ملحوظة هامة
يعتبر كتاب الوقت من ذهب أول اصدار يضم أشعار عامية متنوعة دون قصر على عالم الطبيعة والنباتات الذي نال اهتمامي ودفعني إلى الكتابة والتعبير عن هذا الاهتمام
ولذلك ليس من الغريب أن يضم هذا الكتاب أعمالا بدائية تم تطويرها فيما بعد في الاصدارات التالية ، وها هي الحياة تتجدد والافكار تتجدد ، كما أراد خالق الحياة ومسيرها ، وما نحن إلا مخلوقات تتجلى فيها قدرات الخالق العظيم الذي أبدع في جميع مخلوقاته ، والذي وهب الانسان اهم ميزة ينفرد بها وهي القدرة على التفكير والابداع والتطوير والتغيير الى الافضل ... ويمكن الاطلاع على نسخة للكتاب pdf من هذا الرابط
مقدمــــــــة
* ما أعظم الأوراق عند توظيفها لنقل الأفكار بين الناس والاحتفاظ بها للأجيال المتتابعة .
* والأوراق المتواضعة ... بين يديكم ... أتمنى أن تحمل البعض من آرائي الذاتية من خلال كلمات منظومة متحررة كثيرا من قيود الشعر التقليدية .
* وأحمد الله كثيرا الذي هداني إلى اختيار عنوان الكتاب دالاً على مبدأ شديد الأهمية في الحياة الإنسانية ، وهو احترام الوقت .
* فللوقت قيمة كبيرة في الحياة الإنسانية وباستثماره يتم البناء وبإهداره يأتي الفناء .
* والحمد لله كثيرا الذي هداني أيضا إلى كتابة بعض الأعمال للأطفال أتمنى أن تحوز إعجابهم ، وأن يكون لها أثراً طيبا عندهم .
* تحياتي إلى جميع القراء ، وتمنياتي لهم بقراءة ممتعة غير مضيعة للوقت .
ودعواتي إلى الله بالخير للجميع .
المؤلف
****
الشاعر : علاء الدين محمد ، وديوانه الوقت من ذهب
تقديم : د. محمد شكري
اشتهر شاعرنا – صاحب هذا الديوان – بعشقه للنبات إلى درجة اصدار ديوانه الأول عن هذا العالم الساحر ... وقد نصحته في يوم من الايام بضرورة طرق الموضوعات الاخرى ... لأن الشاعر مثل النحلة التي تمتص رحيقها من الازهار المختلفة وتخرجه بعد ذلك عسلا فيه شفاء للناس ... والشاعر يسع الوجود بخياله ... قال العقاد (النظر إلى الدنيا لن يتسع ولن يصبح ولن يكمل إلا بخيال كبير يستوعب ما يراه ...)... ويفسر لنا الشاعر أسباب عشقه للنبات في قصيدته الجميلة ( ياما اتعلمت ) وقصيدة ( الزراعة معنى كبير )
فيقول : ياما اتعلمت حاجات وحاجات ... من الزراعة والنباتات
اتعلمت ان اللي بيزرع ... لازم يوم يجني الثمرات .
ويقول : هي زراعة أمل ... نرويها بالعمل ... وثمارها كل الخير .
هي حصن البلاد ... ضد الاستعباد ... والخضوع للغير
- شاعرنا إذن يستمد قوته الشعرية من من حيط بيئته العريقة ... لقد كانت الطبيعة ملهمة له ، وهي التي قادته الى ساحات الابداع والتحليق في الافاق الفسيحة التي تمس شغاف القلوب ... استمع اليه وهو يقول مؤكدا انتمائه في قصيدته ( ماليش غير بلد ) الجميلة :
مين غيرك تبقى بلدي ... مناليش غيرك بلد
يا أرض أبويا وجدي ... ومن بعدي الولد
من هنا يمتلئ الديوان بنظراته النقدية ... حول الدرس الخصوصي ... التدخين ... النفاق ... اللف والدوران ... جنون الكورة ... جنون المحمول ... سواق التاكسي والمشروع ... ألخ
تلك – عزيزي القارئ – آهات شاعر زحفت من خياله النابض بعمق الحياة وتولدت من مشاعره فتحول بها لسانه الى سيف تهوي بها خلجاته الكامنة في أعماقه على بعض السلبيات الموجودة وشيدت بها جدارا من الشعر الاصيل الذي استمد أصالته من أصالة شاعره .
** لقد تميز الشاعر بوجدانه المشبوب الذي جعله يهتم بتوفير عناصر الجمال لشهره واستنباط الصور الشعرية وتستطيع أنه ترى في شعره مزيجا من قوة الاستهلال وشواهده ونصاعة القول وتلاحم النسيج الشعري ... ومن صوره الجميلة على سبيل المثال لا الحصر :
( بلدي ياأم الاخلاق – لسننا بينطق سكر – الدنيا دي سوق – القلب أبيض زي الفل – شال همومه – كلامه دافي – بحر الثقافة ) وفي قصيدته الجميلة ( الوقت من ذهب ) نرى كثيرا من المحسنات البديعية والصور الجميلة والتورية اللطيفة .... في بدايته يقول :
الوقت من ذهب ... وقيمته تتحسب ...
وسرقته جريمة ... دايما بترتكب
شعراء الاطفال في وطننا العربي عملة نادرة ... ونحن بحاجة ماسة الى تقديم الشعر في أعذب صورة حتى يلقى من أطفالنا الاقبال والحب ومن أجل أن يشعروا ويفكروا ويعرفوا أن هناك الكثير يتحاوز الماديات وان القيم المعنوية لها دورها في رسم شخصية كل منهم .
من هذا المنطلق نجد شاعرنا يخصص الجزء الاخير من هذا الديوان لهم واستطاع الشاعر أن يقدم مقطوعات ظريفة خفيفة الدم سهلة تناسب عقلية الطفل وتستولي على لبه ... يقول شاعرنا مثلا :
- ماء ماء
- ياخروف عندك حبة صوف .
- أيوة أيوة عندي أجمل صوف .
- علشان صاحبي اللي رباني .
- يعمل منه ... بطانية صوف .
وهناك حكاية الفيل المغرور .. عن الصراع بين الفيل والارانب يفهم منها الطفل معنى الاتحاد الذي جعل الارانب الضعيفة تغلب الفيل القوي ... وتعلم الطفل أن رأي الصغير لا يستهان به ويتعلم أن عاقبة الظلم وخيمة ... كل هذا باسلوب الحدوتة التي تقولها ماما قبل النوم ... وتدور فنون القصة الشعرية للأطفال حول تصوير المفارقات المستمدة من الحياة بطريقة يفهمها الطفل ويتذوقها .
والكتابة للطفل من أصعب الفنون خاصة الشعر
ولكن الشاعر علاء الدين ... أثبت أن الشاعر يستطيع ذلك اذا كان عفويا متمتعا بعقل رجل وقلب طفل .
وشعر علاء الدين محمد شعر موزون خليلي النزعة ، انصهرت قصائد الديوان في ثلاثة قوالب شعرية لا غير... فمن بحر المتدارك أو الخبب نظم حوالي 55% من قصائد الديوان – ومن بحر الزجل نظم 21% تقريبا من ومن بحر البسيط نظم 19% تقريبا من مجموع قصائد الديوان
ويتميز شعره بالوضوح والسهولة والمباشرة لا يميل الى الغموض والابهام وموضوعات الديوانمتنوعة وقوافي قصائده غير مقيدة
***
أقدم تهنئتي للشاعر علاء الدين بصدور هذا الديوان ... وأتمنى له مزيدا من لتفوق والنجاح في ديوانه االقادم باذن الله ما دام الهامه مستمدا من الطبيعة الساحرة وما دامت مشاعره مستمدة من قلبه الذي ينبض بالامل والحياة
الاسكندرية ... مايو 2002
الشاعر
د. محمد شكري
مدير عام الاتحاد النوعي للكتاب والمفكرين
* ماليش غيرك بلد *
مين غيرك تبقى بلدي ... ماليش غيرك بلد .
ياأرض أبويا وجدي ... ومن بعدي الولد .
مين غيرك تبقى بلدي ... وارجع فيها اتولد .
ومنين اجيب الماضي ... وسنين ذكرياتي .
وكتاب تاريخ حياتي ... وسطور مالهاش عدد .
ياأرض حبيت عليها ... ومشيت وحاتسند .
مين غيرك تبقى بلدي ... ماليش غيرك بلد .
دانا لــو غيــرت اسمي ... إسمك جـــوا الجسد .
والروح من بعد جسمي ... حتعيش الى الأبد .
تشهد انك يابلدي ... ماليش غيرك بلد .
مين غيرك تبقى بلدي ... ماليش غيرك بلد .
عرفت بلاد جميلة ... كل اللي فيها جميل .
لكن مالقيتش أبدا.. زيك يابلدي مثيل .
ولما بعدت عنك ... حسيت بالشوق اليكي .
وكـإني حته منك ... ولازم ابقى ليكي .
ورجعت عشان أقولك ... ماليش غيرك بلد .
مين غيرك تبقى بلدي ... ماليش غيرك بلد
* ياللي جمالِك مش على حد *
مريتي جنبي . شغلتي قلبي ... لقيت جمالك مش على حد .
حاولت الاقي مِنـِـّـك نظرة ... من قُرب أو حتى من بعد .
في مرة اشاغلك والتانية أحايلك ... مالقيتش منـَك ... إلا الصَـد .
******
عجبني صدِك .. وشفت عندِك ... أشواك تكمـّــل .. غصن الورد .
حبيت كسوفـِـك لما بشوفِك ... والاقي خدِك أجمل خد .
شغـَلتي بالي غيرّتي حالي ... حسيت بقلبي اليكي انشد .
سألت قلبي ... حقيقي حبّي ؟ جاوبني قلبي ... حقيقي جد .
