((( فيه حاجة غلط )))
لو شفت ناس بتعدي ما بين ... عربيات سرعتها 200
لو شفت مرة العربيات ... بتسابق في شمال ويمين
لازم نقول دا شيء غلط
لو شفت مرة الميكروباص ... يدخل يشق جموع الناس
والكل ماشي ف خير وسلام ... والوضع عادي وكله تمام .
لازم نقول دا شيء غلط
لو شفت شارع أربع حارات ... أصبح جراج للعربيات
لو شفت ناس بتسد الشارع ... عشان يقولوا عندنا جامع
لازم نقول دا شيء غلط
لو شفت زينة وميكروفونات ... وزفة متكلفة ألوفات
وعريس يا عيني عنده جفاف ... مش لاقي حتى العيش الحاف
لازم نقول دا شيء غلط
لو شفت مرة اتنين يتخانقوا ... على شيء يسوى تمن رغيفين
وف قعدة تانية قوام يتصالحوا ... باتنين شاي مع سجارتين
لازم نقول دا شيء غلط
لو شفت واحدة من الهاي هاي ... لما بتضحك بتقول ياي
ولما تمشي تقول لك باي ... وجوا بيتها تقول ياماي
لازم نقول دا شيء غلط
لو شفت واحدة عاملة كنيش ... ولابسة أجمل فرو وريش
وبيتها مافهوش حق العيش
لازم نقول دا شيء غلط
لو مرة تسمع كلام جميل ... كلام يخلي الجماد يميل
عن الأمانة وعن الضمير ... والذمة أوسع من أي بير
لازم نقول دا شيء غلط
لو شفت واحد دخله 200 ... بيشتري البدله بألفين
لو شفت واحد قالك ثواني ... وبعد كدا ما تشفهوش تاني .
لازم نقول دا شيء غلط
لو شفت حجز دروس خصوصية ... قبل الدراسة بسنة وشوية
وناس تبيع عفشها وهدومها ... عشان يروح ابنها كلية
لازم نقول دا شيء غلط
لو شفت صورة متلخبطة ... عيون بتضحك ومعيطة
وعيون بتبكي ومزقططة ... ما تقولش ابدا دي لخبطة
لازم نقول دا شيء غلط
وعشان حياتنا تتظبط ... نبدأ نقول دا شيء غلط
**************
ليست هناك تعليقات:
إرسال تعليق