((((( من كتاب ولأطفالنا الأحباء ))))
* مقدمة *
* خلق الله الإنسان كائنا ناطقا ، وأن احتياج الإنسان إلى التحدث إلى الآخرين لا يقل أهمية عن احتياجاته المادية المعروفة مثل الغذاء والهواء .............. وغير ذلك .
* والطفل كإنسان في مرحلة التكوين لابد وان ينل احتياجاته الخاصة من كل شيء قدرا و نوعا .
* وأرجو أن يعرف القارئ ... أولا ... أن سبب اهتمامي بالكتابة للطفل هو حبي للطبيعة التي خلقها الله ، وخوفي الدائم على كل شيء طبيعي من عوامل التغير والتلوث ، ورأيت الطفل أمامي قطعة ثمينة من الطبيعة النظيفة ، فحاولت بكتاباتي أن أفعل شيئا ... ولو قليلا ... من أجل المحافظة على براءة الطفولة ونقاوة المشاعر الطبيعية.
* وقد يرجع اهتمامي بالطفل أيضا إلى اقتناعي الكامل بأن جميع المشكلات التي يمر بها المجتمع ترجع أساسا إلى أخطاء في التربية ، وان تكريس الجهد للتربية الصحيحة للنشء هو أكثر جدوى من كل الحلول المؤقتة .
* والكتاب الذي حرصت على تقديمه في هذه المرة هو تجميع لمؤلفات نشرت في إصدارات سابقة ، مع قليل من الإضافة ، وذلك من اجل تقديمها للمربي لتوصيلها إلى الطفل بعد اختيار المناسب منها لطبيعته وثقافته و مرحلته العمرية ، حيث أن الأعمال المقدمة متنوعة تبعا لموضوعاتها الثقافية المختلفة ، وتبعا للفئات العمرية التي تمتد من سن الحضانة إلى سن المرحلة الثانوية .
* وأرجو أن يعرف القارئ أن الأعمال المقدمة ليست أعمالا نهائية ، وإنما هي بدايات لترجمتها إلى أغنيات أو حكايات مسموعة .......... وما غير ذلك من وسائل التقديم .
* ولا يبقى إلا أن نتمنى من الله التوفيق لكل من يسعى من أجل تحقيق الخير للجميع .
***********
يــــــالا نغني يــــــالا نلعب *
يـالا نغني يالا نلعب يـالا نقرا يالا نكتب .
توتــة حتحكيلنا الحدوتة حدوتة حلوة مش ملتوتــة .
لما تقول لنا توتـة توتـه حنقول لها عيدي الحدوتـة .
نورة حترسم عالسبـورة قطة جميلة بتلعب كـورة .
والشجرة عليها العصفورة فرحانة بتضحك للصـورة .
دينا تقول لنا يالا بينا جنينيتنا دي أحلى جنينــة .
فيها الورد يبص علينــا وشجرها بيصقف لينـا .
يالا نغني يالا نلعب يـالا نقرا يالا نكتب .
***********
حـــــــــــالو يا حـــــــــالو*
حــالو يا حـالو ... رمضان كريم يا حالو .
إدينا جنيه أو ربـع جنيه ... ندعيلك بيه يا حـالو .
بندق أو لوز أو حبة جـوز... أو صوبع موز يا حـالو .
ترمس أو فول عمرك حيطول ... وتعيش على طول يا حالو .
حبة قراقيش أو لقمة عـيش ... ما تقولش مفيش يا حالو .
هات فرخة بريش تكـــبر وتعيش ... ما تزعلنيش يا حالو .
كحكــة صغيـرة حلــــوة مدورة ... حتة سكرة يا حالو .
حالو يا حالو ... رمضان كريم يا حالو .
**********
حضانة الهلال الأحمر
شعار حضانة الهلال الأحمر- باكوس - بالاسكندرية
لو سألوني مين بتحبه أكتر حنجاوب من غير ما نفكــر .
حنقول طبعــا ماما وبابا وحضانتي الهلال الأحمـر .
فيها نعيش أحلى الأوقات ونغني ونقـول حكايـات .
حكايات بتعلمنا حاجـات دلوقتي ولما حنكبـر
لو سألوني مين بتحبه أكتر حنجاوب من غير ما نفكر .
حنقول طبعـا ماما وبابا وحضانتي الهلال الأحمـــــــر .
*****************
أهلا بابا محجوب *
تم تأليفها ترحيبا بمحافظ الاسكندرية أثناء افتتاح حضانة تابعة للهلال الأحمر - فرع كرموز - بالاسكندرية .
أهـلا أهــلا بـابـا محجوب ... حبك في قلوبنا مكتــوب .
حققت أحلامنـا الجميلــة ... اللـي كانت مستحيلة .
و إسكندرية في سنين قليلة ... بقت عروسة في أحلى توب.
أهـلا أهــلا بـابـا محجوب ... حبك في قلوبنا مكتــوب .
من غير كلام من غير كتابـة ... خليت قلوبنا تقول يا بابا .
