أستاذ عـــارف
استاذ عارف دايما عارف ... عمره ما قال كلمة ماعرفش.
عن كل شيء بيقول أنا عارف ... والناس كلها مابتعرفش.
ولو تقول عارف مش عارف ... حتلاقي وشه ما بقاش وش.
حتلاقي ضلمة ومدفع رش ... وصوت بيعلى مايتفهمش .
احسن تقول له يابو المعارف ... واسمع كلامه وما تجادلش.
تقول له تعرف تشيل حديد؟ ... يقول لك ازاي أنا ماعرفش.
دا نا اشيل 100 في كل ايد ... كأني شايل حبة قش.
تقول له تعرف تلعب كورة؟ ... يقول لك ازاي أنا ماعرفش.
بشوتة واحدة اجيب جونين ... وعمرى أبدا ما خسرت ماتش
تقول له تعرف تلعب مصارعة؟ ... يقول لك ازاي أنا ماعرفش
دا انا اغلب اللي ما يتغلبش ... وأ فرم اللي يقول لي هش
تقول له تعرف في الكاراتيه؟ ... يقولك ازاي بتقول ايه
دا نا من زمان متربي عليه ... والكيس باجيبه بخمسين قرش .
تقول له تعرف تلعب طاولة؟ ... يقولك ازاي أنا معرفش.
أنا عندي قرصة زهر تخلي ... كل رمية تطلع بدُش.
تقول له تعرف في الكوتشينة؟ ... يقول واخلي الشايب يقش.
تقول له تعرف في الشطرنج؟ ... يقول واخلي الحصان يكش.
تقول له تعرف تعوم ياعارف ... يقول وعديت بحر المانش .
تقول له تعرف عن فيثاغورث؟ ... يقول دي حاجة زي البورص.
تقسمها نصين تبقى اتنين ... تضربها بالشبشب ما تموتش.
تقول له تعرف دار المعارف؟ ... يقول لك أيوة دار أم عارف.
دي دارنا طبعا والكل عارف ... بناها جدو الباشا عارف.
تقول له تعرف أحمد زويل ... يقول دا طبعا ابن زويل.
وكان زميلي ف الاعدادية ... لكنه يا خسارة ما كمِّلش .
تقول له تعرف نابليون؟ ... يقول دا صاحبي من الدبلون
كان عنده ثروة بكام مليون ... ضيعها علشان كان مجنون .
تقول له تعرف أبو جلمبو؟ .. يقول وباعرف أم جلمبو.
وحتى ابنه الكبير جلمبو ... حبيبي وانا متصور جنبه.
تقول له تعرف معنى الثورة؟ ... حيقول دي تبقى مراة الثور.
تقول له تعرف في الدستور؟ ... حيقول وقفنا عليه طابور.
أطول من طوابير العيش ... ف اخره قالوا خلص معلش.
تقول له تعرف تهرش يا عارف؟ ... يقول وهرشي مش أي هرش.
تقول لعارف انت ياعارف ... فيه حاجة فيها ما بتعرفش؟
عارف يرد يقول ماعرفش
... إني أقول كلمة ماعرفش.
ليست هناك تعليقات:
إرسال تعليق