الروتين والحمار الفطين

بعد التحية بعد السلام .. أقول كلام للبني آدمين : 

أحب اشوف النظام نظام .. والكل يتحركوا ب "روتين" 

والتبن والفول آخر تمام .. والمخ مليان بالبروتين . 

لا فهم لينا ولا استفهام .. وعملوا ايه بس الفاهمين . 

********** 

وبالروتين حنعيش في سلام.. ونبقى في الصوره حلوين . 

يامحلا مشيتنا بلجام.. إلى الأمام وشمال ويمين . 

لارأي لينا ولا كلام.. ونخش حتى ف بركة طين . 

لالأ وآه وحلال وحرام ..وبكرة نمشي على قضيبين . 

ناقص ورق بس وأختام .. ونبقى زي البني آدمين . 

**********

يمكن المتابعة من هذا الرابط 

حكاية وردة

* شباب زي الورد ... كلمات جعلتني أتخيل الورود الملقاة على الأرض ، ولم تجد من يشعر بقيمتها الجمالية . * وأشخاص أكفاء في أعمالهم ولاينالون التقدير المناسب من رؤسائهم و زملائهم . * وعلماء سبقوا عصرهم في طريقة تفكيرهم ، وعانوا أشد المعاناه من الاصطدام الفكري مع الآخرين ، وحالة من الاغتراب في مكانهم وزمانهم الذين عاشوا به . * وكثير ممن يهاجرون إلى بلاد أخرى ، و يحققون بها نجاحا ت كثيرة لم يستطيعوا تحقيقها في بلادهم نتيجة المعوقات الكثيرة . 

* حكاية وردة *

اسمعوا مني حكاية عجيبة ... حكاية وردة ف أرض غريبة 

الكــــل أكيد يستغربـــها ... ومــــا حدش أبدا حيسيبهـــــا.. 

********** 

البقرة برجليها تدوسها.. وحمار حيشوفها حيرفسها . 

والدبان حيعف عليها... وجيوش النمل حتقرصــها . 

********** 

وخروف ناصح حيقول عنها . الوردة دي حمرا ودموية . 

والمعزة قوام حتخـــاف منها . وتجري و تتكعور في المايـــة . 

********** 

والكلب يشمشم حواليها .. ويقول إخييه ريحـة الوردة . 

وحصان لما يبص عليهـا .. حتموت الوردة من الخضــــة . 

********** 

وجاموسة تقول فين الرحمة .. الوردة دي عامله هنا زحمة . 

وتزيح الوردة برجليهــا .. على جنب .. وتعملها عليها . 

********** 

وغراب يردد ف الإشاعات ... وتصدقه كل الكائنات . 

بيقـــــول إن الوردة خطيرة ... وبتسكنهـا روح شريرة . 

********** 

والقنفد أبو شوك يمسكها . ويقول أهي جرحتني بشوكها . 

والأرنب يستقوى عليــها .. ويزقها علشان يعاركهـا . 

********** 

والتعلب بيقول دي لئيمة .. دي الوردة لا فايدة ولا قيمة . 

دي ايديــه لو شبه الوردة .... أقطعها بسكينة قديمــــة . 

********** 

واتفاقية كمان ومعاهدة ... حتى ما بين الفار والقطة . 

أجمعوا فيهــا إن الوردة ... لازم تتقطع ميت حتــــــة . 

********** 

وتضيع الوردة وقيمتها ... ويغطيها تراب الأرض . 

حكاية ودي وكانت آخرتهــــا ... عن وردة وغيرهـا كتير ورد . 

***************

يمكن الاستماع من هذا الرابط

اعرف نفسك

** أثبتت العديد من التجارب والأبحاث أن التربية عن طريق صبغ الفرد بخصائص محددة تبعا لاحتياجات المجتمع لا ينتج عنها إلا أنماط ثابتة من الشخصيات المجندة لعمل ثابت ، ولا ينتج عنها الشخصيات المبدعة المنطلقة المجددة .
** وانني أرى أن الانسان كما هو يصلح في كثير من الاحيان أن يكون طبيبا لنفسه ؛ فإنه يصلح أيضا أن يكون مربيا ومعلما لنفسه.
** ولكي يستطيع الإنسان أن يربي ويعلم نفسه لابد وأن يعرف نفسه أولا ويتعرف على امكانياته وقدراته ويتخذ السبل المناسبة لتنميتها .....

* اعرف نفسك *

ليه بتقلل قيمة نفسك ..... دا مافيش في الكون حد ينافسك .

ارفع راسك حارب يأسك .. طـول ما بيطلع منك نفسك .

**********

واتأكد مليون ف الماية .. ان مفيش زيك ولا شكلك .

دي حقيقة أكيدة وعلمية .. وبعقلك تتحـل مشكلك .

**********

واعرف انك ربنا خلقك .. عالم مليان بالأسرار .

والأسرار دي هي مواهبك .. وما فيش منها أكيد تكـرار .

**********

والموهبة لو حتنميها .. حتنول منها أحلى ثمار .

إنما لو تستهون بيها . حتضيع في الهـوا والتيار .

**********

وان ما عملتش قيمة لنفسـك .. حتشوف أصغر نملة تعاكسك .

و اتأكد إن مفيش غيرك . يقدر يعرف أسـرار نفسـك .

**********

لكن مهما حتعرف نفسك ... مش حتنول كل اللي ف نفسك .

علشان إنت يادوب مخلوق .

. ما بتخلقش بنفسـك نفسـك .

