مقدمة : سواق المشروع في مدينة الاسكندرية يقصد به سواق الميكروباص
* سواق المشروع *
سواق مشروع زي المسروع ... وكأنه خلاص حيموت م الجوع
في شمال ويمين زي المجانين ... ولايعرف شيء اسمه الممنوع .
في الزحمة كمان زي الرهوان .. يكسر اشارات ويطير طيران .
لولا ستر الله والناس شايفاه .. شوف كان داس في اليوم كام إنسان .
وكمان بيقسم في المشاوير.. علشان الاجره تبقى اتنين .
وينزل ناس ويطلع ناس ... وكأن الناس مش بني آدمين .
*****
وان كان لك عنده ربع جنيه .. ينساه وكمان 100 وياه .
وياويلك لو حتطالب بيه .. يعملها حكاية لخلق الله .
ويقول يا جماعه شوفوا البيه ... على ربع جنيه برقلي عنيه .
وأغاني عجيبة يشغلها.. احسن منها صوت المواتير .
تسمعها قوام تتخيلها.. متسجلة من إسطبل حمير .
وان قلت له بس توطي الصوت .. ينطق بكلام كدا مش مظبوط .
ويقول معلش يا عم الشيخ ... اصل انا من غير الدوشه أموت .
دا حرام ياخد رخصة سواق . و لا حتى كمان رخصة إنسان .
**********
ليست هناك تعليقات:
إرسال تعليق