشاورلي بعياله .. ماعرفش ايه خيّب حاله .
لو كان لوحده لوصلته .. يستاهل اللي بيجراله )) .
********
(( كمان دي حامل وحتولد .. ومعاها راجل وولية .
لا دول تلاتة ماينفعشي .. حيبقوا كام بعد شوية )) .
(( ودا احترت أنا ف امره .. أركبه وأمري لله .
لو كان حكومة أأمن شره.. ولو زبون يبقى كسبناه )) .
********
أما الحساب آه منه حساب .... والقصد أقول آه منه عذاب .
مشوار وعايز بس جنيه.. ولما تدفع خمسة جنيه .
تقف ذليل قدام الباب ... تستنى الباقي جنيه ف جنيه .
وغير كلام مالهوش لزمة ... أكيد أكيد حترد عليه .
واللي يقوللك : (( روح امشي ... والباقي عمره ماحيغنيه .
ونصيحة تبقى معاك فكة ... ربنا يكفيك شر العركة )) .
الحل ياناس مش فكة .. الحل ياناس الأخلاق .
وهي دي سر الازمة... بين الزبون وبين السواق .
*********
يمكن الاستماع من هذا الرابط
يمكن متابعة كتاب الحياة كلمات
ليست هناك تعليقات:
إرسال تعليق