الوقت من دهب

((((( الوقت من ذهب )))))

الوقت من دهب .. وقيمته تتحسب .. وسرقته جريمة .. دايما بترتكب .
*********
صاحبك قالك ثواني .. أنا جاي استناني .. والثانية تجر الساعة ..
ويضيع منك دهب .
*********
سواق أوتوبيس يتأخر.علشان كان رايح يفطر. شوف كام راكب يتأثر.
بالوقت اللي ذهب .
*********
دكتور اتأخر ساعة .. ولا قال أسف ياجماعة .. وكأن التأخيرعادي ..
مابيسواش الدهب .
*********
برنامج تليفزيون.. يتشاف من كام مليون.. يسرق منهم أوقات ..
تسوى المليون دهب .
*********
وموظف بالمعاشات .. يطلب في المستحيلات ..والطلبات قبل ما تكمل ؛ العمر يكون ذهب .
*********
مسئول ويقول فرمان .. اللجنة تبقى لجان .. ويضيــــّع في الأوقات.. أوقات تسوي الدهب .
*********
ياناس عقلي ذهب ....لما اشوف الدهب .. مرة ف بلدنا ضايع ..
وف مرة يتنهب .
*********
الوقت من دهب .. وقيمته تتحسب .. وسرقته جريمة ..
دايما بترتكب .
*********

يمكن الاستماع عن طريق هذا الرابط

* ملعونة المعونة *

ملعونه المعونة ... اللي تخليك كسلان .

ملعونه المعونة... لو كان لها أتمان .

ملعونه المعونة...اللي تسكت لسان .

ملعونه المعونة ... اللي بتسرق زمان .

ملعونه المعونة ... م اللي بيخدعونا

وعايزين يحبسونا ... في وهم الأمان .

**********

يمكن الاستماع عن طريق هذا الرابط 

سنة ألفين ومية

سنة ألفين وميــه .. العالم كرة ارضيـة .

تجمعهم أكبـر وحدة .. الوحدة الانسانيــة .

**********

و حدود مالهاش وجود .. ياريت ياريت ما تعود .

مع انها ياما زمان .. ماتوا علشـانها جدود .

**********

سنة ألفين وميــة .. الطاقة بقت شمسية .

وف كل مكان موجودة .. زي الهوا والماية .

*********

والأجهزة المحمولة.. قد الترمسة والفولة .

والطاقة بدون أسلاك .. في الهوا والفضـا منقولــة .

************

والأم تشوف أولادها.. عالشاشة صور بتبان .

وأملهـا وكل مرادها.. تقابلهم بالاحضـان .

***********

سنة الفين وماية.. الأرض قليلة و غالية .

وأراضينا الزراعيـة ... يمكن تتباع بالشاليـة .

**********

سنة الفين وماية ... كل الزراعات محمية .

و مفيش مجنونة يا طماطم .. ولا عاقلة يا ملوخيـة .

**********

والهندسة الوراثية.. تعمل أصناف زراعية .

إيشي فاكهة من غير بذرة .. وفراخ حية مخلية .

***********

أما عن العجول.. شكلها بقى مش معقول .

لا قرون ولا حتى ديول.. ولا فيه لزمة لرجول .

************

بقها على طول مشغول .. والمعدة شديدة قوية .

تاكل أكلها على طـول .. تعمله لحمة مشفيـة .

**********

سنة الفين وماية .. كلمات ليها بقية .

وبالأمل نتقابل .. في الأيام اللي جايـة .

**********

يمكن الاستماع عن طريق هذا الرابط 

* بغبغانات *

بغبغانات دول بغبغانات ... 

اللي يرددوا في الكلمات

********** 

كلمة يقولها بتوع أمريكا .. قوام تتردد بالمزيكا . 

كلمة يقولها الناس ف أوروبا .. يبنوا عشانها قصر بقبة . 

حتى اللي بيتقال في الصين .. برضه وراه بيقولوا أمين . 

كلمة شمال مع كلمة يمين.. هو دا حال البغبغانات . 

**********

يمكن الاستماع عن طريق هذا الرابط

قصة كفـــــــاح ست الستات

* نموذج من سيدات الأعمال اللاتي ... لا يعملن إلا لغرض المظهر الاجتماعي ، وبريق الشهرة ، ويساعدهن على ذلك الاستناد إلى ثروة وشهرة أزواجهن .

