الصلح خير

** الصـــُـلح خـــير **
الصلح خير - مش بس كلمة ... بيرددها البني آدمين.
الصلح نعمة وأكبر نعمة ... بيقدّرها ناس فاهمين .
فاهمين صحْ حقيقة الدنيا ... مش عايشين واكلين شاربين.
لولا الصلح لكان الناس ... كلها أعداء متخاصمين -
يزعلوا من بَصّة أو كلمة ... أو أي شيء فيه مختلفين.
الصلح واجب .. والصلح حكمة ... أكيد بيفهمها العاقلين -
فاهمين ان الدنيا دي دنيا... صُغَيّرة مهما تطـُول سنين -
وخسارة تضِيع منها الثانية ... في خصام وزعل بين اتنين.
الصلح خير , وكل الخير ... والصلح قرار العاقلين -
عاقلين وبيبصوا لقدام ... عاقلين وشايفين ان الخصام:
شرارة بكرة حتصبح نار ... والنار تغذيها الاشرار -
أشرار ودايما في الانتظار ... ومفيش غير الصلح اختيار.
ونصيحة تساوي الأموال ... وحقيقة مش عايزة جدال:
الصلح حل ... وخير للكل ... دايما في جميع الاحوال :
الصلح لو ضد الظالم ... أوحتى لو ضد المظلوم -
والصلح لوضد المظلوم ... فرصة عشان ينهض ويقوم -
ويفهم ان الصلح بداية ... لطريق الاصلاح والخير.
ولكل بداية نهاية ... ولكل نهاية بداية ... والكل ف دايرة بيدور.
سبحانه اللي مدوّرها .. وسبحانه اللي مسيّرها ... واختار للانسان النور -
نور العقل ونور الفهم ... ونور الصلح ونور الحب ... ومفيش أحسن من كدا نور .
*******