**********

يمكن الاستماع من هذا الرابط 

ماليش غيرك بلد

** تنفرد بلد المنشأ بخصائص لا يمكن تواجدها في بلد أخرى ، فهي البلد التي يبدأ فيها استقبال الحياة ، والانطباعات الأولى التي يظل تأثيرها في الشخصية حتى آخر العمر ، وأن حب الإنسان لموطنه الأصلي لا يعتبر تكرما منه ، بل هو شيء طبيعي وحتمي في الحياة البشرية ، وغير البشرية أيضا ، ولنتخيل رد فعلنا في بلد آخر جميل فيه كل مباهج الحياة وعشنا فيه طويلا وأحببناه وأحببنا أهله ؛ ثم حدث أن تلفظ شخص إلينا بكلمة مهينة الى بلدنا الأصلي ، سوف تجد .. بكل تأكيد .. إنفعالات شديدة وجديدة تجاه هذا الموقف ....

* ماليش غيرك بلد *
مين غيرك تبقى بلدي؟ ... ماليش غيرك بلد .
ياأرض أبويا وجدي ... ومن بعدي الولد .

ياأرض حبيت عليها ... ومشيت وحتسند . 

مين غيرك تبقى بلدي ... ماليش غيرك بلد .

أنا لو غيرت اسمي ... اسمك جوا الجسد . 

والروح من بعد جسمي ... حتعيش الى الأبد . 

تشهد انك يابلدي ... ماليش غيرك بلد . 

مين غيرك تبقى بلدي ... ماليش غيرك بلد .

مين غيرك تبقى بلدي؟ ... وارجع فيها اتولد.
ومنين اجيب الماضي ؟ ... وسنين ذكرياتي .
وكتاب تاريخ حياتي ... وسطور مالهاش عدد 

مين غيرك تبقى بلدي ؟ ... ماليش غيرك بلد .
 

عرفت بلاد جميلة ... كل اللي فيها جميل .
لكن مالقيتش أبدا.. زيك يابلدي مثيل .
ولما بعدت عنك ... حسيت بالشوق اليكي .
وكأني حته منك... ولازم ابقى ليكي .
ورجعت عشان أقولك ... ماليش غيرك بلد .
مين غيرك تبقى بلدي؟ ... ماليش غيرك بلد
*********

يمكن المتابعة من هذا الرابط 

فوازير نباتية

* فوازير عن النباتات تم تأليفها أثناء العمل بتدريس التربية الزراعية ، وكانت تستخدم كوسيلة لعرض المعلومات عن النباتات بأسلوب خاص وكانت بداية لتأليف كتاب حواديت نباتية .

فزورة عن الباذنجان

أنا صريحة واقول الحق ...الأبيض ابيض ... والأسود اسود .

وابقى وحشة ... لما ازرق .

ويقولوا عن طبعي دا جنان ... عشان ما بعرفش الألوان .

وارد اقول ... لأ طبعا لأ .

اما الحقيقة ان جيت للحـــــــــق .. انا لو ماقولش الآه واللأ ..

انا عقلي يتجنن ويطأ .

**********

* فزورة عن الجميز *

رسالة با قولها ... لكل البني آدمين .

من شجرة عليها ... نقوش السنين.

فاكرين لما كنتوا ... لسه صغيرين ... ؟

واضمكوا بظلي ... وتبقوا فرحانين . ؟

وتاكلو من ثماري ... وتقولوا عليها تين . ؟

ياريت تكـونوا فاكــــــريــن .

**********

* فزور عن نبات الصبر *

أنا مكاني ... بعيد عن الشجر ... بين التراب وبين الحجر

ودايما بيقابلني ... صحبة من البشر

بعيونهم يسألوني : ايه معنى الحياة ؟

وارد انا عليهم ... بكلامي المختصر :

هي سكة سفر ... كل محطة فيها ... دروس وعبر

درس عن اللي صام ... شهور وأيام ... وعلى المطر فطر

و خلفاته معاه ... بتقول إن الحياة ... مش عايزة قولة آه ...

ويا بخت مــــــن صبــــــــر ...

*****

ويمكن متابعة فيديو عن الفزورة  بهذا الرابط 

https://www.youtube.com/watch?v=94L1d-QWshQ

يمكن متابعة فنون وزراعة

أجازة العم صابر

** الانغماس في العمل وانشغالاته وارهاقاته قد يكون أفضل جسديا وصحيا لصاحبه من الانشغال بقضايا فكرية وتأملات وتساؤلات قد تصيبه بتوتر عصبي وانهيار في الحالة الجسمية .
** وكثير من الأشخاص يعيشون حياة هادئة وبصحة نفسية وجسدية جيدة رغم قسوة الأعمال التي يقومون بها ، وقد يرجع السر في ذلك قلة تطلعاتهم وانشغالهم بما يجب أن يكون .
* أجازة العم صابر *