ودا عشان كلك طيابـة ... ودخلت يامـا كتيــــر قلوب .
أأهـلا أهــلا بـابـا محجوب ... حبك في قلوبنا مكتــوب .
**********
* الساحر العجيب *
تم تأليف هذه الكلمات لعرض عرائس الكف في الحضانات ، ويمكن تصميم رسوم متحركة له
بيقولوا عني ساحر... والسحر دا شيء عجيب
مع إني بس شاطر ... وبحب شغلتي
وعندي شنطة فيها... كل شيء غريب
هي اللي طلعت بيها... من كل دنيتي
**********
شنطة وفيها كتير حاجات ... مترتبة احسن ترتيب
دي علبة مثلا ، جواها علبة ... جواها علبة جواها فيل
وعندي أجمل عروسه لعبة ... أسحرها تتحول مناديل
**********
ودي كوتشينة مفنطها... بنفخة واحدة أرتبها
وف ثانية اقدر أخفيها ... ومن جيوبكم حنجيبها
**********
ودي بالونة جميلة تفرقع .. شوفوا ايه من جواها بيطلع
أرنوب صاحي وعينه بتلمع . بيمشي و بيجري ويتدلع
بس ياريت تصقيفة كبيرة ..علشان انا لازم اتشجع
*********
ودي كمان أحلى عصاية .. في كل حتة ويايا
بلمسة منها على البذرة .. قوام حتتحول وردة
وبلمسة منها على البيضة .. تفقس وتطلع لنا بطة
والبطة ترجع للبيضة.. واحطها جوا الشنطة
**********
دي عصايتي أحلى عصاية .. دايما تحقق لي منايا
أفرح كمان وارقص بيها ..على الأغاني الشعبية
وأقول يا رب يخليها.. دايما عصاية سحرية
**********
وفي النهاية يا أحباب...ماتبصوليش كدا باستغراب
السحر دا علم وتدريب...ولكل شيء أصل وأسباب
وكل شاطر في شغله ساحر... واللي يقول غير كدا كداب
***********
إحنا العصافير الفرحانة *
نص تم اجازته باتحاد الاذاعة والتليفزيون بالاسكندرية
إحنا العصافير الفرحانة ... طايرين بنرفرف في سمانا .
بنغني لبلدنا الحلوة ... والأرض الخضـرا المليانـة .
إحنا العصافير الفرحانة
من خيرها بناكل ونلقـّط ... وف مايتها نهيص ونبلبط .
وبوردها نفرح و نزقطط ... ونغنـي أجمـل أغانينـا .
إحنا العصافير الفرحانة
يا سلام لما الصبح يشقشق ... كلنا نصحى قوام ونزقزق .
ونقــول للكسلان لأ لأ لأ ... قوم يالا وزقزق ويانا .
إحنا العصافير الفرحانة
ودي شجرة كبيرة تدفينا... وتتضمنا ويا بعضينا .
وبقشاية مع القشايـة ... عش جميل من صنع ايدينا .
إحنا العصافير الفرحانة
احنا العصافير لازم نفرح ... لما نشوف الأرض بتطرح .
والتلميذ الشــاطر ينجـح ... ودا كل أملنا ومنانا .
إحنا العصافير الفرحانة
يا رب تزود فرحتنا ... وتعلي دايما ضحكتنا .
ونشوف كل الناس حوالينا ... دايما مبسوطة و فرحانـة .
إحنا العصافير الفرحانة
******** *
يا ورد على فل وياسمين *
يا ورد على فل وياسميـن ... الله عليك يا تمر حنة .
ادي وردة حلوة على عودها... خدها عشان ماما في عيدها .
اوراقها دي ولا خدودهـا... ما حلاها لو ماما باستها .
والفل عقد جميل ما حـلاه ...الله على ريحتـه الله .
تشوفه ماما تقــــــول الله... الله عليـــــــه الله الله .
وادي كمان صحبة ياسميــن ...رقة وجمال ترتاح له العين .
ودا عشان ست الحلويـن... تفرح وحتبوسك بوستيـــن .
والتمر حنة دا من الجنـة ... علشان مامتنا تدعيلنــا .
واحنا برضـاها نتهنَّى ... والفرحة تكبر في عيوننـا .
يا ورد على فل وياسميـن ... الله عليك يا تمر حنـة .
***********
أحلى هدية *
أحلى هدية شافتها عنيَّّـه ... زرعة صغيـرة جوا الشاليــة .
يوم ورا يوم والاقيها بتكبـر ... وافرح بيها اكتر واكتـر .
قلت يا رب اشوف لهــا زهرة ... وبذور ازرع منها واكتّـر .
في كل يوم لازم اسقيـــها ... واقف معاها الصبــــح شويـة .
و اقول لها يا صباح الـخضرة ... واحس بيها ترد عليــه .
و اسيبها و اروح على مدرستي ... و اقول لها باي باي يا حبيبتي .
توحشني وارسمها ف كراستـي ... واكتب عليها أحلى هديـة .
أحلى هدية شافتها عنيَّه ... زرعة صغيرة جوا الشاليـة .
