فنون علاء الدين1: 2013-01-27

فين الدين فين الأخلاق

فين الدين فين الأخلاق*** كلمات بس بقت تتكرر

على اللسان وعلى الأوراق*** واختلافات على شكل ومنظر

حجاب ولحية وقفطان قصيّر *** ووش متضايق ومكشّر

وطاقية هندي و باكستاني *** والشبشب صيني وياباني

وكتير فتاوي تقول بلاوي*** وكلام غريب وجديد بيحير

واللي يهاجم واللي يكفــــّر*** واللي يدافع واللي يبرّر

واللي يحرم واللي يحلل *** واللي بيمدح واللي بينصح

والوقت ضايع ف الحكايات ***وتقسيمات جماعات جماعات

واللي في يوم كان أشقى الخلق*** وما يستاهل غير الشنق

اصبح كأنه مولود مجاهد *** عايز يخلي الكون يتغير

وينسى انه أبو المفاسد *** ويصدق انه طاهر مطهــّر

وناس بتقفل أكبر شارع*** عشان يقولوا عندنا جامع

والميكروفون بيسد ودان*** لا يراعي طالب ولا عيان

واللي ينصّب نفسه امام *** علشان دقنه هي الأكبر

وبقفطان أبيض ومنور *** يخطب ساعتين فوق المنبر

ولا بيحس ولا بيتأثر *** بناس كتير يمكن تتضرر.

فين الدين فين الأخلاق *** كلمات بس بقت تتكرر.
*******

يمكن الاستماع عن طريق هذا الرابط
العودة الى صفحة المحتويات

الصفحات