* وهذا النموذج لا غبار عليه ، فقد يكون الناتج منه خيرا على المجتمع ، ومزيدا من التبرعات والمشروعات الخيرية . * ولكن تأتي المشكلة ... عندما يتطور هذا النموذج ، ويلجأ إلى اتباع أسلوب الخداع ، وطمس الحقائق ، والمبالغة في الدعاية . 

* قصة كفاح *

اسمعوا مني قصة كفاح ..... لست ولا كل الستات . 

عمرها كلــه ياعيني راح ..... في الزيارات والاجتماعات .

 ***********

 قضت يا عيني ليالي طوال ........ تخطب ف كل المناسبات . 

والكلمة من بقهــــا تتقال ..... للأرضيات و الفضائيات .

 ********** 

و ياما قصت كتير شرايط ...... وكل يوم في الافتتاحات . 

حقيقي تعبت حقيقي عانت .... في الســـهرات والاحتفـــالات . 

************* 

و ياما حطت حجر أساس ...... بإديها من غير جوانتيات . 

و يامـــا شاركت بالإحساس ........... و يامــا ساعدت بالكلمات . 

**************** 

وتحب دايما فعل الخير ....... تحت شعار م الغير للغير .

 واسمها طبعا هو الكبير ....... وتحته ياما كتير حكايات . 

**************** 

تعبت ياعيني من الميكياج ........ وكل أنواع الماسكات . 

وكل يوم تمــارين ومســاج .... وهدوم كتيرة ومجوهرات.

 ************** 

وياما راحت سفريات ... ترجع وشايلة يا عيني حاجات . 

حاجات هدايـــا ومكافئات ... عن كل خطوة من الخطوات .

 *********** 

حقيقي تعبت حقيقي عانت ........ كتير كتير ست الستات 

 **********

يمكن الاستماع عن طريق هذا الرابط 

الزراعة معنى كبير

** كلمات عن الزراعة على سبيل الشرح المختصر لأهمية الزراعة والعمل في المجال الزراعي وكان ذلك ردا على الاتجاه الحالي نحو تهميش المجال الزراعي بعد أن اختلت الموازين وأصبحت مادة التربية الزراعية لا تجد من يهتم بها رغم أنها تربية بيئية تسعى الى توعية المواطن ببيئته وكيفية التعامل معها وتقرب له سبل الاحساس بالانتمائية بالمكان والوطن الذي يعيش فيه. وما أخطر غياب الانتمائية ........ * الزراعة معنى كبير *

هي زراعة أمل … نرويها بالعمل … وثمارها كل الخير . 

هي حصن البلاد … ضد الاستعباد… والخضوع للغير . 

بتحمي الاقتصاد … من كتر الاستيراد … وقلة التصدير . 

وهي أكيد إصلاح ... وبدونها أي سلاح… مالهوش أبدا تأثير . 

فيها الجمال ماحلاه ... عشان من صنع الله ... وطبيعي بدون تزوير. 

بتعلم الإنسان… إزاي بكون فنان … وروعة التعبير . 

بالزرع في البستان.. والأرض والحيوان … والزهر والعصافير . 

وتنشط الوجدان … وتزود الإيمان … وتصحي في الضمير . 

وتخلي الفكر يقوم … من الثبات والنوم … للبحث والتطوير . 

وتوظف العلوم … في كل لحظة ويوم … في مجالات كتير. 

خضر وكمان محاصيل ... والزينة والتجميل ... والطب والتعطير . 

وماشية وغنم ودواجن .. وأخشاب للمساكن .. وقطن وصوف وحرير. 

وهي كمان ثقافات … بتبني الشخصيات… بعلم وفن غزير . 

ونقلت البشرية … من الحياة البرية ... لبداية التعمير . 

وبداية الانتماء … والحب والوفاء … للوطن الكبير . 

راسمالها ماية وأرض.. وعزيمة مالهاش حد ..مش بس فلوس بتطير 

و مافيش أبدا حد… يمنع كرم الأرض …وخيرها الوفير . 

هي الحياة كلهـــــــــــــا .. ولازم نقدم لهـــــــــــــا .. الحب والتقديـــر. 

******

يمكن الاستماع عن طريق هذا الرابط 

* يمكن متابعة فنون وزراعة