اسمعوا مني حكايــــة صابر ... ورحلته في طـريق الصبر .
************
الإسم صابر ، وهو صابر ... وكل يوم يصحى من الفجر .
.يروح لشغله ، وشغل تاني ... وشغل تالت بعد الضهر .
يخطف زيارة لبيته ساعة ... ويجري تاني قوام عالشغل .
ولما يرجع بالليل ينام ... لا يشوف عياله .. ولا المدام .
ويعيش مع حلـم الأحلام ..." يلاقي دخــل يكفـــي الأكــل " .
**********
وتاني يوم م الفجر يقوم ... ويمشي في طريقه المرسوم .
ويرضى بنصيبه المقسوم ... ويقول يـا رب اديني الصـــبر .
**********
سبع صنايع ، والبخت ضايع ... خلوه يا عيني محني الضهر .
والوش اصبح إنسان آلي ... شغـــال و دايمــــا تحت الأمر .
**********
العم صابر أخد إجازة ... ما يروحش لا جنينة ولا بحر .
في يوم يروح الجمعية ... يقف في طابور قد القطر .
ويوم لمصلحة حكومية ... علشان إمضا وختم النسر .
ويوم لمحكمة وقضية ... والحكم يديك طولـة العمــر .
**********
العم صابر في مرة قال ... أنا ليه حياتي هموم في هموم .
سحب شريط وسمع أغنية ... لنجم ساطع من النجوم .
الصوت من المناخير مكتوم ... والكلمة مالهاش أي لزوم .
واللحن يشبه دق الهون ... صابر يقول يـارب الصــــبر .
**********
العم صابر مرة يقول ... أروح لمطعم " أبو سحلول " .
دايما عليه زحمة ومشغول ... يمكن يكون سعره معقول .
أكل هناك كفتة وكباب ... شاف الحساب طار منه العقل .
وقال يا ناس كان ماله الفول ... ساترنا دايمـا طــول الشــهر .
**********
وف مرة صابر قال اتمشــى ... واشم حبة هوا حلوين .
يتعب يا عيني قوي م الدوشة ... وريحة الجاز والبنزين .
ويشوف كمان نار الأسعار ... مشعللة جوا البتارين ...
يقف يقول : يا ناس محتار ... بلدنا دي ولا بلد مين .
ويبص في مرايته ويقــول : ... امسك لســــانك يا بـــو الصبـر .
**********
صابر تضيع منه الشنطة ... فيها البطاقة .. و كام كرنيه .
يروح قوام قسم الشرطة .... يقف يبص هناك حواليه .
ويقول ياباشا ويقول يابيه .... ومافيش حد يبص عليه .
وكأن الكلمة بعداد .... أول بدايتـه الخمسة جنيــــه .
صابر يحس انه ف ورطة ... وينسى موضوع الشنطة .
ويقول يا ربي ..... إيه بس زنبي ...... دانا حتى صابر والصبر مر .
**********
العم صابر رجع البيت ... قعد يقول يا ريت يا ريت .
يا ريت ما رحت.. ويا ريت ماجيت ..أجـازة بايـن عليها قـر .
**********
العم صابر غلط وقال ... أقرا الجرايد اشوف الحال .
يلاقي كله عال العال ... ومهرجان سينما شغال .
ومدربين يقبضوا ملايين ... و الكورة لســه تحــت الصــفر .
**********
العم صابر نكش الشعر ... وعيونه طلعت قدام متر .
وبأعلى صوت من بعد سكوت ... يقول : يا ناس أنا عندي الحل .
وقلع هدومه وكتب عليها ... " لأ للأجازة نعم للشغل " .
كانت دي هي حكاية صـابر ... ورحلــته في طريـــق الصــبر .
**********

يمكن الاستماع من هذا الرابط 

فوازير عن الكلمات

* اجتذبتني فكرة استعمال الطرائف في مجال التربية والتعليم ، ومن بين اسايب الطرائف كانت الفوازير كمدخل للدروس التعليمية لأنني وجدت بها تدريبا للعقل على أجود أنواع التفكير ، وهو التفكير العلمي المنطقي الذي يعتمد على الاستعانة بالمقدمات من أجل الوصول إلى الاستنتاجات العلمية .

* ومع الاستمرار في كتابة الفوازير ، و التعامل مع الكلمات المنظومة والمنثورة .... وجدت أن " الكلمات " في حد ذاتها من أهم الموضوعات التي تستحق البحث فيها ، واستحسنت فكرة كتابة فوازير عن الكلمات لنفس الغرض الذي كانت من أجله الفوازير النباتية ، ولم أفرق ... في اهتمامي ... بين الكلمات الفصحى والكلمات العامية ، حيث أنني اقتنع تماما بأن الكلمة ... تكمن قيمتها ... في أنها وسيلة للاتصال ، ولنقل المعاني بين الناس ، وأن كل الأفعال المؤثرة في حياتنا كانت بدايتها كلمات .

((( فوازير عن الكلمات )))

فوازيرنا كلمات تتقــــال .. بتـــغيــــر وتبدل حـــــال .

**********

كلمة تقولها بالعاميـــة .. في بلدنا الحلوة المصريـــة .
وكلمة بالفصحى العربيــة .. عن كل شيء وف أي مجــــال .
**********

كلمة تكون من جوا القلب .. تملا حياتنا حب ف حب .

وكلمة تانية انجدنا يا رب .. واحمينا من شر الأقوال .

*********

كلمة بتبني وكلمة تعمر .. كلمة تخلي العقل يفكر .
كلمـــة تدمــر .. كلمـة تأخــر .. كلمــــة ترجـــع ورا أميال .
**********

كلمة بتسأل كلمة ترد . كلمة هزار أو كلمة بجد .

وكلمة ترخي وكلمة تشد .. زي ما بتقــول الأمثــال .

**********

كلمة تفرح كلمة تشجع .. كلمة تربي كلمة تدلع .
واهي كلها كلمات تتقال .. فعلهـا أكتر م الأفـعال .
**********

فوازيرنا كلمات تتقـــال ... بتــغيـــر وتبدل حـال .