******
من غير ماافكر ... من غير ماادوّر ... من غير ما أسال ..عنـَك حد .
عرفت بيتك في يوم لقيتك ... مشيت وراكي أمد وامد .
ولما قلبي قال حبّيتك ... لقيت سكوتك أجمل رد .
******
من حسن ردِّك من بعد صدِّك ... قوام لقيت روحي بترد .
دعيت ياربي من جوا قلبي ... انا وانتي نعيش لبعض .
ربي استجابلي والاقي حبّي ... في كل يوم يقوَى ويشتد .
ياللي جمالك مش على حد .
******
* حبيت حبيبي وعرفت ليـه *
لقيت عنيــّــه بتفرح بيــه ... والسحركله جوا عنيــــه .
ويغيب عليـّه أحن إليه ... والاقي قلبي قوام يناد يه.
* حبيت حبيبي وعرفت ليـه *
جماله هادي ارتحت ليـــه ... ولبسه عادي يليق عليه .
والبسمة نورها بيحليه ... والنسمة أحسبها خطاويه .
* حبيت حبيبي وعرفت ليـه *
جميل كلامه عشان معانيه ... ما بيعرفش يذوق فيه .
وكل كلمة يقولها حكمة ... حتى ولو كان بيقول إيـه .
* حبيت حبيبي وعرفت ليـه *
قلبه كبير والحب ماليه ... نبع الخير للي حواليه .
صبره كتير عاللي يعاديه ... وجمال طبعه أحلى مافيه .
* حبيت حبيبي وعرفت ليـه *
فرحه وغضبه يبان عليه ... واللي ف قلبه تقوله عنيه .
حبه لربه وايمانه بيـه ... خلاني احبه وأدوب فيـــه .
* حبيت حبيبي وعرفت ليـه *
**********
* ياما اتعلمت *
ياما اتعلمت حاجـات وحاجات ..... من الزراعــــة والنباتـات .
*******
اتعلمت ان اللي بيزرع ..... لازم يوم يجني الثمرات .
والثمرة الحلوة عشــان تطلع ..... يلزم لهــــا جهد وأوقـات .
*******
في الريف سمعت كلام يتقال ..... مليان حكم و كتير أمثال .
ماتقولش أبدا دا شيئ محال ..... دا الزهر يطلع م الأبصال .
بعد المطر ما تلقى رياح ..... بعد التعب يرتاح البال .
وكل شيئ في الكــون دوار ..... وكل ليـل من بعده نهـار .
*******
وسمعت ياما ف جو الريف ..... كلام جميل وبدم خفيف .
مثل يقول ان الحداية ..... مابترميش أبدا كتاكيت .
والغربــان ما تجيبش هدايـا ..... والفار عمره ما يزرع غيـط .
*******
وسمعت ياما كتير من شجرة ..... حكايات فيها المليون فكرة .
شفت كمان في النخلة العالية ..... طباع جميلة وأخلاق عالية .
عزة وصلابة مع الطيابــة ..... مـاتتوصفش بأي كتابـة .
>>>>>>>>
واتعلمت كتير وكتير ..... من البلابل والعصافير .
إني مـاحبش أبقى أسير ..... حتى ولــو في قصر كبيـر .
*******
وعلمني حمام البنية ..... حب الأوطان والوطنية .
من غير مدرسة من غير كليـّة ..... ولا من نشيد ولا من أغنيـة .
*******
واتعلمت كتير م النحلة ..... نظام لكل مدينة ودولة .
فيـها الايدين كلها شغـّالـة ..... من غير كلام وعتاب وقوالـة .
*******
واتعجّبت كتير من نملة ..... ماشية وشايلة قدها رملة .
قلت قوام سبحان الله ..... ولقيت قلبي سمّى وصلّى .
*******
شفت النمل يساعد بعضه ..... ما جابش خنفسا مرة تساعده .
عــارف أن مفيش غيــر إيده ..... هي اللي حتساعده وحتفيــده .
********
شفت كمان بالميكروسكوب ..... مخاليق تانية أمم وشعوب .
خلايا حية رايحة وجايّة ..... والمترصصة زي الطوب .
كلها بتقول للإنسان ..... بص كمان دا الكون مليان .
وما يبقاش نظـرك محـدود ..... دا العقــل ما بيعرفش حـدود .
>>>>>>>>
علمني زهر البستان ..... التنسيق بين الألوان .
والألوان مهما بتتخـاصم ..... تتصـالح بادين فنــان .
*******
واتعلمت من الصبار ..... إن الجمال دا له أسرار .
وشفت في زرع الصبار ..... معاني أجمل م الأشعار .
الصـبر حـلو مع الإصـرار ..... لكنه ويا الضــعف مرار .
*******
ولسـّـه باتعلم ف حاجات ..... من الزراعـة والنباتــات .
*******
*******
* الزراعة معنى كبير *
ي زراعة أمل … نرويها بالعمل … وثمارها كل الخير .
هي حصن البلاد … ضد الاستعباد … والخضوع للغير .
بتحمي الاقتصاد … من كتر الاستيراد … وقلة التصدير .
وهي أكيد إصلاح ... وبدونها أي سلاح … مالهوش أبدا تأثير .
******
فيها الجمال ماحلاه ... عشان من صنع الله ... وطبيعي بدون تزوير.
بتعلم الإنسان … إزاي يكون فنان … وروعة التعبير .
بالزرع في البستان... والأرض والحيوان … والزهر والعصافير .
*******
وتنشط الوجدان … وتزود الإيمان … وتصحّي في الضمير .
وتخلي الفكر يقوم … من الثبات والنوم … للبحث والتطوير .
وتوظف العلوم … في كل لحظة ويوم … في مجالات كتير.
خضر وكمان محاصيل ... والزينة والتجميل ... والطب والتعطير .
وماشية وغنم ودواجن .. وأخشاب للمساكن .. وقطن وصوف وحرير.
********
وهي كمان ثقافات … بتبني الشخصيات… بعلم وفن غزير .
ونقلت البشرية … من الحياة البرية ... لبداية التعمير .
>>>>>>>
وبداية الانتماء … والحب والوفاء … للوطن الكبير .
راسمالها مايّة وأرض … وعزيمة مالهاش حد …
و مافيش أبدا حد… يمنع كرم الأرض … وخيرها الوفير .
هي الحياة كلّهــا … ولازم نقدم لهــا … الحب والتقديـر.
*******
* بلدنا مش فقيرة *
بيقولوا بلدنا فقيرة ... ودا بيسببلي الحيرة .
إزاي؟! دي كنوزها كتيرة ... وتكفي قدنا مِيــّــة .
**********
فيها المايّـة و زراعة ... وأهم قناة بحرية .
وكمان بترول وصناعة ... وادين وعقول بشرية .
**********
ومتاحف فيها أثار ... بيجولها كتير زوار .
يدفعوا بجنيه ودولار ... علشان كلمة مصرية .
>>>>>>>>
وجمال بيسر العين ... في جناين أو بساتين .
والأشجار عالصفين ... للرايحين والجايين .
وكمان اكبر بحرين ... بالثروات البحرية .
وجبال بين الخليجيين ... وجناين تحت المايّـــــة.
وشواطيء في الفصلين ... للتصييف والتشتيّة .
وأماكن فيها رمال ... وقيمتها أكيد ذهبيّة .
يدفعوا فيها الأموال ... لفوايدها الطبيّة .
**********
حتى الصحرا بتقول ... أنا أرض ياناس زراعية .
والنيل يجري على طول ... وياريته يعدّي عليّـــه .
ويقولوا بلادنا فقيرة ... وأتعجب انا م الحيرة .
إزاي دي كنوزها كتيرة ... وتكفـّــي قدنا 100 ميّــه .
وان كانت مصر فقيرة ... يبقى العيب فيكو وفيّــه .
**********
* الوقت من ذهب *
الوقت من دهب .. وقيمته تتحسب .. وسرقته جريمة ..
دايما بترتكب .
*********
صاحبك قالك ثواني .. أنا جاي استناني .. والثانية تجر الساعة ..
ويضيع منك دهب .
*********
سواق أوتوبيس يتأخر.علشان كان رايح يفطر. شوف كام راكب يتأثر. بالوقت اللي ذهب .
*********
دكتور اتأخر ساعة .. ولا قال أسف ياجماعة .. وكأن التأخيرعادي ..
مابيسواش الدهب .
*********
برنامج تليفزيون .. يتشاف من كام مليون .. يسرق منهم أوقات ..
تسوى المليون دهب .
*********
وموظف بالمعاشات .. يطلب في المستحيلات .. والطلبات قبل ما تكمل العمر يكون ذهب .
*********
مسئول ويقول فرمان .. اللجنة تبقى لجان .. ويضيــــّع في الأوقات .. أوقات تسوي الدهب .
*********
ياناس عقلي ذهب .... لما اشوف الدهب .. مرة ف بلدنا ضايع ..
وف مرة يتنهب .
*********
الوقت من دهب .. وقيمته تتحسب .. وسرقته جريمة ..
دايما بترتكب .
*********
* عن الثروة البشرية *
يه الثروة البشرية .... دايما عندنا منسيّـــة .
مع انها أكبر ثروة .... ربنا عطاهالنا هديــــــــــة .
*********
قالوا زمان أجدادنا ..... الخير كله ف أولادنا .
ولاكل كنوز الدنيا ............... من غير أولادنا تفيدنا .
والإيد على إيد بتفيد ........... والرزق أكيد حيزيد .
*********
قالوا الثروة البشرية ..... بالتعليم والتربية .
ثروة تجيب لنا ميت (100) ثروة ........... لبلدنا وللبشرية .
*********
قالوا الوصفة الذهبية ........... للإصلاح والتنمية .
هي الأرض مع الماية ........... ويـّــا الثروة البشرية .
