يا تاريخ إكتب يا تاريخ سطّر
يا تاريخ إكتب يا تاريخ سطّر ...عن تلاتين سنة فاتوا وأكتر
تلاتين سنة عابس ومكشر ... يقول كلام يائس بيدمّر :
"أنا اعمل ايه والنسل بيكتر ... والمشكلة بتكبر وبتكبر"
لا هوّ قادر يزق زقـّة ... ولا سابها للّي يمكن يقدر
وخلـّى نفسه ملك ومالك ... واللّي ينافسه هو اللي هالك
ولا حتى نائب ولا مشارك ... والابن طبعاً بيستحضّر
واللّي يبارك هو اللي سالك ... وحسابه بالمليارات بيكتر
وبكره يبقى فوق الوزارة ... وزير وعنده تاريخ منوّر
*************
يا تاريخ اكتب يا تاريخ سطّر ... عن تلاتين سنة فاتوا وأكتر
عن اللي خلى شباب بلاده ... كاره لنفسه وتاريخ ميلاده
تايه في بحر الهموم يدوّر ... مش لاقي شمعة أمل تنوّر
مستني طفرة هي اللي تنتر ... من غيرها ربك هو اللي يستر
يمكن يلاقي ف يوم لقيّة ... أو أي واحدة تكون غنية
أو يستلف ويروح سفرية ... شرعية أو بورق متزوّر
من غير كدا ما يخشش دنيا ... ويبص على غيره ويتحسّر
ونهايته مستشفى نفسية ... و دا جيل التلاتين سنة واكتر
*************
يا تاريخ إكتب يا تاريخ سطر... عن ثلاثين سنة فاتوا وأكتر
عن اللي خلى انجازاته ... هو ومراته كتاب مقرر
دا صاحب الضربة الجوية ... وهيّ منقذة البشرية
واللي يفكّر انه يفكّر ... طريقه طبعا مسدود مسنكر
تلاتين سنة من أزمة لأزمة ... وكل شيء عَمّال يتأخر
وناس بتحسدنا على نيلنا ... وبحرنا الأبيض والأحمر
وكفاية ثروتنا البشرية ... مش لاقية العقل اللي يقدّر
واللي بيخنُق واللي يدمّر ... الابن لمّا بيستحضّر
وصحبته تطبّل و تزمّر ... علشان تلاتين سنة تتكرّر
وكان طبيعي يثور بركان ... شباب بعقل نضيف متحرّر
صمّم وقرّر انه يغيّر ... في طريق كان صعب ومتعثّر
وكل خطوة حتبقى كلمة ... لكل جيل علشان يتنوّر
يا تاريخ إكتب يا تاريخ سطّر ...عن ثلاثين سنة فاتوا وأكتر
***********
ليست هناك تعليقات:
إرسال تعليق