**********

يمكن الاستماع الى مقدمة الفوازير عن طريق هذا الرابط 

ويمكن الاستماع الى الفوازير التالية عن طريق هذا الرابط 

((( كلمة "الله" )))

أجمل كلمة نطقها لسان .. باستغراب أو استحسان .
بتأكد معنى الإيمـان ... المخلــوق جــــوا الإنسان
**********

كلمة جمالها ف قولة آه .. لما تحرك في الوجدان .

و تحسها في نبض حياه .. وف خلق الكون و الأكوان .

***********

كلمتنا مش صوت يملا ودان .. ولا حبر على ورقة وألوان .
لكن دي معنى يهز كيان... و يصحـــي كل ضمير غفلان .
**********

كلمة بتكسب منها ثواب .. و تتحسب لك في الميزان .

وبتفتحلك أوســـع باب .. باب الرحمة والغفران .

**********

كلمة ف كل زمان ومكان ... بيرددها كل ما كان .
وحتى اصغر شيء ف جزيء . بيقول سبحان الرحمـــن .
**********

((( كلمة "لو")))

قالوا زمان الكلمة دوا ... وانا قلت ايوا حقيقي بجد .

دي كلمة قد همس الهوا .. بتبني يامــــا و يامـــا تهد .

**********

كلمة اللي يقولها الندمان ... اللي ايديه دايما عـالخد . 
ويقولها كمان الكسلان .. علشان بس يضيـــع وقت .
**********

كلمة توسوس للإنسان .. لو كان بعدها كلمة كان .

و بتقتــل أمل العشمان .. لو تتقــال مرة في الوعــد .

***********

كلمة بتقطع كلمة بتمنع .. وترخي مرة ومرة تشد .
و الودن ياما و ياما بتسمع .. والكلمــة تطلع ولا تترد .
**********

كلمة ما تكتبهاش في العقد .. علشان شرطها أصعب شرط .

وهي يادوب حرفين اتنين .. وصـوتها يشبه صوت القــط .

**********

عرفتوا بقى ايه هي الكلمة ؟ .. أكيد عرفتوا أكيد بالظبط .
**********

((( كلمة "إيه ؟" )))

كلمة خفيفة على الإنسان .. من كل جنس و كل مكان .

تلات حروف وكــأنها حرف . و ما تحتاجش لقولها لســان .

**********

كلمة يقولها كبير وصغيـــــر .. حتى ولو كان بيقول واء .
كلمة يقولهــــا اللي بيستفسر ... واللي بيسأل عــالأشياء .
**********

كلمة ف مصر بمعنى سؤال .. في الجهر والسر بيتقال .

سؤال يفيد الاستفسار .. وف كل لحظـــة أكيد عالبــال .

**********

كلمة زمان الإنسان قالها ... لما لقى الكون من حواليه .
حاجات بمعانيها و أشكـالها ... تشغل فكره قبل عنيــــه .
أكيد عرفتو الكلمة دي إيــــــه .
*********

 ((( كلمة "ليــــــــه ؟ )))

ياما و ياما كتير أصوات ... تسكت حتى بكلمة هس .

إنما صوت العقل بينطــق ... طــول ما البني آدم بيحس .

**********

والعقل دايما دايما يسأل ... و ما يعرفش أبـــدا يأس .
يسأل يقول إيـــه الأسباب ... ما يقولش أبدا خلاص وبس .
**********

بالعقل نفهم إن العلم ... مش كلمات علشان تترص .

العلم تفكير العلم فهــم .. العلـم بحث بيولد بحث .

**********

والعقل من طبع الإنسان... وفطرة مخلوق بيها زمان .
عشان يقول إيه الأسباب .. ويعيش يفكر ما يقولش بس .
*********

واللي يدور عالأسباب ... يفضل بعقله دايما شباب .

هو اللي ينفع نفســـه بنفســــه ... هو اللي فاهم كل الدرس .

**********

أما اللي يحفظ مليون كتاب .. سنين حياته حتبقى سراب .
ونهايته حتكون يادوب تراب .. و ياريته كان اسطوانة قرص .
**********

واللي بيمشي على الروتين .. وعقله دايما ما بيسألش ...

ياريته كان آلــــة أو ترس ... أو حتى كان تمثال بالجبس .

*********

ومهما قلنا و مهما اتقال .. دا كله رايح إلى زوال .
حتى الكـــــلام حتى الأفعال .. والباقــي طبعا واحد بس .
**********

اللي احنا منه وليه واليه ... اللي اعتمادنا كله عليه.

هو اللي خلـــى العقل بيسأل ... و الودن تسمع .. والعين تبص .

********** 

والكلمة طبعا أكيد سؤال ... بلهجة مصرية بتتقال

غنى لها موسيقار الاجيال ....اكيد عرفتوا الكلمة دي إيـــه .

وكل شيء بتدل عليه

 .**********

 (((  كلمة "آه " )))

كلمة خفيفة رقيقة ف قولها .. من حرفين اتنين يا جمــالها .

**********

لما يقولها اللي بيتألم .. قلب القاسي يحن أكيد .
لما يقولها اللي بيتندم .. حتقول إنها صوت تنهيد .
لما يقولهــا اللي بيتكلم .. تفهم منهــا رد مفيـــد .
**********

تسمع صوتها تشوف إشارتها .. نور أخضر بيمشي الحال .

حتى ولو تتقال بسكوتهـا .. فيها رضا وخجــل ودلال .