**************
* حكاية الفيل المغرور*
- كان و ياما كان ... في الغابة مكان ... مليان بالأرانب .
- عايشين في أمان ... لا بيعرفوا الأحزان ... ولا حتى المتاعب .
- ياكلوا ويشربوا ... و يجروا ويلعبوا ...
- على ارض جميلة خضرا ... وكأنها الملاعب .
- وف لعبهم يتشاركوا... من غيرما يتعاركوا ... والمغلوب زي الغالب .
- وف أكلهم يتقاسموا ... من غير ما يتخاصموا ... علشان أخوات و قرايب .
- ويباتوا في الجحور .. فى هنا وسرور ... زي كل الأرانب .
**********
- ولكنها كالعادة ... ما بتدومش السعادة ... في غابة العجايب .
- كان في الغابة فيل ... طبعا وزنه تقيل.. وف أول كل يوم ... لما يقوم م النوم ... يزعق و يتتاوب .
- ويمشي فرحان يتمختر ... من غير أبدا ما يفكر ... انه تحته أرانب .
- ويدوس على الجحور ... ويكشفها للنور ... و تبتدي المصايب .
- أرانب متعوّرة ... وجحور متكسّرة ...
- تحوم عليها صقور ... و ديابة كتير ... وتعالب .
- وأرانب قاعدة تعيط ... وفيل فرحان بيزقطط ... ويغني بقى ويقول ... كلام كدا مش معقول :
" أنا الفيل أبو زلومة ... اكبر واحد في الغابة ... ماحدش يقدر يضربني ... ماحدش يقدر يغلبني " .
**********
- راح أرنب للفيل ... قال له : ليه يا فيل ... تعمل كدا فينا ... كسرت ليه بيوتنا ... ضيعت ليه ضحكتنا ... وخليت حياتنا حزينة ... مع اننا احباب ... وجيران ومش أغراب ... وأكلنا من الأعشاب ... كلنا مع بعضينا ... ياريتك بس يافيل ... ما تعديش فوقينا ... علشان وزنك تقيل ... وكمان رجليك تخينة ... ولما تدوس على حد ... بتلزقه ف الأرض ... وتخليه عجينة .
- رد الفيل وقال : أنا فيل الأفيال ... ما سمعشي كلام عيال ... ابعدوا يالا في الحال ... وبقى يزعق ويقول ... كلامه اللي مش معقول :
" أنا الفيل أبو زلومة ... اكبر واحد في الغابة ... ماحدش يقدر يضربني ... ماحدش يقدر يغلبني " ..." روح اجري يالا يارنب .. مش عايز اشوفك تاني .. شكلك بينرفزني .. وصوتك وجعلي وداني" .
**********
- رجع الأرنب زعلان ... واشتكى للحصان .
- راح الحصان للفيل ... وقال للفيل سلام ... ما ردش السلام ...
- قال له : إيه يا حصان ... عايز إيه كمان؟
- قال له : يا فيل حرام ... تزعـّل الأرانب .
- رد الفيل وقال : يا خيبة الآمال ... إزاي يا حصان يا كبير ... تسمع كلام أرانب ...
- دول حاجة زي الترابة ... ويمكن قد الهبابة ... ما يستاهلوش كلامنا ... ولا نشغل بيهم بالنا .
- رد الحصان عالفيل ... وكان رده جميل ... قال له :
" إن الضمير ... هو اللي خلاني ... أسعى ف طريق الخير ... ومن غير الضمير ... يروح الصغير ... في بطن الكبير.. و ماتنساش يا فيل ... يا بو الفهم القليل ... إن كل كبير ... لازم يبقاله كبير " .
- غضب الفيل المغرور ... و اتنطط زي التور ... وبقى يزعق ويقول ... كلامه اللى مش معقول :
" أنا الفيل أبو زلومة ... اكبر واحد في الغابة ... ما حدش يقدر يضربني ... ما حدش يقدر يغلبني " .
**********
- رجع الحصان زعلان ... وحكى بالتفصيل ... كل كلامه مع الفيل ... وقال حل جديد :
" نبعت أسد شديد ... و أيديه زي الحديد ... ولما يشوفه الفيل ... حيخاف بالتأكيد " .
**********
- راح الأسد الشديد ..اللي ايديه حديد ... وقال للفيل " سلام " ... ماردش السلام .
- قال له : " يا بو الأنياب و المخالب ... ياللي دايما طول عمرك غالب ... جاي عشان أرانب ؟
- دول حاجة زي الترابة ... ويمكن قد الهبابة ... مايستاهلوش كلامنا ... ولا انشغال بالنا " .
- قال له : " لا يا فيل ... يا بو الفهم القليل ... دول مخلوقات زينا ... ياكلوا ويشربوا ... ويجروا ويلعبوا ... ولما بناكل منهم ... يبقى عشان بطننا ... لكن عشان نإذيهم ... مش حنلاقيهم ... و حيهربوا مننا " .