وعندنا أرضنا والماية .......... بتكفي قدنا مية .
وكمان قوة بشرية .......... تقدر على كرة ارضية .
*********
وناس معدنها اصيل ............... شاربين من ماية نيل .
منهم محفوظ وزويل ....... وكتير غيرهم وكتير .
*********
قالوا كمان أجدادنا ........ ما نستكترش عددنا .
والخيرلسه في بلدنا ........ محتاج بس لمجهودنا .
*********
يارب اكرمنا وزيدنا ....... من خيرنا ومن أولادنا .
وتقوينا وتحمينا ...... من كل اللى ينسينا -
********
* عن الحضارة *
ياخواننا الحضارة .... مش تماثيل وحجارة .
ولا هي ّ طرق وكباري ......... ولا هندسة وعمارة .
*********
هي حياة إنسان ......... عايش ف سلام وأمان .
مايقولش كنا وكان ...... وما يلعنش زمان .
*********
انسان مابينحنيش ........... علشان لقمة عيش .
وكرامته دايما صاحية ....... ومايستناش بقشيش .
*********
رأيه من جوا راسه .......... أكله من شغل فاسه .
مايخافش حصار ولا نار ....... ويقوم لو قطر داسه .
*********
انسان مليان إيمان ........ ويحب أخوه الانسان .
طيب وقت اللزوم ...... ولزوم تلاقيه بركان .
*********
انسان عنده الأخلاق ... وما يعرفش النفاق .
ولاحتى كلام متزوق ........ بالحب وبالأشواق .
>>>>>>>>
الحضارة ريف ....... وكل شيء نضيف .
وجمال أشكال والوان ........ من غير كذب وتزييف .
*********
الحضارة شوارع ...... فيها النظام والذوق .
بيريح اللي ماشي ...... ويريح اللي يسوق .
*********
الحضارة حاضر ... وناس ضميرها حاضر .
يسمعوا صوت الحق ....... لازم يقولوا حاضر .
*********
هي كمان القوانين .... ف قلوب البني آدمين .
مابتحتاجش المحاكم ........ وحقوق تبلعها سنين .
*********
ياخواننا الحضارة .... مش تماثيل وحجارة .
ولا هي ّ طرق وكباري.. ولا هندسة وعمارة .
*********
* سنة 2100 *
سنة ألفين وميـــه ..... العالم كرة ارضيــــــة .
تجمعهم أكبــــــر وحدة ..... الوحدة الانسانيــــــة .
**********
و حدود مالهاش وجود ..... ياريت ياريت ما تعود .
مع انها يـــــامـــــــا زمان ..... ماتوا علشــانها جدود .
**********
سنة ألفين وميــــــــة ..... الطاقة بقت شمسية .
وف كل مكان موجودة ..... زي الهوا والماية .
*********
والأجهزة المحمولة ..... قد الترمسة والفولة .
والطاقــة بدون أسلاك ..... في الهوا والفضــا منقولــة .
************
سنة الفين وماية ..... الأرض قليلة و غالية .
وأراضينا الزراعيــــة ..... يمكن تتباع بالشاليـــة .
**********
سنة الفين وماية ..... كل الزراعات محمية .
و مفيش مجنونـــة يا طماطم ... ولا عاقلة يا ملوخيــة .
**********
والهندسة الوراثية ..... تعمل أصناف زراعية .
إيشي فاكهــة من غير بذرة ..... وفراخ حية مخليـــة .
>>>>>>>>
أما عن العجول ..... شكلها بقى مش معقول .
لا قرون ولا حتى ديول ..... ولا فيه لزمة لرجول .
************
بقها على طول مشغول ..... والمعدة شديدة قوية .
تاكل أكلها على طـــول ..... تعمله لحمة مشفيــة .
**********
سنة الفين وماية ... كلمات ليها بقية .
وبالأمل نتقابل .. في الأيــام اللي جايـــة .
**********
* ملعونة المعونة *
ملعونه المعونة ............ اللي تخليك كسلان .
ملعونه المعونة ...... لو كان لها أتمان .
ملعونه المعونة .........اللي تسكت لسان .
ملعونه المعونة ............ اللي بتسرق زمان .
ملعونه المعونة ............ م اللي بيخدعونا ...
وعايزين يحبسونا ...... في وهم الأمان .
**********
* الدرس الخصوصي *
( رد على محاولة تجريم الدروسية )
الدرس الخصوصي .. بريء من التجريم ..علشان دا نظام تعليم .
علم كتير علماء .. وكتير وكتير عظماء .. في الزمن القديم .
***********
وضروري ف كل زمان.. وضروري ف كل مكان.. وف كل نظام تعليم .
زيه زي العيادات .. ويــّـا المستشفيات .. بالمنطق السليم .
***********
بيعالج الصعوبات ..... وتفاوت القدرات ..... ودا شيء أكيد عظيم .
أما العيب الشديد ..هو المخ الحديد .. والسرعة في التعميم .
لويغلط مرة حد ..... تنقلب السما عالأرض ..... وتكتر المظاليم .
***********
وياريت تفهم شوية.. وتسمعلي الكلمة ديّة .. ياوزير التفهيم .
ان الدرس الخصوصي .. ضروري وأساسي .. لكن محتاج تنظيم .
************
* من يوميات موجه تربية زراعية *
( في مدرسة حكومية بحي شعبي )
أنا مرة من المرات ..... رحت المدرسة .
فيها التلات فترات ..... صبح وضهر ومِسا .
وكان معايا خطة ..... زراعية كويسة .
************
(( نزرع لنا هنا كام فلــّـة ..... وهنا نزرع نرجسة ))
************
ونزلت فصولها أزورها ..... لقيتها مكدّسة .
************
شفته من كتر الزحمة ..... وكأنها كتلة لحمة .
والروس مترصصة .
والحصة نص ساعة ..... نصّها اسكتوا ياجماعة .
وزعيق ونرفزة .
************
ولقيت نفسي متحيـّــر ..... ألف ورايا وأدوّر .
فين ياناس المدرّس ..... والا المدرّسة ؟
************
ياريت اديله مكافئة ..... أو حتى كلمة شفقة .
على صبره وقعاده ..... جوّا المدرسة .
************
ونسيت خلاص الفلـّـة ..... ونسيت النرجسة .
************
* ياللي انت غاوي خطابة *
ياللي انتى غاوي خطابة ..... الورقة معاك مطلوبة .
فيها المواضيع مكتوبة ..... بالثانية تكون محسوبة .
***********
ياللي انت غاوي خطابة ..... خليك ميزان حساس .
والكلمة اللي حتقولها ..... لازم تكون بمقاس .
متقاسة بكل حروفها ..... حتى كمان الأنفاس .
**********
واعرف ان الحكمة ..... دايما ف أصغر كلمة .
واعرف كمان إن التكرار ..... زي البهار يبقى بمقدار .
***********
ياللي انت غاوي خطابة ..... خليك طويل البال .
واقبل كل استجابة ..... وكل ردود الافعال .
راح تنجح في الخطابة ..... وتحقق المحال .
***********
* بغبغانات *
بغبغانات دول بغبغانات ... اللي يرددوا في الكلمات .
**********
كلمة يقولها بتوع أمريكا ... قوام تتردد بالمزيكا .
كلمة يقولها الناس ف أوروبا ... يبنوا عشانها قصر بقبة .
حتى اللي بيتقال في الصين ... برضه وراه بيقولوا أمين .
كلمة شمال مع كلمة يمين ... هو دا حال البغبغانات .
**********
* ليه الافتعال *
ليه بس الافتعال ........ في الشعر وفي الازجال .
راح نضرب الأمثال ........ واشهدوا عاللي بيتقال .
*********
واحد وخلاص إنهار ........ ودموعه تسيل أنهار .
ودا كله عشان القافية ........ تبقى نهار ف نهار .
*********
واللي يألف كام بيت ........ والبيت توأم للبيت .
تسمعه وتقول ياريت ........ كان قال بس أنا حبيت .
>>>>>>>>>>>
واللي يرقــّص في الوزن ........ في حكاية مالهاش وزن .
دا الواحد يسمع طبلة ......... أحسن من أحسن وزن .
**********
((خد عين مني وطل عليـّه ........ وخد الاتنين واسأل فيّـه ))
حسيت انها مش اغنية ........ وكأنها مسألة حسابية .
**********
(( مابحبـّش حد الا انت ....... ولا نفسي كمان ياحياتى )) .
حب ده والا كراهية ........ للناس ولكل الدنيا .
**********
(( حبـّك شال الأنانيّة ........ خلّـّى مكانها الحنيّة )) .
إزاي من شيلة وحطـّة ........ أغنية تكون عاطفية .
**********
مش علشان وزن وقافية ........ نلزق كلمات بالعافية .
وياما معاني مفيدة وشافية ........ أجمل من غير وزن وقافية .
*********
ليه بس الافتعال ........ في الشعر وفي الازجال
دي الكلمة الحلوة بتوصل ........ يمكن قبل ماتتقال .
**********
* عجبت كثيرا *
عجبت كثيرا لأعجب العجب ... لزمن ٍ حقائقه تنقلب .
حقيقةُ شهر ٍ لأجل الصيام .... رأيته شهراً للـّـهو واللَعب .
*********
رمضانٌ أم هوالمهرجان .... الغناءُ فيه والرقصُ والطرب .
وصوم يخفف عبء الطعام .... أرى الطعامَ من كثرته عطب .
أصومٌ يهذبُ فينا النفوس ؟ .... أم أنه صومٌ يلهبُ العصب ؟ .
**********
وفي كل شخصٍ ترى الازدواج .... ما بين قولٍ وذنبٍ يرتكب .
وفي كل جمعٍ ترى الارتباك .... ويأتي العراكُ بما لا يحتسب .
**********
وكل البرامج استعراضات .... وفي الهيافاتِ نقاشٌ يلتهب .