**********

لو تتقال للحق حتبقى ... صوت على صوت عالي وفعــال . 
إنما لو تتقال للباطـــل .. أخطر من كـل الأفعـــال .
**********

كلمة خفيفة رقيقة ف قولها .. من حرفين اتنين يا جمالهــــا

*******

((( كلمة "حب" )))

كلمة تقولها العين والقلب ... مفعولها أقوى من الطب .
لكن لو تتقال بالكذب .. تبقى حقيقي أكبر ذنب .
**********

كلمة صغيرة قد الدقة ... فيها كل معاني الرقة .

و ما تقدرش تقول لها " لأ " ... لما تكون من قلب لقلب .

**********

كلمة صغيرة من حرفين... بتقرب بين الاتنين .
وتخليهم أسرة و عيلة ..وتجمـــعهم دولة وشعب .
*********

كلمة تنبت زي الحبة ... لو تتربى ف أرض محبة .

تعلى وتعلى وتطرح حب .. يا رب بارك فيها يا رب .

**********

(((  كلمة "لأ " )))

كلمة صغيرة بس تفيد .. مالهاش إلا معنى وحيد .
فيها إجابة ورأي سديد ... حتى ولو تتقال بالإيد .
**********

زي السيف بادين شجعان.. ويخاف منها كل جبان .

فيها الأبيض فيها الأسـود .. لكن ما فهــاش الألــوان .

**********

زي المشرط لما بيوجع . لكنه بيعالج وبينفع .
احسن ياما من البرشامــــة .. اللي تخدر واللي بتخدع .
**********

كلمة بتطلع طلقة مدفع .. ما تخليش للشك مجال .

لو تتقال للظالم يرجع ..... ويغير سكته في الحال .

**********

كلمة بتفصل بين طريقين ... و بنكتبها من حرفين .
و بتتقال بالعين والبق .. وصوتها عالي ... زي الحق .
**********

((( كلمة "معلش" )))

لكــــل شيء حــد ومقدار ..حتى الكلام حتى الأفكار .

**********

دي كلمة مثلا تطفي نار .... وتريح البال المحتار .
لكنهـــا بالاستمرار .. ألعن من السوس الحفـــار .
**********

تحفر .. تهد ... ف كل عمار .. تزرع بذور الاستهتار .

توقع الطير اللي طـــــــــــــار .. وتعلــــي من شأن الصرصـار .

*********

كلمة حقيقي كتير بتغش ... شكلها ماية وفعلها نار .
مرة بوش ومــــــــــــرة بوش .. و الإسم كلمـــــــــــــــة للإعتذار .
**********

كلمة تحطــــــــــــم كلمة تدمـــــــــــر .. و تخلينا منتقدمش .

نرجع نقــــــــــــول تاني ونكرر .. كلمة حقيقي كتير بتغش .

**********

((( كلمة "سلام" )))

لو الكلام كان له ألوان ... كلمتنا لون كل الألوان .
لو الكلام كان له أشكال .. كلمتنا غصــن من الأغصـان .
**********

وقالوا ياما و ياما كمان ... عن كلمة فيها الاطمئنان .

هي طريق الخير للكـل ... وطريـــــق النــــور والإيمان .

**********

قالوا الكلام الحلو يبان .. من البداية والعنوان .
حتى ولو من طرف لسان .. واجب علينــا والتزام .
**********

وقالوا عن مفتاح القلب .. نظرة وبسمة و كلمة حب .

وأحلى دعوة نقولها يا رب ... يكـــون كلامنا أحلــى كلام .

**********

و يا رب تبقى حياتنا أمان .. بالعزة مش بالاستسلام .
ويدوم مـــا بينا الاحترام .. و ختامنا يبقى أحلى ختـــام

*****

((( كلمة "شكرا" )))

كلمة وفيها أحلى مكافأة .. تتقال شفوي أو على ورقة .
كلمة تريـــح كلمة تشــجــع ... كلمــة بتديك دفـــــعة و زقـــة .
**********

كلمة تخلي الإنسان يدي . من غير ما يقول ليه ولا لأ .

و ياما كلام بيروح ويعدي ... لكن الكلمـة دي هـــي الأبقى .

**********

كلمة بتتقال رد جميل .. وللمجاملة والتجميل . 
كلمــة حقيقي بمعنى جمـــيل ... فيها الأدب و الذوق و الرقة .
***********

أربع حروف أولهم " ش " .. تنطقها بدون أي مشــــقة .

تكسب بيــها دنـيا وديــن .. تكسب بيها ثواب الصــــدقـــة .

**********

((( كلمة "فين؟" )))

قالوا زمان ان اللي بيسأل . يوصل حتى ولو بعد حين .
واللـــــــي مايسألش ويستكبر .. عمره مـا يتقدم متريـــن .
**********

يفضل دايما ورا متأخر .. والناس قدامه ملايين .

وبكلمة لو قالـها حيقدر ... يوصـل حتى لآخر الصين .

*********

كلمة بتتقال بالعامية ... وتشوفها ف آخر حرفين .
فزورة سهلة زي المايـــة ... مش حنقول زيــها بعدين بعدين .
*********

((( كلمة "صبر" )))

كلمتنا أحلى كلام يتقال .. لما تضيق بينا الأحوال .

وتقيد لنا شموع الآمال ... وتنور الليل اللي طـــــال .

**********

كلمتنا معنى يهد جبال . ... وتحقق اللي ما كان عالبال .
صدق اللي قالوا في الأمثال ... جميل وأجمل من الجمــال .
*********

هي الثبات .. هي الإصرار .. تحمينا من كل الأخطار .

هي السحــاب قبل الأمطــار.. هي الهدوء قبل الإعصـار .