" وآخر كلامنا يا فيل ... يا أبو الفهم القليل ... نصيحة مننا : الغابة ليها نظام ... وعشان تعيش دايما في سلام ... لازم تسمع الكلام ... ولو زعلتنا .. حتزعل مننا " .
- غضب الفيل وثار ... وعينيه بقت شرار ... وعاد نفس الكلام :
- " أنا الفيل أبو زلومة.. اكبر واحد في الغابة.. ما حدش يقدر يضربني ... ما حدش يقدر يغلبني " .
**********
- رجع الأسد الشديد ... وقال الفيل دا عنيد ... ما قبلش النصيحة ... و ما خافش من التهديد .
- وتمر الأيام ... و مفيش إلا الكلام ... وعناد الفيل بيزيد .
- ويدوس على الجحور.. ويغني بكل غرور :
" أنا الفيل أبو زلومة ... اكبر واحد في الغابة ... ما حدش يقدر يضربني ... ما حدش يقدر يغلبني " .
**********
- وف مرة أرنب ... صغير كان بيلعب ... وهو بيحفر حفرة ... قال : " أنا جاتلي فكرة ... نعمل كلنا حفرة ... بينا وبين الفيل ... ونغطيها ... بالقش وبالنجيل ... وان عدى الفيل عليها ... لازم يقع فيها ... ونرتاح بقى ... من هم الفيل " .
**********
- عجبت الأرانب الفكرة ... و بدأوا ف تنفيذ الحفرة ... والحفر كان بالليل ... ساعة نوم الفيل ... وبدون دوشة.. وبدون كلام ... بقى كل شيء تمام تمام .
***********
- والصبح قام الفيل ... وبفهمه القليل ... وقف قدام الحفرة ... و بص وقال :" يا سلام ...
- الأرض حلوة وخضرا ... و طلع النجيل قوام ... " .
- وقال كالعادة.. وبكل سعادة :
" أنا الفيل أبو زلومة ... اكبر واحد في الغابة ... ما حدش يقدر يضربني ... ما حدش يقدر .." ... و ما كملش الكلام .
- وقع الفيل في الحفرة ... وكأنه حتة حجرة ... ورجله كمان انكسرت ... و دموعه ف عينه ظهرت ... وبأعلى صوت يعيط ... ويقول الحقوني يالا طلعوني .
**********
- و بص لقى الأرانب ... حواليه من كل جانب ... فرحانة قوي بتزقطط .
- قال لهم : " يا أرانب ارحموني ... ليه بس توقعوني ... لو بس تطلعوني ... اشيلكوا جوا عيوني " .
- رد أرنب وقال : " ازاي نطلعك ... دا شيء محال ... دا انت أبو الأفيال ... و احنا يادوب عيال " .
- و أرنب تاني قال : " احنا نسيبك كام يوم ... علشان تعيش محروم ... من الآكل والنوم : .
- وغيره قال وعاد .. والفيل صياحه زاد ... يوصل لبلاد وبلاد .
**********
- و بص الحصان عليه ... ما صدقش عينيه ... إزاي أكبر حيوان ... يقع كدا و يتهان ... سمع الحصان الفيل ... بصوت ضعيف ندمان : " طلعني يا حصان ... يا أبو الشجعان ... أنا صحيح غلطان الغرور عماني ... وقعني و أذاني ... لكن الألم صحاني ... ودا وعد مني ليكو ... مش حاعمل كدا تاني " .
- رد الحصان عالفيل : " انت يا فيل غلبان ... وصحيح صعبان عليـــه ... لكن واجب عليــه ... اسمع رأي الأرانب ".
**********
- عدى الأسد كمان ... لما مشى الحصان ... سمع الفيل بيقول ... وكلامه بقى معقول :
" الحقني يا ملك الغابة ... انا صحيح غلطان ... لخبطت نظام الغابة ... اللي بقاله زمان ... وهرّبت مني الأرانب ... وحتى كمان الفيران ... ودي غلطة كبيرة مني ... داالغرور عماني ... وقعني وأزاني ... لكن الألم صحاني ... ودا وعد مني ليكو ... مش حاعمل كدا تاني " .
- رد الاسد كمان : " انت يا فيل غلبان ... وصحيح صعبان عليـه ... لكن واجب كبير عليه ... اسمع رأي الأرانب " .
**********
- عمل الأسد اجتماع ... حضروه كل الأنواع ... والكل بالإجماع ... قال : " الفيل غلطان ... لكن فيه رحمه كمان " .
- رد زعيم الأرانب : " الرحمة دي شيء واجب ... وربنا اسمه الرحمن ... لكن برضه واجب ... إننا الأرانب ... نعيش في أمان ... والفيل لو طلعناه ... وسيبناه على هواه ... ايه اللي يضمن لنا ... انه ما يرجعشي تاني.. زي ماكان " .
- رد الأسد وقال : " طلــّعوا الفيل في الحال ... و حنسمع منه وعد ... انه مايإذيش حد ... وان رجع في وعده ... كلنا حنكون ضده " .
