حاسس دماغي حاتقول بم ... والعقل قرب خلاص يطير
*******
كلام كبير جودة ومعايير ... كأن دا هو التطوير
والملصقات والمطبوعات ... غطت خلاص كل المساحات
وموظفين ياما ألوفات ... ولجان كتيرة ومتابعات
وتحقيقات وكمان جزاءات ... لو ختم ناقص أو توقيعات
وحقيقي ياما الاهتمامات ... وجهد في نطق الكلمات
*********
وفلوس كتيرة بتتبحتر ... على الورق والميكروفونات
والكونفرانس واجتماعات ... ومصطلحات عايزة دماغات
*********
وناس في دنيا بعيدة بعيدة ... قاعدين يألفوا في القرارات
تحت المراوح والتكييفات ... جوا البدل والكرافتات .
ويقبضوا أكبر بدلات ... عن كل خطوة من الخطوات .
وعشان كدا التطوير شغال ... ينتج وينتج اختراعات .
اختراعات تلغي اختراعات ... زي الهدوم أشكال وموضات.
***********
وناس وشوشها بقت ماسكات ... تحت الأوامر والتعليمات .
زي التروس جوا المكنات ... ويوصلوا اعلى القيادات .
وأسأل كتير نفسي وادوّر ... يمكن ألاقي شئ اتطوّر .
مالقيتش الا الحال متأخر ... من قبل قرن ويمكن أكتر .
لسه الولاد يحفظوا جمادات ... وياخدوا علشانها الشهادات .
حتى النشاط والابتكارات ... بقت كلام جوا سجلات .
وتتملي بيه التقارير ... كأن دا هو التطوير .
**********
وأشوف دروس خصوصية كتير ... ومدارس زي البورصات .
وكل حصة بقت تمثيل ... ولا فيه فهم ولا تحصيل .
والشرح ما بقاش له أوقات .
********
وكفاية كراسة التحضير ... عشان متابعات التطوير .
وبورتفوليو وملفات ... من أجل تجميع الدرجات .
********
يارب انجدنا بتطوير ... حقيقي من غير الشعارات .
ويكون دليلنا هو الضمير ... مش بس أوراق وقرارات .
********
يمكن الاستماع عن طريق هذا الرابط للمزيد يمكن قراءة الانفجار العظيم في عالم التربية والتعليم