**********

كلمتنا قوة من الإيمان ... لازم تكون عند الإنسان .
وهي حصن وهي أمان . وهي حكمـــة ف كـل زمـــان .
**********

ثلاث حروف أولهم " ص " .. أكيد بيعرفها الصياد .

اللي قعد ساعات وساعات . عالشط بالبوصــة بيصطــــاد .

*********

ثلاث حروف وآخرهم " ر " .. زرعة بتتحدى الصحرا .
و شوية بس من المطـرة ... تجعلها طـول السنــة خضرا .
**********

فزورة سهلة على فكرة ... بـاي بــاي وحنشوفكم بكـــرة .

***********

 (((  كلمة "هس" )))

تقدر تسكت مليون لسان ... وتسد كل الودان كمان .

لكنه صعب وأكبر صعب ... إنك تغير شيء في القلب

************

تقدر تسكت ألف وماية ( 1100 ) ... بكلمة واحدة بالعامية
لكن ياريت ما تقولهاش ليـّــه ... عشان دي كلمة شديدة قوية
************

تقدر تقوللي إسمع وبص ... بكلمة واحدة ويمكن نص

لكن لا تقدر تقوللي إفهم ... ولا حتى تقدر تقوللي حس

************

كلمة يادوب من حرفين بس ... وما فيش بعدها صوت ولا همس
كلمة أكيد لازم تعرفها ... لما حتوصل آخر الدرس
************

((( كلمة "تحت" )))

علشان تعلى وتعلى وتعلى ... إياك تفكر مرة تطاطي

دا اللي يطاطي عمره ما يعلى ... ويعيش دايما دايما واطي

وعشان تبقى حياتك أحلى ..اسمع يالا معايا الآتي

*******

كلمة خفيفة بسيطة وسهلة .. بنقول ونعيد فيها يوماتي
تلات حروف منهم حرفين ... عالطرفين زي الجناحين
*******

كلمة اجابة لكلمة فين .. بالفصحى وبالعاميات

كلمة بتفصل بين مكانين .. وتفرق بين المكانات

وتعرفنا الناس مقامات .... بينهم فرق المستويات

*******

واسمع مني نصيحة صريحة .. حتفهم منها حاجات وحاجات
لو قلت مرة إنك وصلت .. أو حسيت انك ارتحت .
اتأكد مليون في الماية ... انك عايش في الظلمات .
لا فهمت أبدا معنى الدنيا ... ولا حتى شفت ولا فتحت .
*******

((( كلمة "فوق" )))

ياللي غرورك خلى عنيك .... ما تشوفش الناس من حواليك

شايف نفسك انك عالي ... وانت ياعيني ياعيني عليك -

مابتعرفشي ان العالي ... عمره ما يفضل دايما عالي

زي ما يطلع ينزل تحت ... والتحت عمره ما يفضل تحت

دايرة ماحدش يهرب منها ... ما فهاش لابداية ولا نهاية

والعاقل يتعلم منها ... من غير حدوتة ولا حكاية

وعشان كدا قلنا كلمتنا ... صغيرة من ثلاث حروف

بتفكرنا بأعلى مكان ... ومصير بعده أكيد معروف

ومن هنا كانت دعوتنا ... تحمينا يارب من الفتنة

وتزول بيننا كل فروق ... وتدوم بيننا محبة وذوق

والزعلان يفرح ويروق ... والحيران يصحى ويفوق

ويارب تعلّي مكانتنا ... ونكون دايما دايما .. ؟ ...

*******

(((  كلمة "كل" )))

كلمة حقيقي سريعة ف قولها ... كلنا دايما نستعملها

ينطقها استاذ لغة عربية ... وكمان بياع على عربية

كلمة لوحدها مالهاش معنى ... لكن في كلامنا بتنفعنا

كلمة تأكد كلمة بتقطع ... كلمة بتخلط كلمة بتجمع

واستعمالها بجد خطير ... لما تكون من غير تفكير

واحذر منها ذنب عظيم ... لما بتتقال للتعميم

ممكن تظلم بيها بريء... ممكن تخسر بيها صديق

وعندي نصيحة عشان الكل ... تبقى حياتهم زي الفل :

مهما عملت ومهما حاولت..

عمرك أبدا ما حترضي الكل

((( كلمة "هــل؟" )))

كلمة صغيرة من حرفين .... ما بتتقالش غير في سؤال

ما لهوش غير بس اجابتين ... بالايد أو بالعين تتقال

سؤال حقيقي مالهوش حل ... اجابته مافهاش أي جدال

وان كنت مستعجل عالحل ... تبص في السما تلقى هلال

حتلاقي فيه ما قل ودل ... والحل حيبان لك في الحال

*****

((( كلمة "قـــد " )))

كلمتنا بالفصحى بتفيد ... دايما تكون قبل الافعال

والماضي بعدها يبقى أكيد ... اما المضارع يبقى احتمال

كلمة وقدرها بالتأكيد ... أكبر من حجمها بكتير

وفي الكلام تأثيرها شديد ... على اللي يفهم في التقدير 

كلمة وعمرها ما بتزيد ... عن حرفين اتنين ساكنين

واللي يدقق بيستفيد ... والدقة من طبع الناصحين 

*******

(((  كلمة "لن")))