**********
- راحت الأرانب ... للفيل تطلعه ... وربطوا رجليه ... اللي بتوجعه .. وجابوه للاجتماع ... عشان الكل يشوفه ... ويسمعه .
- وبدأ الفيل الكلام ... وبصوت ضعيف و حزين ... قال الفيل : " أنا آسف ... لكل الحاضرين ... وكنت في الحفرة خايف ... تسيبوني يوم و اتنين ... بين العقارب و التعابين ... ولكن رغم ألمي ... وندمي الشديد ... أنا حاسس اني سعيد ... وكأني اتولدت من جديد .. و اوعدكوا يا أرانب ... ويا غير الأرانب ... نعيش على طول حبايب ... ودا وعد مني أكيد .
- واشكركو كتير كتير ... على الحفرة الكبيرة ... اللي علمتني ... حاجات كتيرة ... وان ايد على ايد ... .. أقوى من الحديد ... والعدد لما يزيد ... قوته تبقى خطيرة ...
- وان كل كبير ... أكبر منه كبير ... وقوة ربنا ... هي القوة الكبيرة .
**********
حكاية زرافة
كان فيه زرافة كبيرة كبيرة ... وليها رقبة طويلة طويلة.
قالت له انت يابو ودنين ... ماشي كدا رايح على فين.
روح يالا اجري كعبلت رجلي ... مش عايزة اشوفك هنا بعدين.
بص لها الأرنب واستغرب ... وقال لها بكلام مترتب :
وليه كدا كدا يا زرافة ... دانا حتى طيب ومؤدب.
وكلي رقة ولطافة ... ومش لئيم زي التعلب.
قالت له روح يالا واهرب ... لما بشوفك بتكهرب.
ياحاجة كدا ماشية برجلين ... مش عايزة أشوفك هنا بعدين.
وبرجليها تشوت الأرنب ... كأنها بتلعب في الملعب.
وف كل شوتة بتقول هييه ... والأرنب ياعيني عليه.
يتدحرج كدا زي الكورة ... ودماغه تبقى بين رجليه .
ودموعه طبعا تملا عنيه ... ويقول ياربي انا أعمل ايه؟
وقبل ما ينطق كلمة ايه ... لقى حاجة غريبة حواليه!!
هوا يصفّر تراب يعفـّر ... حاجات تطيِر وحاجات تتكسّر
زي المقشة ما يسيبش قشة ... يخلي كل الفروع جريد .
لا فيها خضرة ولا حتى بذرة ... ولا أي حاجة فيها تفيد .
وبعد ساعة وأكتر وأكتر ... تيجي الزرافة عشان تدوّر.
لا تلاقي عود اخضر ولا أصفر ... وتدُور حواليها وتتحيّر
تمشي الزرافة كتير وكتير ... ويعدي يوم واتنين تدوير.
لحد ما رجليها تعبتها ... ولا قدرت ترفع رقبتها.
وفجأة تلاقى الاستاذ أرنب ... رايح و جاي بيجري ويلعب.
فرحان مفرفش عَمَّال يقرمش ... في مرة جزرة ومرة بصلة.
تيجي الزرافة بكل لطافة ... وتقول يا حلو يا أرنب.
اديني حتة الله يخليك ... مش لاقية آكل ولا حتى أشرب.
بصِّلها الأرنب واستغرب ... وقال لها بكلام مترتب.
رغم اللي قولتيه وعملتيه ... حنجيبلك اللي حتطلبيه .
وجاب لها من تحت الأرض ... وجبة لذيذة ما كلهاش حد .
أكلتها وجسمها اشتد ... بقت زرافة جديدة بجد .
وقالت له شكرا يا أرنب ... يا بو قلب حنَيِّن ومؤدب .
مش علشان الأكل وبس ... لكن علشان أكبر درس .
إننا نبعد عن الغرور ... وما نقولش أبدا نفسي وبس .
***********
* موضوعات من أجل الثقافة الزراعية *
* ملكة النحل *
صباح الخير عليكو ... صباح العسل .
أنا ملكة الملكات ... في عالم الحشرات ...
من طبعنا النشاط ... وبنكره الكسل .
وعندي الشغالات ... ياما كتير ألوفات ... بيقســــــموا العمل .
واللي يسافروا المسافات .. للبساتين والغابات ..
ويجمعوا في الرحيق وحبوب زي الدقيق ... و مايعرفوش ملل .
واللي بيبنوا العيون ... بهندسة وفنون ... لتخزين العسل .
واللي بيحموا الخلية.. ويموت منهم ضحية..
من أجل حياه كريمة ... وتحقيق الأمل .
وبيطعموا الصغار ..علشان يبقوا كبار .. والاجيال تتوصل .
والخير يكتر ويكتر .. والكون يعمر ويعمر .. والفرح يكتمل .
وف آخر الكلام ... لازم نقول سلام ...
ويارب تكونوا دايما .. دايما زي العسل .
***********
محادثة عن زهرة المرجريت *
* بائعة الورد : ياورد على فل وياسمين .. الله عليك يا تمرحنة .
