الساحر العجيب

كلمات مقترحة لفقرة تقدم للأطفال برسوم متحركة

* الساحر العجيب *

بيقولوا عني ساحر .. والسحر دا شيء عجيب

مع إني بس شاطر .. وبحب شغلتي

وعندي شنطة فيها.. كل شيء غريب

هي اللي طلعت بيها . من كل دنيتي

**********

شنطة وفيها كتير حاجات .. مترتبة احسن ترتيب

دي علبة مثلا ، جواها علبة .. جواها علبة جواها فيل

وعندي أجمل عروسه لعبة .. أسحرها تتحول مناديل

**********

ودي كوتشينة مفنطها.. بنفخة واحدة أرتبها

وف ثانية اقدر أخفيها .. ومن جيوبكم حنجيبها

**********

ودي بالونة جميلة تفرقع .. شوفوا ايه من جواها بيطلع

أرنوب صاحي وعينه بتلمع .. بيمشي و بيجري ويتدلع

بس ياريت تصقيفة كبيرة ..علشان انا لازم اتشجع

*********

ودي كمان أحلى عصاية .. في كل حتة ويايا

بلمسة منها على البذرة .. قوام حتتحول وردة

وبلمسة منها على البيضة .. تفقس وتطلع لنا بطة

والبطة ترجع للبيضة.. واحطها جوا الشنطة

**********

دي عصايتي أحلى عصاية .. دايما تحقق لي منايا

أفرح كمان وارقص بيها ..على الأغاني الشعبية

وأقول يا رب يخليها.. دايما عصاية سحرية

**********

وفي النهاية يا أحباب..ماتبصوليش كدا باستغراب

السحر دا علم وتدريب .. ولكل شيء أصل وأسباب

وكل شاطر في شغله ساحر.. واللي يقول غير كدا كداب

**********

يمكن الاستماع عن طريق هذا الرابط
يمكن متابعة كتاب ( ولأطفالنا الأحباء )