برامج عن فن وفنانين ..... ما رأيت فيها فنّاً ولا أدب .
**********
وتأتيَ الفواصل بالاعلانات .... لأجل تجارةٍ وعرض ٍ وطلب .
ولم يبق إلا لتقطعَ الأذان .... بإعلانِ عن مهرجان العجب .
**********
ألا أعجب من هذا عجب ؟؟؟
**********
* النفاق *
بلدي ياأم الاخلاق .... ليه النفاق بقى داء ؟!
والداء لما بيتطــّور .... يقتل وكأنه وباء .
**********
أهلا ياسعادة البيه .... ليه مش بنشوفك ليه .
والبيه لما بيتدوّر .... يتقال اللعنة عليه .
**********
داحبيبنا وروحنا فداه .... بقلوبنا احنا ويــّاه .
وكلام حلو بيتكرر .... للي وراه واللي وراه .
وبدون عقلنا ما يفكّر .... كان دا شمال ولاّ يمين .
ولساننا بينطق سكّر.... ويقول للكل أمين .
وطريقنا قوام يتغيّر .... ونعيش على طول تايهين .
**********
أصوات للانتخابات .... رايحين بالاوتوبيسات .
علشان ينجح حنكورة .... ويكون له كمان كرامات .
و أسامي كتير بالقايمة .... الحلوة تشيل معطوبة .
ومفيش شيء مالهوش لزمة .... ودي حسبة أكيد محسوبة .
معروف مين اللي يصقف .... وبدونه الحال يتوقف .
على كام واحد بيعارض .... على كام دكتور ومثقف .
>>>>>>>
تمثيل بس ف تمثيل .... نملة تمثل دور فيل .
والاصوات بالملايين .... بيقولوا الفيل دا اصيل .
وكمان له شجرة عيلة .... مختومة بختم الفيل .
******
ومكاتبنا الحكومية .... فيها النفاق بقى مايّة .
اللي بكلمات تتقال .... أو على أوراق رسميّة .
وياعيني على الشغال .... ويابختهم الحراميّة .
**********
واللي بيجري وملهوف .... خايف ليفوته الفرض .
وضميره مايعرف خوف .... ولا يعرف يوفي الوعد .
وان قلت له سد الدين .... تلقاه جاهز بالرد:
دانا حاجج بيت الله .... وماكلتش أبدا حد .
**********
حتى كمان الاشعار .... فيها النفاق بيزيد .
من قبلك دقنا مرار .... بقدومك شفنا العيد .
شعراء أصبحوا تجّار .... في المدح وفى التمجيد .
بيفصّلوا في الأشعار ...... حسب الزبون مايريد .
**********
بلدي يام الأخلاق .... ليه النفاق بقى داء .
والداء لما بيتطور .... يقتل وكانه وباء .
**********
* ليه اللف ودوران *
كلمة بقولها بعنوان .... ليه اللف ودوران ؟!
ودا طبع غريب ف بلدنا .... محتاج وقفة شجعان .
**********
أول كلامي ياناصح .... ليه بتلف وبتدور .
خليك في كلامك واضح .... حتلاقي طريقك نور .
أما ان درت ولفيت .... حتعيش على طول بتدور .
ومكانك جنب الحيط .... زي التعابين ف جحور .
**********
لو مثلا يوم حبّيت .... قول أنا حبّيت على طول .
وان جيت مرة مليّت .... من حقة برضه تقول .
مش عايزك يوم تمدحني .... وتذمني لما أغيب .
وان جيتلك مرة اعاتبك .... حتركبنى ميت عيب .
**********
اكرهني ياصاحبي وقوللي .... حنقول الحب نصيب .
وحتفضل صاحبي تماللي .... ومسيرك تبقى حبيب .
لكن بقى لو تجاملني .... وتخدعني دا اكبرعيب .
>>>>>>>
ياصاحبي الدنيا دي فانية .... مش مستاهلة الاكاذيب .
دي الكذبة بتولد كذبة .... وتعيشنا ف تعذيب .
**********
ياصاحبي الدنيا دي سوق .... ناس وبضاعة وأموال .
فيها اللى بيصدق يكسب .... ويعيش مرتاح البال .
أما اللي بيكذب يتعب .... حتى ولوكسب المال .
من كذبة لكذبة بيهرب .... ويعيش دايماً مطرود .
مطرود من ناسه ونفسه .... وطريقه أكيد مسدود .
**********
ودي كلمة أخيرة بقولها .... عن اللف ودوران .
طبع يأخر طبع يدمر .... أخطر من مليون بركان .
**********
* جنون المحمول *
ياحلوة وزي البطة ... ومعاكي كمان محمول .
حطي المحمول في الشنطة ... أحسن كده مش معقول .
وافتكري تعلقي يافطة ... بتقول عندي المحمول .
**********
والعايق أبو كرافته ... ومعاه المحمول على طول .
ماشي من حتـّة لحتـّه ... عامل دايما مشغول .
والمحمول عنده أونطة ... لا بيسمع ولا بيقول .
**********
ودا واحد جاتله زغطة ... يبعت رنة محمول .
والتاني يخلص كارتة ... عالحدوتة وعالنكتة .
والمحمول أصبح نكتة ... الضحك عليها يطول .
**********
المحمول دا ياخواننا ... والله ياناس تليفون .
وفوايده كتير تنفعنا ... ونعدّها بالمليون .
وكفاية انه يجمّعنا ... ويصغـّر بيننا الكون .
لكن بقى مالهوش معنى ... لو نستعمله بجنون .
**********
* جنون الكوررة *
الكورة بس رياضة ... فيها كل استفادة .
للي بيجري وبيشوت .
**********
لكنها مش رياضة ... للي بيعبدها عبادة .
وبيقعد لها مربوط .
**********
شوطة تخليه بيزقطط ... ويقوم وكمان يتنطط .
وينفجر بالصوت .
**********
وان جاب فريقه جون ... تلقاه يفرح بجنون .
والعقل قوام بيفوت .
**********
أما ان كان فيه الجون ... حيكون دا آخر الكون .
وكأنه خلاص حيموت .
**********
وبعد الماتش يجادل ... بالحق او بالباطل .
وكلام كدا مش مظبوط .
**********
الكورة بس رياضة ... فيها كل استفادة .
للي بيجري وبيشوت .
**********
* تدخين الهباب *
ليه بس ياشباب ... بتدخنوا الهباب .
*********
واحد وف بقه بسجارة ... ماعرفش انا ليه فرحان .
لو يفهم كان يتدارى ... علشان مخه التعبان .
مافهمش ان السيجارة ... تستعبد الانسان .
وتسببله الخسارة ... وبداية الادمان .
**********
ودي حلوة وزي البطة ... تشفط بالشيشة الشفطة .
والبق يجيب دخان ... والحلوة بقت شكمان .
وتشد تشد تكركر ... وأسمع واشوف المنظر .
واستغرب أنا واتحيّر ... دي مؤنث ولا مذكر .
***********
والكلمة لـ هو وهي ... الصحة دي أغلى هدية ..
من ربنا للإنسان .
واللي يبدد ف هدية ... هو أكيد الندمان .
********
* سواق المشروع *
كلمة باقولها للسواق ... اللي ما يعرفش الأخلاق .
*********
سواق مشروع زي المسروع ... وكأنه خلاص حيموت م الجوع .
في شمال ويمين زي المجانين ... ولايعرف شيء اسمه الممنوع .
**********
في الزحمة كمان زي الرهوان .... يكسر اشارات ويطير طيران .
لولا ستر الله والناس شايفاه ... شوف كان داس في اليوم كام إنسان .
**********
له طبع غريب ينطق بالعيب ... حتى ولو كان هو الغلطان .
**********
وكتير بيقسم في المشاوير ... علشان الاجره تبقى اتنين .
وينزل ناس ويطلع ناس ... وكأن الناس مش بني آدمين .
**********
وان كان لك عنده شلن ينساه... وكمان ينسى مية وياه .
وياويلك لو حتطالب بيه ... يعملها حكاية لخلق الله .
ويقول يا جماعه شوفوا البيه ... على بس شلن برقلي عنيه .
>>>>>>>>
وأغاني عجيبة يشغلها ... احسن منها صوت المواتير .
تسمعها قوام تتخيلها ... متسجلة من إسطبل حمير .
وان قلت له بس توطي الصوت ... ينطق بكلام كدا مش مظبوط .
ويقول معلش يا عم الشيخ ... اصل انا من غير الدوشه أموت .
**********
دا حرام ياخد رخصة سواق ... و لا حتى كمان رخصة إنسان .
**********
* سواق التاكسي*
كلمة باقولها للسواق ... اللي ما يعرفش الأخلاق .
**********
سواق تاكسي ينقي الناس ... بدون ضمير وبدون إحساس .
(( دي واحدة حلوة مفيش مانع ... ودي وحشة لازم تتداس .
ودا طلب آخر الشارع ... أشيله أنا عالعين والراس .
>>>>>>>>
خواجة دا وياريت ناخده ... فلوسه حلوة أكيد تتباس .
أما ابو عكاز ربنا ياخده ... مافيش وراه غير وجع الراس )) .
**********
(( عجوزة دي حتعطلنا ... ومش بعيد ونش يشيلنا ...
يفيدنا ايه لو تدعيلنا ... وفي الحساب حتزعلنا .
**********
دي واحدة شكلها غلبانة... قال ايه ورايحة زعربانة .
روحي الشئون لجتماعية ... جايز ينوبك عربية .
ناخد بدالها سعادة البيه .... العز باين جوا عنيه )) .
**********
(( ودا خطيب ويّـــا خطيبته ... يدفعلي طبعا من غير ليه .
أما التخينة ما تنفعشي ... واكلالها كام حلة محشي ...
دي لو حتقعد عالكرسي ... التاكسي يحلف ما حيمشي )) .