- المشتري : انتي يا حلوة الحلوين ... يابتاعة الورد والياسمين ... زهرتنا النهارده إيه ؟ ... وحنهديها لمين ؟
* بائعة الورد : زهرتنا النهارده المرجريت ... وبنهديها ... لست البيت ... اللي بتحب بيتها ... زي حياتها ... وبتديه أغلب اوقاتها .
- المشتري : بتقولي زهرة المرجريت؟ ياريت تحكيلنا عنها ياريت .
* هي نورة ... بنورها الاصفر ... نجمة في الصبح تنور .
- بالتأكيد دي زهرة عظيمة .
* أيوه صحيح هي عظيمة ... واسمها اللاتيني ... مريم العظيمة .
- " ماري جريت " ... اسم جميل سهل على لساننا ... يالا احكيلنا ...عنها احكيلنا .
* عيلتها كبيرة أنواعها كتيرة ... فيها الزهرة نورة ... زي القرص .
- الزهرة نورة زي القرص ؟ ... تبقى عيلة عباد الشمس .
* ايوه عيلة عباد الشمس ... انواعها عشبية وبس .
- سمعنا كتير كلمة عشبية ... ياريت تقوليلنا ... يعني ايه عشبية ؟
* يعني سيقانها طرية ... زي قرون الفاصوليا .
- قصدك المرجريت عشبية ...عشان سيقانها طرية ؟ ... لكن قوليلنا ياترى ... هي زرعة معمرة ؟ * ابدا ابدا ... دي حياتها قصيـّرة ... في الشتا مخضـّرة ... وفي الربيع مزهرة .
- في الشتا مخضـّرة ؟ ... وفي الربيع مزهـّرة ؟ تبقى أكيد حولية شتوية .
* ايوة ايوة ... بالظبط هي ... زرعة حولية شتوية ... نوراتها رخيصة و شعبية ... وبنملا بيها الزهرية ... وبذورها ياماكترها ... الهوا يطيرها ... وينشرها ويبدرها .
- معنى كدا انها برية ؟
* أيوه زرعة برية ... طورها الانسان ... وزرعها ف كل مكان ... في جنينة أو بستان .
- شكرا شكرا ... يابتاعة الورد ... كلامك خلاني حبيت زهرة :
* المرجريت .
***********
محادثة عن زهرة الخطمية *
* بائعة الورد: يا ورد على فل وياسمين .. الله عليك يا تمر حنة .
- المشتري : انتي يا حلوة الحلوين ... يا بتاعة الورد والياسمين ... زهرتنا النهارده إيه ؟ ... وحنهديها لمين ؟
* بائعة الورد : زهرتنا الخطمية ... وبنهديها ... للطالبة المثالية ... الشاطرة ف دراستها ... وغنية بثقافتها .
- المشتري : بتقولي إيه ؟ ... زهرة الخطمية ؟
* بائعة الورد : أيوه بالظبط هــي .
- المشتري : طب احكيلنا شوية ... عن زهرة الخطميـة .
* زهرة كبيرة مدورة ... ومش معنقة .
- مش معنقة ؟ ... طب ازاي نقطفها بقـى ؟
* وليه نقطفها ؟ ... كفاية نشوفها ... ونمتع عينينا ... بشكلها في الجنينة .
- قصدك تقولي إنها ... زهرة ممنوع قطفها ؟
* أيوة عشان قيمتها ... وهي على زرعتها .
- طب احكيلنا شوية ... عن زرعتها .
* هي زرعة طويلة ... معروفة برشاقتها ... وتدويرة ورقتها ... الشتا بينبتها ... والصيف بيموتها .
- قصدك تقولي ... إنها حولية ؟
* أيوه حولية شتوية ... وزهورها دايما ربيعية ... ما تبصش فوقها أبدا ... وتبص جنبها ... وعشان كده ... الناس تحبها ... عشان جمالها ... وجمال طبعها .
- حلوة قوي الخطمية ... ويا ترى زراعتها ... دايما بسهولة ؟.
* أيوه زراعتها بسهولة ... بالظبط تمـام ... زي الفولة .
- شكرا شكرا يا أمورة على ...
* زهرة الخطميــــة .
*بائعة الورد: يا ورد على فل وياسمين .. الله عليك يا تمر حنة .
- المشتري : إنتي يا حلوة الحلوين ... يا بتاعة الورد والياسمين ... زهرتنا يا حلوة إيــــــــه ؟ ... و حنهديها لمين ؟
* بائعة الورد : زهرتنا عصفور الجنة.. وبنهديها لأهل الجنة.. اللي وهبوا حياتهم.. لفعل الخير.. وشافوا سعادتهم.. في سعادة الغير .
- المشتري : أكيد دي زهرة عظيمة ... وليها أكبر قيمة ... بتقولي زهرة إيـــــه ؟
* زهرة عصفور الجنة .
- زهرة عصفور الجنة ؟ ... طب احكيلنا ... عنها احكيانا .
* هي نورة كبيرة فيها كل الألوان.. وكأنها عصفورة بتزين الأغصان.
جناحاتها كتير كتير .. لكن مش بتطير .