كلمة قوية بلغة عربية ... بيقولها صاحب شخصية

متأكد مليون ف المية .... انها كلمة ما تتغيرش

كلمة صغيرة قد التكة .... لكنها بتغير سكة

سكة لقدام ما بترجعش

تتقال في الحلفان والوعد ... ومفيش بعدها ينفع رد

هي يدوب حرفين اتنين ... وف حقيقتها جبهة رفض

ولما ترفض ما بترحمش

هي يادوب حرفين اتنين .... عايزين لسان جامد ومتين

وبق مفتوح ما يتقفلش

وقالوا عنها ف نحو وصرف ... انها بين الكلمات حرف

حرف وله أكبر تأثير ... عالغير وهو ما يتغيرش

تتقال في كلام أوفي كتابة ... وقالوا عنها انها نصابة

مع انها كلمة صغيورة ... وكلها رقة وطيابة

دايما ولزما وراها فعل ... والفعل بعدها ما يتفعلش

كلمة تقرر كلمة تأكد ... ويقولها كل اللي بيعند

ونصيحة صريحة لأيامك ... ما تقولهاش ياما في كلامك

علشان بكرة ما يتضمنش

وخلي بابك دايما موارب لا تكون مسالم ولا محارب

وقبل ما تنطق كلمة لأ ... اتأكد انك على حق

وقبل ما تنطق كلمة آه... ما تندلقش وماتندفعش

وقبل مانقول كلمة سلام ... اتأكد من حرف اللام

هو اللي فيه ما قل ودل ... والحل من غيره ما ينفعش 

*********** 

((( كلمة "كان ")))

كلمة وفيها فعل الزمان ... بالفصحى والعامية كمان

في النحو صيتها أكيد معروف ... ومكوناتها ثلاث حروف

معروفة دايما للطلاب ... في اختبارات الاعراب

وليها دايما شهرتها .... وتفتكرها مع اخواتها

وتفتكر نينا وحواديتها ... وكلمة تتقال في بدايتها

تخش عالجملة تغيرها ... بمبتدأها وخبرها

وقبل ما نسيبك حيران وتبقى كدا زي الغلبان

اسمع نصيحة ومعلومة ... حتخلي أصعب حل يبان

لو كنت حيران بتدور ... ماتروحش بعيد عن المكان

**********

(((  كلمة "موت )))

دورت في بحر الكلمات .. واخترت كلمة من الكلمات ...

مفيش أكيد بعدها كلمات

******

كلمة وفيها كتير أسرار .. وحيرت كل الأفكار ...

وتنطفي بيها الأنوار ... وتنتهي بيها النهايات

*******

كلمة وفيها معاني شديدة .. وهي حقيقة أكيدة أكيدة ...

نقف لها بكل احترامات .

*******

نصيب يصيب كل الاجساد ... وله ميعاد زي الميلاد ...

ولا يعرف للناس مقامات .

*******

تلات حروف بتجيب الخوف ... علشان بعدها مش معروف...

وقالوا عنها كتير حكايات .

*******

بتفكرنا بقطر معدي ... ماشي بسرعة ولا بيهدي ....

وبعده تلقى الدنيا سكات .

*******

بتفكرنا بفراشة طايرة ... بترسم خط و موجة ودايرة ...

وتروح وتتمسح الرسومات

*******

وسمكة رايحة وجاية ف ماية ... وبعد ثانية وقبل التانية

تصبح وجبة من الوجبات.

*******

كلمة حقيقي ما بعدها كلمة ... فيها الموعظة فيها الحكمة ...

وأحلى دعوة من الدعوات ... نقولها في كل الأوقات ...

ارحمنا يارب الرحمات

************

((( كلمة "كم" )))

ياللي انت دايما شاغل بالك ... تحسب ياما كتير حاجات

وتشوف كام وصلت اموالك ...  وتراجع في المستندات

فتح مخك , حرر عقلك ، واسمع شوية من الكلمات

ياما حاجات مش في الحسبان ... مالهاش فواتيرولا ايصالات

حاجات كتيرة لوقلتها لك ... حتراجع كل الحسابات

صحة جسمك ، راحة بالك ...  شوف كام تسوى من الالوفات

والفرحة بين أهلك وعيالك ...  شوف كام تسوى من الدولارات

ونصيحة اخيرة حقولها لك ... تحطها في الاعتبارات

مش كل شيء ممكن يتقدر ... بآلة حاسبة وبالارقام

والعاقل يحسب ويفكر ... ويعيش دايما ف استفهام

واللي بيسأل لازم يوصل ... ونقول لكو أهلا وسلام

*******

((( كلمة  "أو" )))

كلمة صغيرة من حرفين ...  تسمعها تقول طرفة عين

مكانها دايما بين اتنين ... بين اسمين أو بين فعلين

كلمتنا اول ما تشوفها ... حتقول عليها مش كلمة

لكن لما حتعرفها ... حتلاقي ليها 100 لزمة

كلمة تساعد في الاختيار ... ونرتب بيها الافكار

نرجع ونكرر م الأول ... كلمة صغيرة من حرفين

كلمة ما بتجيش في الاول ... عشان دي كلمة بين اتنين

*************

(((  كلمة "ياريت" )))

تسالني عن اسعد حياة ... اقول الصحة والامل

تسالني عن سر النجاح ... اقول عمل من غير ملل

كلام جميل زي العسل ياريته لما يتفعل

والقصد اللي بنقصده ... كلام كتير بيردده

ناس في البيوت بيقعدوا ... نايمين في بحر من العسل

لا يقوموا ولا يتحركوا ... ولا عندهم ولا يملكوا ... غير الاماني والامل

صاحيين ونايمين يشتكوا ... من حظهم ومن الفشل .