**********
(( عيان ياعيني بيتسند ... يمكن يموت في العربية .
لو مات بقى مين يحاسببني .... يوم القيامة الضهرية ؟ ))
**********
(( واللي يشاورلي بعياله ... ماعرفش ايه خيّب حاله .
لو كان لوحده لوصلته ... يستاهل اللي بيجراله )) .
>>>>>>>>
(( كمان دي حامل وحتولد ... ومعاها راجل وولية .
لا دول تلاتة ماينفعشي ... حيبقوا كام بعد شوية )) .
**********
(( ودا احترت أنا ف امره ... أركبه وأمري لله .
لو كان حكومة أأمن شره ... ولو زبون يبقى كسبناه )) .
**********
أما الحساب آه منه حساب ... والقصد أقول آه منه عذاب .
مشوار وعايز بس جنيه ... ولما تدفع خمسة جنيه .
تقف زليل قدام الباب ... تستنى الباقي جنيه ف جنيه .
وغير كلام مالهوش لزمة ... أكيد أكيد حترد عليه .
واللي يقوللك : (( روح امشي ... والباقي عمره ماحيغنيه .
ونصيحة تبقى معاك فكة ... ربنا يكفيك شر العركة )) .
**********
الحل ياناس مش فكة ... ولا زحمة ولا طول السكة
الحل ياناس الأخلاق ... أهم من رخصة سواق
**********
* مشاوير *
أبدا منين ولاّ منين ... من بعد ما طقيت نصين ...
من مشاوير كانت صعبة ... ف بلدنا نور العين .
**********
كانت البداية ... مكتب موظفين ...
الطرقة كبيرة وضلمة ... وأكيد مسروقة اللمبات .
ومكاتب مليانة وزحمة ... بالرجالة والستات .
أوقاتهم كلها حكايات ...
عوضين خلاص اتجوز ... حسنين ياعيني مات .
**********
واللي ماسك جرنانه ... بيفِر في الصفحات ...
واللي قاعد مع حاله ... بيحِل في الكلمات .
**********
واللي مهموم بيفكّر ... إزاي حيسد الدين ...
واللي ف مكتبه بيشخّر ... ظابط ساعته على اتنين .
**********
أما بتاع البوفيه ... ماعرفش أنا زعلان ليه ...
مع انه ... رزقه ف رجليه ... والشاي البايت يغليه .
سمعته كان بيكلم نفسه ... ويتعارك مع دبّان وِشه .
ويقول البيه ابن الايه ... شهرين ما دفعشي اللي عليه .
**********
وموظف تاني لسانه طويل ... شغلته يطلب ف المستحيل ...
بجنيه واحد يتغير ... ويقول لك امرك ياجميل .
**********
كان مشوار صعب عليّـه ... أنا قلت أروح الكليّة ...
أرتاح من الهم شويّه ...
دخلت جوا ف مدرج ... قعدت ساعة أتفرّج ...
الدكتور لسه ماجاشي ... والكل قاعد بيهرّج .
>>>>>>>>>>>>
دخلت جوا الكافتيريا ... لقيت هناك ما يسر العين ...
كل فلانة معاها فلان ... والضحك يملا كل المكان ...
مش ناقص بس الا "البيبسي" ... علشان يحلو الكلام .
ودا شاب لئيم بيدور ويلف ... بين البنات وبيقرا الكف ...
وعيونه زايغة بتتمنى ... حاجة تتقرا بعد الكف .
**********
والبنطلون حلو محزّق ... ملبوس دا ولا متلزّق .
ودا فستان شفاف شفاف ... وتحته ياما حاجات تتشاف ...
تشوفه واحدة تقول دا جنان ... حنجيب احسن منه كمان .
**********
وياما شفت كتير شبان ... يتعازموا بشاي ودخان ...
واللبس برضه على الموضة ... ومهرجان اشكال والوان .
والدكتور لسه ماجاشي ... وماحدش أبدا زعلان .
**********
أنا قلت اروح اشوف اطفالنا ... دول مستقبلنا وأملنا ...
دخلت جوا ف مدرسة ... بوابة حلوه كويسة ...
لكن فصولها المكدّسة ... شفتها م الزحمة ... كتلة لحمة ...
وروس كتيرة ... مترصّصة .
**********
أخيرا رحت هرم خوفو...يمكن أرتاح لما أشوفه .
كلمت خوفو وكلمني ... لقيت كلامه طمنني .
قاللي : ياحفيد أحفادي ... المصري دا انسان مش عادي ...
الصبر عنده أحلى صفات ... يعدّي بيه كل الأزمات .
ولوتبص لأهرامي ... تعرف كتير عن أيّامي ...
ويوصلك كل كلامي ...
*******
* إحكيلي ياآثار *
احكيلي ياآثار ... بالنثر والاشعار .
عن أعظم حضارة ... مليانة بالأسرار .
********
ياحجارة الاهرام ... ياحكاية في النظام .
قولي العلم ف زماننا ... ما كان ورق وكلام .
********
كلمني يابوالهول ... ساكت ليه مش بتقول :
ان جدود جدودنا ... مش زي ولادنا دول .
********
صاحبي يا إخناتون ... ياللي أطيب فرعون .
أوصف لنا الضمير ... إزاي كان سيف مسنون .
********
شايفك انا ياتوت ... شكلك ليه مش مبسوط
بتقول فين راح دهبنا ... والا الدهب بيموت .
********
جاوبني يامنمحات ... يا بو الاصلاحات .
ماكانش في أيامك ... أختام وتوقيعات .
********
ياحجارة الأهرام ... قولي الزمن دوار .
والليل مهما طال ... لازم بعده النهار .
********
* انقذوا بغداد *
لما سألت قلبي ..... إيـــه احلى البلاد ؟.
رد عليّه قلبي : ..... أنا حبيت بغداد .
فيها ماعرفت غربة ..... ولا حتى البعاد .
********
في شارع الرشيد ..... لقيت شارع فؤاد .
والنيل شفته ف دجلة ..... وشربت من الفرات .
وزقايق المنشية ..... مشيتهم أنا ف بغداد .
********
حسّيت بالناس قرايبي ..... وملامح الاجداد .
ودمّهم ف قلبي ..... والاصل له امتداد .
وعزّة نفس عالية ..... بتخليهم شداد .
شداد والقلب أبيض ..... مابيعرفش السواد .
وصار منهم صحابي ..... ودام بيننا الوداد .
********
والآثار القديمة ..... تحكي تاريخ بلاد .
تاريخ دولة عظيمة ..... والعاصمة بغداد .
********
وحضارة لسّه حيّة ..... جوّا طبع الولاد .
طبع النخيل العالية ..... في الصبر و في العناد .
الصبرعالشدايد ..... والظلم مهما زاد .
*********
بغداد شايفك حزينة ..... انوارك ما بتتقاد .
كام أم تبكي وتبكي ..... مش لاقية لابنها زاد .
واللي بيحكي ويحكي ..... وكل الحكايات تنعاد .
بغداد كام صوت بيشكي ..... لقلوب زي الجماد .
وكام جريح بيصيح ..... يالا انقذوا بغداد .
********
إيه ذنب طفل صغيـّــر ..... بيورث الامراض .
أيه ذنب شعب يعاني ..... من غلطة من أفراد .
********
عشر سنين وزادوا ..... وف كل يوم ضحايا .
لو كان ضمير حسبها ..... كان قال حرام كفاية .
دي بلاد عشان ضحيّة ..... تعمل مليون حكاية .
لكن صياح بغداد ..... خلاص بقى معتاد .
********
بغداد خلاص لا تشكي ..... إلا لرب العباد .
ابنك بكرة حيكبر ..... وقوته تزداد .
وحترجعي منصورة ..... وأنوارك تتقاد .
وحترجع العروبة ..... دولة ومش بلاد .
بكرة التاريخ يتدوّر ..... واسمك يرجع ينور .
وترجعي بغداد .
********
* فين ياضمير العالم فين ؟ *
فين ياضمير العالم فين ... وحقوق ضايعة بقالها سنين .
سنين وذادت عن خمسين ... والصبر مات عند الملايين .
***********
شباب بيأسه يضحي بنفسه ... عشان يقول تحيا فلسطين .
واللي بمرارة بيحدف حجارة ... لكن ودان العالم طين .
***********
حتى اللغات بقت الدولارات ... والعدل أصبح له ميزانين .
لا حد قال ليه الهجمات ... بالطيارات عالبني آدمين .
***********
لكن لا لوم ولا أي عتاب ... والعالم ف ادين ملاعين .
يتحكموا بشريعة الغاب ... ويكسروا كل القوانين .
ويرددوا ارهاب ارهاب ... ويقتـّلوا في المدنيين .
***********
حزين أنا والله حزين ... سؤال تعبني بقاله سنين :
" فين يا ضمير العالم فين ؟ "
**********
؟؟؟
* فزورة عن الشاعر السيد الخشاب *
فزورتي شخص من الأشخاص ... في قلبي له حب و إخلاص .
اسمر وقلبه زي الفل ... مليان محبه لكل الناس .
ملامحه مابتعرفش الغل ... والبسمه على وشه بتتباس .
أشعاره مفهومه للكل ... فيها الجمال فيها الإحساس .
*************
تسألني دا غني ولا فقير ... أقول رصيده قلوب الناس .
وعنده أجمل رباعيات ... كلامها مترتب بمقاس .
وتسمعه يقولها بتأنّي ... تقول أكيد أنه بيغني .
*************
عزيز ف طبعه وكريم وجيّد ... واسمه جوّا ف قلوبنا سيّد .
سيّد بذوقه سيّد بأدبه ..... وحقيقي سيدنا وتاج الراس .
*************
* فزورة عن الشاعر عادل سند *
فزورتي عن انسان انسان ... اسكندراني من الجدعان .
نحيل قوامه وطويل كمان ... وفي الزجل فنان فنان .