- على كده نورة العصفور.. من أجمل الزهور .
* أيوة طبعا جميلة .. بالشكل وبالألوان .. وبمعناها كمان .
- عصفور الجنة ؟.. جمال في المعنى ؟.. احكيلنا عنها احكيلنا .. وياريت توضحيلنا .
* فيها أجمل تعبير.. عن قوة وعن ثبات.. وكأنها ملك كبير.. في عالم النبات.. وكفاية لما نشوفها.. بتقول سبحان الله.. خالق كل شيء.. في الكون وفي الحياة .. وكأنها زهرة جميلة .. من زهور الجنة .
- شكرا شكرا شكرا ...على ...
* نورة عصفور الجنة .
************محادثة عن الكريزانتيم *
* بائعة الورد: يا ورد على فل وياسمين .. الله عليك يا تمر حنة .
- المشتري : انتي يا حلوة الحلوين ... يا بتاعة الورد والياسمين ... زهرتنا النهارده إيه ؟ ... و حنهديها لمين ؟
* بائعة الورد : زهرتنا كريزانتيم ... وبنهديها... للتاجر الأمين ... اللي كلمته ووعده أهم من الملايين .
- المشتري : بتقولي كريزانتيم ؟
* أيوه كريزانثيمــم ... واختصارها كريزانتيم .
- طب احكيلنا عنها ... ياحلوة الحلوين .
* هي نورة شفناها ... في رحلة طلعناها ... لمعرض الخريف .
- هو فيه معرض ... زهور في الخريف ؟
* أيوه حقيقة ... مش تخاريف ... زهرتنا نورة ... تنور الخريف ... بالندى مندية ... وعلى كل شكل ولون ... وكأنها جاية هدية ... من الــه الكون ... صغيرة وكبيرة ... ومنها كمان بنبون .
- و ياترى الكريزانتيم ... زراعتها سهلة ؟
* أيوه زراعتها سهلة .... بالخلفة أو بالعقلة .
- شكرا يا حلوة الحلوين ... على زهرة ...
* الكريزاتنيم .
************ محادثة بين الوردة و الياسمينة *
- الوردة : صباح الخير يايا سمينة .
* الياسمينة : صباح النور يا وردة ... ازيك النهاردة ؟
- الوردة : الحمد لله انا فرحانة ... بخدودي الحمرا المليانة ... أما انتي يايا سمينة ... مالك بيضا و ضعفانة ... باين عليكي تعبانة .
* الياسمينة : ليه بقى يا ترى ... علشان يعني صغيرة ؟ ... أكيد يا وردة ... أكيد انتي غلطانة .
- يعني أنا زنبي ... إنى عايزاكي جنبي ... تباني في الجنينة ... وتشوفك عينينا .
* أنا ياسمينه ... رقيقة ومش تخينة ... وثابتة وجودي ... بجمال عودي ... ولوني الهادي ... زي حمام السلام ... اما انتي يا وردة ... حقيقي جميلة لكن عنك أشواك ... وباين عليكي ... بتحبي العراك .
- صحيح يايا سمينة... أنا عندي كتير أشواك ... لكن مش للعراك ... لكنها أشواك تحميني ... من كل اللي يعاديني ... أما انتي يايا سمينة... زهرة يا عيني مسكينة ... وبيعملوكي عجينة ... لإنتاج العطور .
* في الحقيقة يا وردة ... مهما اختلفنا... أو حتى اتخقانقنا ... إحنا اتخلقنا ... كلنا زهور ... وحكمة ربنا ... نعيش إحنا كلنا ... في خدمة الإنسان ... بإرادة الرحمن ... خالق الكون ... والأكوان .
***********
* حكايتي مع الزمان *
" يرويها السمان "
- أنا السمان ... من عيلة الفزان ... وجدودي عاشوا زمان ... في الصين وفي اليابان .
- وتمر السنين ... آلاف وملايين ... ويزيد انتشارنا ... في كل مكان .
- وتكتر شهرتي ... والسر ف هجرتي ... اللي حيرت الإنسان .
- إزاي أنا السمان ... نقدر على الطيران ... ونعدي البحار ... طاير ليل ونهار ، مع إن نظري ضعيف ... ووزني مش خفيف ... و ما ليش ديل كمان .
- ورغم شباك الصيد ... والمليون شهيد ... أكمل رحلتي ... بمشيئة الرحمن .
- أصيف في الشمال ... واشتي في الجنوب ... وعمري أبدا أبدا ... ما اقول أنا تعبان .
- وزمان ويا ماحلى زمان ... ما كانش حد منا ... يقبل يعيش أسير.. في قفص صغيـــــّـر ... أو حتى كبير .
**********
- وتمر السنين ... آلاف وملايين ... وفي القرن العشرين ... عصر العلم والآلات ... ظهرت سلالتنا ... وغيرها كتير سلالات .
- قلنا ليه هجرتنا ... اللي غربتنا ... في كل البلدان .
- اشمعنى الدواجن ... ليها مساكن ... و عايشين في أمان .