ولا يعرفوا سبب الفشل ... امل كبيرمن غير عمل

ومهما قلت واتمنيت .... ومهما رحت ومهما جيت

الحظ ما يعمرش بيت ...  مليان وغرقان في الكسل

وياريته اللي بنقصده .. واللي كتير بنردده ... 

ياريت يكون ليكم وصل

************

((( كلمة " ضمير" )))

كلمتنا أقوى من  العضلات ... والدبابات والمدرعات

هي اللي خلت الناس تعيش ... في أمن رغم الاختلافات

كلمة ما تحتاجش القوانين ... ولا اللوايح والتعليمات

كلمتنا تبقى صمام امان  ...  للنفس علشان ما تفتريش

هدية من عند الرحمن ... بدونها يبقى الإنسان مفيش

كلمة تراجع كلمة تحاسب  ... ما بتحتاجش لأي محاسب

كلمة ما تحتاجش الفواتير ... مهما تكون كتر الأموال

كلمتنا أقوى كتير وكتير ... فوق كل وصف وكل خيال

وليها تأثير كبير خطير ... وتعدل الحال اللي مال

وتروح على آخر الفوازير ... حتلاقي نص الحال اتقال

**************

 ((( كلمة "و" )))

اصغر كلمة نطقها لساني ... بحرف واحد مالهوش تاني

تجمع بين كل الكلمات ... أسماء وافعال ومعاني

والله من غير مبالغات ... كلمة مفيش زيها تاني

واللي حقيقي ما يعرفهاش ... ما اقدرش اعيد له من تاني

*************

((( كلمة " كيف " )))

نصيحة صريحة جات عالبال ... نقولها للعقل الشغال

المال من غير استعمال ... يبقى يادوب اوراق في شوال

وأي شيء يصبح لا شيء ... بدون دليل الاستعمال

عشان كدا لو عندك شيء ... تسأل وما تبطلش سؤال

ازاي تخلي الشيء شغال ...  يساوي أكتر م الاموال

وآخر كلام ليكو حيتقال ...  ازيكو وازاي الحال

*************

((( كلمة "أنا" )))

ياللي الغرور ماليك.... وكأن الدنيا ليك ... والغير مالهوش وجود

شوف اللي كان قبليك... مابقاش حتى كلمة... في كون مالهوش حدود

ياللي الغرور ماليك ... خايف كتير عليك  ... من كلمة بتكررها

وربنا يهديك ... وربنا يحميك ...  منها ومن شرورها

واعرف ان الكلام ... مفيش عليه ملام ... والمشكلة تبقى فيك

وكل كلمة تقولها ... مهما حتستصغرها ... حتتحسب عليك

ياللي الغرور ماليك ... ياريت انك تحس ...  ماتقولش انك بس ... العاقل الفهمان

وياما ناس قالوها ... كتير واكدوها ...  وراحوا في الطوفان.

**************

)))  كلمة "آسف"  (((

كلمتنا تمحي كتير آثار...  كلمتنا ماية تطفي نار

بلسم يداوي كل الجراح  ... وترجع الأمل اللي راح

ولما بيقولها الغلطان ....  ضميرة بالتأكيد يرتاح

ولما يسمعها الغلبان .... حيلاقي هم كبير انزاح

كلمتنا لو قالها الخايف  ... غير لما بيقولها الندمان

والناصح اللي  يكون عارف ...  ان الكلام معنى واوزان

وان كنت لسه مش عارف ... تحط عارف على الميزان

************

((( كلمة "رمضان" )))

كلمتنا اسم اكيد مشهور ...  لضيف بييجي بعد شهور

والناس تقابله بكل سرور  ... بقلوب ملاها اجمل نور

يفتح لنا باب الغفران ...  ويحن ع الغني والغلبان

ويصحي كل ضميرغفلان ...  يفكره بنور الايمان

صدق اللي قالوا طبعه كريم ... وكرمه من عند الرحمن

ضيف لما يمشي بنستناه  ... ولا عمرنا ابدا ننساه

ولا ننسى ابدا خيرشفناه ... من خالق الكون جل علاه

والحل يبقى خلاص قلناه.

************

 ((( كلمة "عيد" )))

تسألني عن اللي بيعجبني  ... أقول كل شيء جيد وجديد

تسألني عن اللي بيطربني ...  أقول كل صوت يجعلني سعيد

تسألني عن اللي بيغضبني ... اقول الجاهل لما يكون عنيد

تسألني عن اللي يحاسبني ... أقول الضمير وحسابه شديد

تسالني عن أقوى الكلمات ... أقول كلمات زي الطلقات

توصل وتتحدى المسافات ... وتروح لأبعد من البعيد

كلمات فيها السهل المفيد  ... ولا تحتاج منك تأكيد

كلمات فيها ما قل ودل  ... ولا تزيد فيها ولا تعيد

وتسألني عن أسعد أيام ... أقول ياريت كل الأيام

الكل فيها يبقى سعيد ... وما يبقاش يوم بالتحديد

وكل عام وانتم في .....

******

 ((( كلمة "وطن" )))

كلمتنا مكان وله مكانة ... عند الانسان والانسانة

مش بس كلمة بتملى خانة... دي كلمة شايلة أكبر أمانة

 أمانة في قلوبنا متصانة... كلمتنا مكان وله مكانة

*****

كلمتنا مكان عمره ما كان ... كلمة وبنقولها ف عنوان

وان كنت حيران أو حيرانة ... أقف وغني النشيد معانا .

وقول يارب تحقق منانا ... ونشوف علمنا ينور سمانا

يجمع ما بينا ف أعلى مكانة...  كلمتنا مكان وله مكانة

******