*************
أصيل واصله عليه يبان ... دخل قلوبنا اخد مكان .
وصوته بين الألوف يبان ... كأنه من ثروة بركان .
************
في الحق عنده أطول لسان .... وفي المحبّة يفيض حنان .
عمري ماشفته ف يوم هيمان ... من ضحكة أو هزّة فستان .
***********
وشال همومه قبل الأوان ... عشان يقدمها ف ديوان .
والناس تحبه وده عشان ... في طبعه دايما الاتزان .
والعدل عنده هو الميزان ... وفي الشدايد سند أمان .
************
* فزورة عن الشاعر د محمد شكري *
دكتور بأخلاقه وبعلمه ... وباحترامه لكل الناس .
وسيم بشكله ... حكيم بعقله ... مظهر وجوهر زي الماس .
في الشعر فارس ... موهوب ودارس ... ممتاز واكتر من ممتاز .
كلامه دافي ... بلسم وشافي ... من قلب صافي ... زي الازاز .
في كل ندوة ... أستاذ وقدوة ... وشوية لما نقول أستاذ .
*************
مش بس شاعر ... دا بحر واعر ... عايز له ولا مليون غواص .
بحر الثقافة ... بحر الفنون ... بحر المحبة والاخلاص .
فصيح لسانه ... مظبوط ميزانه ... يوزن معاني قبل الحروف .
طبيب يداوي ... كل البلاوي ... بكلمة حلوة تسوى الألوف .
ياريت الاقي كلمة تعبر ... عن احترامي وشكري ليه .
لكن شكري ... دا مش كفاية ... دي بس كلمة تدل عليه .
***********
* فزورة عن الفنان صلاح جاهين *
بسم الله حنقول الفزورة ... انسان وفي قلوبنا له صورة .
بفنه ساكن أعلى المساكن ... فنان وشامل حقيقي نادر .
رسام وشاعر مليان مشاعر ... الثورة طبعه وكلامه ساخر .
*************
وفي الصحافة يترك علامة ... مع ان قوله ما كانش ياما .
وهي رسمة ويّا ابتسامة ... مفعولها أكتر من برشامة .
اسلوبه دايما بسيط وساهل ... وشغله باقي زي الجواهر .
***********
ومين ماشافشي أجمل ليلة ... وغنوة للريس حنتيرة .
تسمعها منه ... تقول كأنه ... مولود ف مولد ... وعاش ف حارة .
قدر يخلّي للصورة غنوة ... قدر يخلّي للغنوة صورة .
عرفتوا بقى مين صاحب الصورة ... اللي حكيتهالنا الفزورة .
***********
* من الفوازير النباتية *
رسالة با قولها ... لكل البني آدمين .
من شجرة عليها ... نقوش السنين :
فاكرين لما كنتوا ... لسه صغيرين ...
واضمكوا بظلي ... وتبقوا فرحانين .
وتاكلو من ثماري ... وتقولوا عليها تين .
ياريت تكــــــــونوا فاكـــــــريــــــن .
الحل : الجميز
*********
بين النخيل ... ماليش أبدا مثيل .
بشرة سمرا ناعمة ... بتقول أنا من هنا .
من النوبة المحبوبة ... من أسوان وقنا .
وكل فروعي أيادي ... بتدعي ربنا :
يا رب يكون لبلادي ... أحلى الثمر ...
وتترمي الأعادي ... بالطوب وبالحجر .
وتدوم أحلى الليالي ... وفروع النخل العالي ... بتحضن القمر .
وتــــــــــــدوم المحبة ... بين كل الأحبة ... ويحلو الســــــهر .
الحل : نخيل الدوم
**********
أنا بقولي ... بقول و اعيد ...
واحب اشوف ... الكل سعيد .
وكل ليلة ... في الدنيا عيد .
فيها الشموع بالفرحة تقيد ... وكل ثانية مولود جديد .
وخير بلــــدنا ... معـــاه بيزيـــد .
الحل : الحمص
*********
أنا مكاني ... بعيد عن الشجر ... بين التراب وبين الحجر .
ودايما بيقابلني ... صحبة من البشر .
بعيونهم يسألوني : ايه معنى الحياة ؟ .
و أرد انا عليهم ... بكلامي المختصر :
هي سكة سفر ... كل محطة فيها ... دروس وعبر .
درس عن اللي صام ... شهور وأيام ... وعلى المطر فطر .
و خلفاته معاه ... بتقول إن الحياة ... مش عايزة قولة آه ... ...
ويا بخت مــــــــن صبـــر .
الحل : الصبر
**********
ولأطفالنا الأحباء
* رفرف يا عصفور *
رفرف رفرف ياعصفـــــــــور مالك كدا لســـــــــــه صغيور .
عايزينك تكبر وتطيــــــــــــــر وتلقـّط غلــــــــــــــــه وشعير .
عايزينك تاكـــــــــــــل هم هم ماتسيبشي حاجة من المــــــم .
عايزين نسمــــــــــــع زقزقتك أول ماتجيلك ماممتــــــــــــك .
ياعصفور لمـــــــا ترفـــــرف كلنا وياك حنـــصقــــــــــــف .
رفرف رفرف ياعصفـــــــــور مالك كدا لســـــــــــه صغيور .
لحن Twinkle Twinkle little stare
******
* يــــــالا نغني يــــــالا نلعب *
يــــــــالا نغني يــــــالا نلعب يـــــــــالا نقرا يــــــــالا نكتب .
توتـــــــــة حتحكيلنا الحدوتــة حدوتة حلوة مش ملتوتــة .
لما تقول لنا توتـــــــة توتــــه حنقول لها عيدي الحدوتـة .
نورة حترسم عالسبــــــورة قطة جميلة بتلعب كـــــورة .
والشجرة عليها العصفــورة قرحانة بتضحك للصــــورة .
دينا تقول لنــــــــــــا يالا بينا جنينيتنا دي أحلى جنينــــة .
فيها الورد يبص علينــــــــــا وشجرها بيصقف لينـــــا .
يــــــــــالا نغني يــــالا نلعب يـــــــــــالا نقرا يالا نكتب .
**********
* يا خروف *
- ماء ماء .
- ياخروف ... عندك حبة صوف .
- أيوه أيوه ... عندي أجمل صوف ... علشان صاحبي اللي رباني ... يعمل منه بطانية صوف .
**********
- كاك كاك .
- يابطة ... عندك حبة ريش .
- أيوه أيوه ... عندي أجمل ريش ... علشان صاحبي اللي رباني ... يعمل منه مروحة بالريش .
**********
- كك كك ... كك كك .
- يا فرخة ... عندك حبة بيض .
- أيوه أيوه ... عندي أجمل بيض ... علشان صاحبي اللي رباني ... ياكل منه ويملا البيت .
**********
* إحنا الأطفال الحلوين *
إحنا الأطفال الحلويـــــــــــــن إحنا الورد مع الياسميــــــــن .
عايزين مصر بلدنا جنينــــــة فيها الهوا من غير دخـــــــــان .
عايزين كل مدينة جميلــــــــة من غير لخبطة في الألــــــــوان .
مش عايزين دوشة تزعلنـــــــا عايزين أحلى غنا والحـــــــــان .
عايزين احسن أكل ومايــــــــــة عايزين كل حياتنا أمـــــــــــــان .
إحنا الأطفال الحلويـــــــــــــــن إحنا الورد مع الياسمـــــــــــين .
**********
* حـــــــــــالو يا حـــــــــالو*
حــالو يا حـالو ..... رمضان كريم يا حالو .
*******
إدينا جنيه أو ربـع جنيه ..... ندعيلك بيه يا حـالو .
بندق أو لوز أو حبة جـوز ..... أو صوبع موز يا حـالو .
ترمس أو فول عمرك حيطول ..... وتعيش على طول يا حالو .
حبة قراقيش أو لقمة عـيش ..... ما تقولش مفيش يا حالو .
هات فرخة بريش تكــبر وتعيش ..... ما تزعلنيش يا حالو .
كحكــة صغيّـرة حلــوة مدوّرة ..... حتة سكّرة يا حالو .
********
حالو يا حالو ..... رمضان كريم يا حالو .
*******
* عيد الطفولة *
يا برتقـــــان أحمــــــــر وجديــد عيد الطفولة دا أجمــــــل عيــــد .
يا برتقـــــان أحمــــــــر وجديــد يا فرحة في قلوبنــــــــــــا بتزيد .
يا برتقـــــان أحمــــــــر وجديــد يا رب نلقى الكــــــــــــل سعـــيد .
يا برتقـــــان أحمــــــــر وجديــد يا بسمة نورها شمـس تقيـــــــد .
يا برتقـــــان أحمــــــــر وجديــد يا ضحكة هزت قلـب حديـــــــــد .
يا برتقـــــان أحمــــــــر وجديــد عيد الطفولة دا أجمـــــل عيـــــد .
**********
* أهلا بابا محجوب *
أهـــــــلا أهــــــلا بـابـــا محجوب حبك في قلوبنــــــا مكتـــوب .
حققت أحلامنـــــا الجميلـــــــــــة اللـــــــــــي كانت مستحيــــلة .
و إسكندرية في سنين قليلـــــــــة بقت عروسة في أحلــى توب .
من غير كلام من غير كتابــــــــة خليت قلوبنا تقول يا بــــابــــا .
ودا عشان كلك طيابــــــــــــــــة ودخلت يامــــــا كتيــــر قلوب .
أهـــــــلا أهــــــلا بابا محجوب حبك في قلوبنــــــا مكتـــوب .
**********
* يا ورد على فل وياسمين *
يا ورد على فل وياسميــــــن الله عليك يا تمـــــــر حنــــة .
ادي وردة حلوة على عودها خدها عشان ماما في عيدها .
اوراقها دي ولا خدودهــــــا ما حلاها لو مـــــاما باستها .