- لا يشوفوا صقور ... ولا غربان .
**********
- ونسينا طبيعتنا.. وإننا سمان ... ورضينا بالمزارع ... وأعلاف المصانع .
- ناكل كتير ونشرب .. من غير ما نطير ونتعب .. ونزيد في الأوزان .
- ويزيد بيضنا ... لكن مراتتنا ... بطلت رقاد .
- و إيه بس يعوضنا عن فرحتنا ... بخلفة الأولاد .
- ويضيع عمرنا ... في أول شهرنا ... ويملا لحمنا.. أحلى الوجبات .
- وشوية مننا.. يستنوا سنة.. ويعيشوا ف هنا ... أزواج مع زوجات .
- وبيضهم الجميل ... تاكل منه وتشيل ... وتقزقز منه كتير ... في كل الوجبات .
- وكمان ممكن يتملح ... زي المخللات .
**********
- ونرجع تاني نقول ... إحنا السمان ... برضه مهما كان ... في حياتنا أحزان ... نرجع للإيمان ... وندعي ربنا ... يرحمنا كلنا.. إحنا والإنسان .
إمضاء :
طائر السمان
**********
فوازير عن النباتات **
( 1 )
الأرض كتاب ... بيعلم الفلاح ...
إن الحياة ... عايزالها كفاح .
وان الدروع ... يلزمها سلاح .
والصبر مسيره يطرح ... وثماره هي النجاح .
والقشرة مهما حتجرح ... لازم في يــوم تنــزاح .
**********
الحل هو :التين الشوكي
وهو نبات شوكي صحراوي المنشأ ، تحورت فروعه إلى أعضاء لتخزين الماء ، واتخذت أشكالا درعيه تخرج منها الأشواك ، كما تخرج منها أزهار صفراء كبيرة ثم ثمار حلوة الطعم تحتوي على كمية كبيرة من البذور .
ويزرع التين الشوكي في بعض الحدائق والبساتين كأسوار مانعة ، ولعمل منظر خلفي جميل في جبلايات الصبارات .
**********( 2 )
رسالة با قولها ... لكل البني آدمين .
من شجرة عتيقة ... وجزعها متين :
فاكرين لما كنتوا ... لسه صغيرين ...
واضمكم بضللي ... وتبقوا فرحانين .
وتاكلو من ثماري ... وتقولوا عليها تين .
ياريت تكـــــونوا فاكــريــن .
**********
الحل هو: نبات الجميز
وهو نبات يصل إلى أحجام كبيرة ، وتتميز شجرة الجميز بالمجموع الخضري الغزير واستدامة الخضرة ، والجزع السميك ، الذي يعتبر مضربا للأمثال عن البدانة ، وثماره تشبه ثمار التين .
ومن الامثال الشعبية عن الجميز ( جمز بالجميز لحد ماييجي التين ) ويوضح هذا المثل أن الجميز يثمر قبل التين .
*********( 3 )
من جوا البستان ...
من حبة سمرا طيبة ... على غصن الأغصان .
بابعت رسالة ... لبني الإنسان ... في كل عصر وكل مكان :
ليه نسود قلبنا ... بالكره وبالخصام ...
ليه نحارب بعضنا ...على ارض السلام ...
لو يرجع حبنا ... ويحكمنا عقلنا ... يتبدد الظلام ...
و يرفرف الحمــــام ... على غصن الأغصـان .
**********
الحل هو : نبات الزيتون
من نباتات الفاكهة ، ولثماره قيمة غذائية عالية ، واللون الداكن في الثمار يعني تمام النضج ، وتجود زراعته في الأرض الصفراء .
ولزيت الزيتون قيمته الغذائية ، ويستعمل أيضا لدهان الشعر ، ولصناعة الصابون الفاخر .
ولنبات الزيتون مكانته الكبيرة عند الإنسان ، لذكر اسمه في القرآن الكريم ، وأغصانه التي اتخذها الإنسان رمزا للسلام .
***********
كلمة ختام *
مما لا شك فيه أن النصوص الغنائية .. كأي منتج في الحياة الإنسانية .... ترتفع قيمته كلما ازداد الإقبال عليه ، وازداد التعامل معه ، وتقل قيمته كلما ظل مركونا على الرفوف وحبيسا بين الصفحات .
و أتمنى أن تجد هذه النصوص طريقها إلى المتلقي عبر الوسائل العديدة .... إلقاء .. غناء .. تمثيل .. أو غير ذلك .
وأنني ارحب بأي تعديل يناسب الوسائل المختلفة للتقديم .. وبحيث لا يؤثر سلبا في المضمون الأساسي للنص .
و أتمنى أن تترك النصوص المقدمة أثرا طيبا في ذاكرة المتلقي ، وان تتحقق منها الأهداف التعليمية والتربوية التي دفعتني وتدفعني دائما إلى الكتابة .
و أدعو الله أن يوفقنا جميعا ويهدينا إلى كل ما فيه الخير لكبارنا ، ولصغارنا ،
ولأطفالنا الأحباء .
**********