والفل عقد جميل ما حـــــلاه الله علـــــــــى ريحتـــه الله .
تشوفه ماما تقــــــــــول الله الله عليــــــــــــــــه الله الله .
وادي كمان صحبة ياسميــن رقة وجمال ترتاح له العين .
ودا عشان ست الحلويــــــن تفرح وحتبوسك بوستيـــن .
والتمر حنة دا من الجنــــــة علشان مامتنا تدعيلنـــــــــا .
واحنا برضــــــاها نتهنـــــى والفرحة تكبر في عيوننـــــا .
يا ورد على فل وياسميـــــــن الله عليك يا تمـــــــر حنــــة .
**********
* أحلى هدية *
أحلى هدية شافتها عنيـّـه ... زرعة صغيـّــرة جوا الشاليـة .
**********
يوم ورا يوم والاقيها بتكبــر... وافرح بيها اكتر واكتــر .
قلت يا رب اشوف لهـا زهرة ... وبذور ازرع منـها واكتـّــر .
**********
في كل يوم لازم اسقيـها ... واقف معاها الصبــح شويـّة .
و اقول لها يا صباح الـــخضرة ... واحس بيها ترد عليـّه .
**********
و اسيبها و اروح على مدرستي ... و اقول لها باي باي يا حبيبتي .
توحشني وارسمها ف كراستـي ... واكتب عليها أحلى هدية .
**********
أحلى هدية شافتها عنيّـه ... زرعة صغيـّرة جوا الشاليـة .
**********
* الساحر العجيب *
بيقولوا عني ساحر ..... والسحر دا شيء عجيب .
مع إني بس شاطر ..... وبحب شغلتي .
وعندي شنطة فيها ..... كل شيء غريب .
هي اللي طلعت بيها ..... من كل دنيتي .
***********
شنطة وفيها كتير حاجات ..... مترتبة احسن ترتيب .
دي علبة مثلا . جوّاها علبة ..... جواها علبة جواها فيل .
وعندي أجمل عروسه لعبة ..... أسحرها تتحول مناديل .
**********
ودي كوتشينة مفنطها..... بنفخة واحدة أرتبها .
وف ثانية اقدر أخفيها ..... ومن جيوبكم حنجيبها .
**********
ودي بالونة جميلة تفرقع ..... شوفوا ايه من جواها بيطلع .
أرنوب صاحي وعينه بتلمع ..... بيمشي و بيجري ويتدلع .
بس ياريت تصقيفة كبيرة ..... علشان انا لازم اتشجع .
>>>>>>>>>>
ودي كمان أحلى عصاية ..... في كل حتة ويّايا .
بلمسة منها على البذرة ..... قوام حتتحوّل وردة .
وبلمسة منها على البيضة ..... تفقس وتطلع لنا بطة .
والبطة ترجع للبيضة ..... واحطها جوا الشنطة .
**********
دي عصايتي أحلى عصاية ..... دايما تحقق لي منايا .
أفرح كمان وارقص بيها ..... على الأغاني الشعبية .
وأقول يا رب يخليها ..... دايما عصاية سحرية .
***********
وفي النهاية يا أحباب ..... ماتبصوليش كدا باستغراب .
السحر دا علم وتدريب ..... ولكل شيء أصل وأسباب .
وكل شاطر في شغله ساحر ..... واللي يقول غير كدا كداب .
**********
* حضانة الهلال الأحمر *
لو سألوني مين بتحبه أكتر حنجاوب من غير ما نفكــــــر .
حنقول طبعــــــــــــا ماما وبابا وحضانتي الهلال الأحمــــــــر .
********
فيها نعيش أحلـــــــى الأوقات ونغني ونقــــــــــول حكايـات .
حكايات بتعلمنا حاجـــــــــــات دلوقتي ولمـــــــــــا حنكبــــر .
***********
لو سألوني مين بتحبه أكتر حنجاوب من غير ما نفكــــــر .
حنقول طبعــــــــــــا ماما وبابا وحضانتي الهلال الأحمـــــــر .
**********
* حضانة المجد *
لما العصافير يــوم سألتنــا عن أجمـــــــــــل ورد .
قلنالها تعالي لحضــــــانتنا حضانــــــــــــة المجد .
ردت قالت عصفــــــورتنا حقيقــــــــــــــــي بجد ؟
حضانة المجد دي حبيبتنا حضانــــــــــــة المجد .
**********
* حضانة فروتي *
احنا العصافير الفرحانة ... بحضانتنا أحلى حضانة
بنغنيلها وبندعيلها .... وياريتكوا تغنوا ويانا
حضانتي حبيبتي حضانتي فروتي .... بالخير دايما كدا مليانة
زيك زي بابايا ومامتي .... بنحبك ياحضانتي " فروتي ."
********
* مدرسة الأحرار*
بين الخضرة والأزهــــار فراشة طايرة ليل و نهـــــار .
قلنا لها إيه الأخبـــــــــار قالت خلاص أنا عقلي احتـار .
**********
أطفال حلوة كبار وصغار في عنيــّـــه زي الأزهــــــار .
سألتهم على فين رايحين قالوا لمدرســــــــــة الأحرار .
***********
* حكاية الفيل المغرور*
كان و ياما كان .. في الغابة مكان .. مليان بالأرانب .
عايشين في أمان .. لا بيعرفوا الأحزان .. ولا حتى المتاعب .
ياكلوا ويشربوا .. و يجروا ويلعبوا ..
على ارض جميلة خضرا .. وكأنها الملاعب .
وف لعبهم يتشاركوا.. من غيرما يتعاركوا .. والمغلوب زي الغالب .
وف أكلهم يتقاسموا .. من غير ما يتخاصموا ..
علشان أخوات و قرايب .
ويباتوا في الجحور .. فى هنا وسرور .. زي كل الأرانب .
**********
ولكنها كالعادة .. ما بتدومش السعادة .. في غابة العجايب .
كان في الغابة فيل .. طبعا وزنه تقيل.. وف أول كل يوم ..
لما يقوم م النوم .. يزعق و يتتاوب .
ويمشي فرحان يتمختر .. من غير أبدا ما يفكر .. انه تحته أرانب .
ويدوس على الجحور .. ويكشفها للنور .. و تبتدي المصايب .
أرانب متعوّرة .. وجحور متكسّرة ..
تحوم عليها صقور .. و ديابة كتير .. وتعالب .
>>>>>>>>
وأرانب قاعدة تعيـّط .. وفيل فرحان بيزقطط ..
ويغني بقى ويقول .. كلام كدا مش معقول :
" أنا الفيل أبو زلومة .. اكبر واحد في الغابة ..
ماحدش يقدر يضربني .. ماحدش يقدر يغلبني " .
**********
- راح أرنب للفيل .. قال له : ليه يا فيل .. تعمل كدا فينا ..
كسرت ليه بيوتنا .. ضيعت ليه ضحكتنا .. وخليت حياتنا حزينة ..
مع اننا احباب .. وجيران ومش أغراب .. وأكلنا من الأعشاب
كلنا مع بعضينا ..
ياريتك بس يافيل .. ما تعديش فوقينا ..
علشان وزنك تقيل .. وكمان رجليك تخينة ..
ولما تدوس على حد .. تلزقه ف الأرض .. وتخليه عجينة .
رد الفيل وقال: أنا فيل الأفيال .. ما سمعشي كلام عيال ..
ابعدوا يالا في الحال .
وبقى يزعق ويقول .. كلامه اللي مش معقول :
" أنا الفيل أبو زلومة .. اكبر واحد في الغابة ..
ماحدش يقدر يضربني .. ماحدش يقدر يغلبني
روح اجري يالا يارنب .. مش عايز اشوفك تاني ..
شكلك بينرفزني .. وصوتك وجعلي وداني" .
>>>>>>>>
رجع الأرنب زعلان .. واشتكى للحصان .
راح الحصان للفيل .. وقال للفيل سلام .. ما ردش السلام ..
قال له: إيه يا حصان .. عايز إيه كمان؟
قال له: يا فيل حرام .. تزعـّل الأرانب .
رد الفيل وقال: يا خيبة الآمال .. إزاي يا حصان يا كبير ..
تسمع كلام أرانب ..
دول حاجة زي الترابة .. ويمكن قد الهبابة ..
ما يستاهلوش كلامنا .. ولا نشغل بيهم بالنا .
********
رد الحصان عالفيل .. وكان رده جميل .. قال له :
" إن الضمير .. هو اللي خلاني .. أسعى ف طريق الخير ..
ومن غير الضمير .. يروح الصغير .. في بطن الكبير..
و ماتنساش يا فيل .. يا بو الفهم القليل ..
إن كل كبير .. لازم يبقاله كبير " .
********
غضب الفيل المغرور .. و اتنطط زي التور ..
وبقى يزعق ويقول .. كلامه اللى مش معقول :
" أنا الفيل أبو زلومة .. اكبر واحد في الغابة ..
ما حدش يقدر يضربني .. ما حدش يقدر يغلبني " .
>>>>>>>>>>>>
رجع الحصان زعلان .. وحكى بالتفصيل .. كل كلامه مع الفيل ..
وقال حل جديد:" نبعت أسد شديد .. و أيديه زي الحديد ..
ولما يشوفه الفيل .. حيخاف بالتأكيد " .
**********
راح الأسد الشديد..اللي ايديه حديد.. وقال للفيل " سلام " ..
ماردش السلام .
قال له : " يا بو الأنياب و المخالب ..
ياللي دايما طول عمرك غالب .. جاي عشان أرانب ؟
دول حاجة زي الترابة .. ويمكن قد الهبابة ..
مايستاهلوش كلامنا .. ولا انشغال بالنا " .
********
قال له : " لا يا فيل .. يا بو الفهم القليل ..
دول مخلوقات زينا .. ياكلوا ويشربوا .. ويجروا ويلعبوا ..
ولما بناكل منهم .. يبقى عشان بطننا ..
لكن عشان نإذيهم .. مش حنلاقيهم .. و حيهربوا مننا " .
" وآخر كلامنا يا فيل .. يا أبو الفهم القليل .. نصيحة مننا :
الغابة ليها نظام .. وعشان تعيش دايما في سلام ..
لازم تسمع الكلام .. ولو زعلتنا ..
حتزعل مننا " .
>>>>>>>>
غضب الفيل وثار .. وعينيه بقت شرار .. وعاد نفس الكلام :
- " أنا الفيل أبو زلومة.. اكبر واحد في الغابة..
ما حدش يقدر يضربني .. ما حدش يقدر يغلبني " .
**********
رجع الأسد الشديد .. وقال الفيل دا عنيد ..
ما قبلش النصيحة .. و ما خافش من التهديد .
وتمر الأيام .. و مفيش إلا الكلام .. وعناد الفيل بيزيد .
ويدوس على الجحور.. ويغني بكل غرور :
" أنا الفيل أبو زلومة .. اكبر واحد في الغابة ..
ما حدش يقدر يضربني .. ما حدش يقدر يغلبني " .
**********
وف مرة أرنب .. صغيّر كان بيلعب ..
وهو بيحفر حفرة .. قال : " أنا جاتلي فكرة ..
نعمل كلنا حفرة .. بينا وبين الفيل .. ونغطيها.. بالقش وبالنجيل ..
وان عدى الفيل عليها .. لازم يقع فيها ..
ونرتاح بقى .. من هم الفيل " .
عجبت الأرانب الفكرة.. و بدأوا ف تنفيذ الحفرة..والحفر كان بالليل .
ساعة نوم الفيل .. وبدون دوشة.. وبدون كلام ..
أصبح كل شيء .. تمام التمام .
>>>>>>>>
الصبح قام الفيل .. وبفهمه القليل .. وقف قدام الحفرة ..
و بص وقال:" يا سلام.. الأرض حلوة وخضرا.. وطلع النجيل قوام. "
وقال كالعادة.. بكل سعادة:
" أنا الفيل أبو زلومة .. اكبر واحد في الغابة ..
ما حدش يقدر يضربني .. ما حدش يقدر .."..
و ما كملش الكلام .
********
وقع الفيل في الحفرة .. وكأنه حتة حجرة ..
ورجله كمان انكسرت .. و دموعه ف عينه ظهرت ..
وبأعلى صوت يعيط .. ويقول الحقوني يالا طلعوني .
و بص لقى الأرانب .. حواليه من كل جانب .. فرحانة قوي بتزقطط .
قال لهم : " يا أرانب ارحموني .. ليه بس توقعوني ..
لو بس تطلعوني .. اشيلكوا جوا عيوني " .
********
رد أرنب وقال : " ازاي نطلعك .. دا شيء محال ..
دا انت أبو الأفيال .. و احنا يادوب عيال " .
و أرنب تاني قال : " احنا نسيبك كام يوم ..
علشان تعيش محروم .. من الأكل والنوم .
وغيره قال وعاد .. والفيل صياحه زاد .. يوصل لبلاد وبلاد .
>>>>>>>>
و بص الحصان عليه .. ما صدقش عينيه ..
إزاي أكبر حيوان .. يقع كدا و يتهان ..
سمع الحصان الفيل .. بصوت ضعيف ندمان :
" طلعني يا حصان .. يا أبو الشجعان .. أنا صحيح غلطان
الغرور عماني .. وقعني و أذاني .. لكن الألم صحاني ..
ودا وعد مني ليكو .. مش حاعمل كدا تاني " .
*********
رد الحصان عالفيل : " انت يا فيل غلبان ..
وصحيح صعبان عليـّة .. لكن واجب عليـّه .. اسمع رأي الأرانب ".
********
عدّى الأسد كمان لما مشى الحصان ..
سمع الفيل بيقول وكلامه بقى معقول :
" الحقني يا ملك الغابة .. انا صحيح غلطان .. لخبطت نظام الغابة ..
اللي بقاله زمان .. وهرّبت مني الأرانب .. وحتى كمان الفيران ..
ودي غلطة كبيرة مني .. داالغرور عماني .. وقعني وأزاني ..
لكن الألم صحّاني .. ودا وعد مني ليكو ..
مش حاعمل كدا تاني .
رد الاسد كمان : " انت يا فيل غلبان .. وصحيح صعبان عليـّه ..
لكن واجب كبير عليّه .. اسمع رأي الأرانب"
>>>>>>>>
عمل الأسد اجتماع .. حضروه كل الأنواع .. والكل بالإجماع ..
قال : "الفيل أكيد غلطان .. لكن فيه رحمه كمان " .
*******
رد زعيم الأرانب : "الرحمة دي شيء واجب .. وربنا اسمه الرحمن ..
لكن برضه واجب .. إننا الأرانب .. نعيش في أمان ..
والفيل لو طلعناه .. وسيبناه على هواه .. ايه اللي يضمن لنا ..
انه ما يرجعشي تاني .. زي ماكان " .
*********
رد الأسد وقال : " طلــّعوا الفيل في الحال .. و حنسمع منه وعد ..
انه مايإذيش حد .. وان رجع في وعده .. كلنا حنكون ضده " .
*********
راحت الأرانب .. للفيل تطلعه .. وربطوا رجليه .. اللي بتوجعه ..
وجابوه للاجتماع .. عشان الكل يشوفه .. ويسمعه .
*********
وبدأ الفيل الكلام .. وبصوت ضعيف و حزين ..
قال الفيل : " أنا آسف .. لكل الحاضرين ..
وكنت في الحفرة خايف. تسيبوني يوم واتنين.
بين العقارب والتعابين
>>>>>>>>
ولكن رغم ألمي .. وندمي الشديد ..
أنا حاسس اني سعيد ..
وكأني اتولدت .. النهاردة من جديد ..
و اوعدكوا يا أرانب .. ويا غير الأرانب ..
نعيش على طول حبايب .. ودا وعد مني أكيد .
واشكركو كتير كتير.على الحفرة الكبيرة.
اللي علمتني. حاجات كتيرة
وان ايد على ايد أقوى من الحديد ..
والعدد لما يزيد قوته تبقى خطيرة
وان كل كبير .. أكبر منه كبير ..
وقوة ربنا .. هي القوة الكبيرة .
*********
* المؤلف في سطور *
تقديم : الشاعر الأستاذ / السيد الخشاب
رئيس رابطة الزجالين وكتاب الأغاني .. فرع الإسكندرية
ــــــــــــــــــــــــــــــــ
* علاء الدين محمد عبد العليم من مواليد الإسكندرية ومقيم بها ،
اشتهر بين الشعراء بكتابة الفوازير النباتية .
* حاصل على بكالوريوس زراعة ، ودبلوم الدراسات العليا في التربية .
* يعمل موجها للتربية الزراعية في وزارة التربية والتعليم .
* عضو باللجنة الثقافية بالنادي المصري السكندري .
* عضو في رابطة الزجالين وكتاب الأغاني .
* شارك في الأعمال الاجتماعية والفنية بتدريب الأطفال على الموسيقى والغناء
في جمعية الهلال الأحمر ، وجمعية الشبان المسيحيين ، وجمعية الكشافة البحرية ، والعديد من الحضانات الأهلية .
* صدر له كتاب فوازير نباتية .. و شارك في العديد من دواوين الشعر مع غيره من الشعراء مثل
تغريد .. زهور ..عطور .
* عمل محررا صحفيا في جريدة الإسكندرية والعالم .
* حصل على الكثير من شهادات التقدير في ندوات ومهرجانات الشعر .
* ومع هذا العمل يصدر له " حواديت نباتية " .
**********
الفهرس
الموضوع
الصفحة
البسملة
إهداء
مقدمة
كلمة الدكتور محمد شكري
مع أشعار الديوان
ماليش غيرك بلد
ياللي جمالك فوق الحد
حبيت حبيبي وعرفت ليه
ياما اتعلمت
الزراعة معنى كبير
بلدنا مش فقيرة
الوقت من دهب
عن الثروة البشرية
عن الحضارة
سنة ( 2100 )
ملعونة المعونة
الدرس الخصوصي
من يوميات موجه تربية زراعية
ياللي انت غاوي خطابة
بغبغانات
ليه الافتعال
عجبت كثيرا
النفاق
اللف والدوران
جنون المحمول
جنون الكرة
تدخين الهباب
سواق المشروع
( تابع ) الفهرس
الموضوع
الصفحة
سواق التاكسي
مشاوير
احكيلي ياآثار
انقذوا بغداد
فين ياضمير العالم فين
فزورة عن الشاعر السيد الخشاب
فزورة عن الشاعر عادل سند
فزورة عن الشاعر د محمد شكري
فزورة عن الشاعر صلاح جاهين
ومن الفوازير النباتية
ولأطفالنا الأحباء - رفرف ياعصفور
يالا نغني
ياخروف
إحنا الأطفال الحلوين
حالو ياحالو
عيد الطفولة
بابا محجوب
ياورد على فل وياسمين
أحلى هدية
الساحر العجيب
شعارات حضانة الهلال الأحمر
حضانة المجد
حضانة فروتي
مدرسة الأحرار
حكاية الفيل المغرور
المؤلف في سطور
الفهرس
حقوق الطبع محفوظة للمؤلف
بدار الكتب والوثائق القومية
رقم الإيداع : 4284 / 2002
الوقت من دهب
******
للمراسلة والاتصال
علاء الدين محمد عبد العليم
1ش محمد نجيب . سيدي بشر . الإسكندرية
16ش مصطفى محمد حافظ . محطة الرمل . الإسكندرية
ت: 5567689 - 0122745210
ليست هناك تعليقات:
إرسال تعليق